Aku besai ba Los Angeles, California, Amerika Serikat, ba endur ti tebilang enggau gangster sereta pengawa makai dadah. Aku anak kedua ari enam iku diri menyadi.

Kenyau ari mit, indai mai kami ngagai gerija evangelis. Tang, lebuh aku nembiak, aku ngembuan pengidup ti pura-pura. Aku enggau raban belagu ba gerija. Tang ba maya ti sama, aku mega enggau parti, makai dadah, sereta ngereja ulah seks ti enda bemoral.

Aku jampat ringat sereta kasar. Lebuh belaya, aku deka ngena sebarang utai nyadika senyata aku. Utai ke dipelajar ba gerija enda ulih nulung aku. Aku seruran ngumbai “Petara deka malas dendam—lalu aku tu meh pengari iya!” Ba ujung taun 1960-an, lebuh aku ba sekula menengah, aku amat alit ati enggau siti raban politik ke suah ngena ulah ti kasar kena ngetanka hak mensia. Nya alai, aku enggau siti raban pelajar ke ngetanka hak mensia. Kami suah ngereja pengawa ngelaban. Lalu tiap kali kami ngereja nya, sekula patut ditutup enda lama.

Tang aku agi enda puas. Nya alai, aku berengkah ngereja pengawa jenayah. Ambika chunto, lebuh aku meda cherita wayang pasal ulun bansa Afrika ke diperinsa ba Amerika, aku enggau bala bakih aku amat pedis ati nyentukka kami berengkah malu nembiak orang putih ba dia. Udah nya, kami ngagai endur orang putih ngambika ulih malu mayuh agi orang.

Lebuh umur aku nyauka manggai dua puluh taun, aku enggau dua iku menyadi lelaki aku ngereja mayuh jenayah. Kami suah ditangkap piak bekuasa. Seiku ari menyadi aku enggau raban kongsi gelap, lalu aku mega enggau sekali. Pengidup aku majak jai-sejai.

Apai indai bakih aku Saksi-Saksi Jehovah lalu sida mai aku enggau gempuru. Aku meda Saksi-Saksi Jehovah amat bebida. Semua orang ngena Bup Kudus ba gempuru. Orang biak mega ngenataika cheramah! Aku amat gaga ati laban nemu nama Petara nya Jehovah. Sida suah nyebut nama tu. (Masmur 83:18, peda Jaku Penerang) Taja pan bala menyadi datai ari mayuh bansa, tang semua sida beserakup.

Aku rindu ngagai gempuru, tang aku agi enggai belajarka Bup Kudus enggau Saksi-Saksi Jehovah. Bisi sekali, aku ngagai gempuru, tang bala kaban aku ngagai konsert. Dia, sida malu seiku nembiak nyentukka iya mati laban iya enggai meri jaket iya. Ba hari siti, sida bejaku begah pasal pengawa munuh nya. Indah lebuh sida dipechara ba kot, sida ngumbai utai nya ukai penyalah ti besai. Mayuh ari sida iya dijil seumur idup. Aku amat gaga ati laban enda enggau sida malam nya. Nya alai, aku keran deka ngubah pengidup aku lalu berengkah belajarka Bup Kudus.

Ba aku, ulah ke bechiping entara bansa deka seruran bisi. Nyadi, aku amat alit ati meda bala Saksi. Ambika chunto, lebuh seiku menyadi lelaki ke bekulit burak mupuk ngagai luar negara, siti ruang bilik Saksi ke bekulit chelum nyaga bala anak iya. Kelimpah ari nya, siti ruang bilik Saksi ke bekulit burak udah nyediaka endur diau ngagai seiku nembiak ke bekulit chelum. Semua tu ngasuh aku andal Saksi-Saksi Jehovah nitihka jaku ajar Jesus ba John 13:35: ‘Enti kita rinduka pangan diri, nya baru semua orang deka nemu kita murid aku.’ Aku nemu aku udah tetemuka raban bala menyadi ti bendar.

Lebuh mansik Bup Kudus, aku sedar runding aku patut diubah. Aku ukai aja patut nyeliah ari runding sereta ulah ti kasar tang aku mega patut ngumbai pemaik nya jalai pengidup ti pemadu manah. (Rome 12:2) Aku belubah-lubah ngaga pemansang. Lalu, ba Januari 1974, aku dibaptisa nyadi seiku ari Saksi-Saksi Jehovah.

Pengudah dibaptisa, aku agi patut nagang pemangah aku. Bisi sekali, lebuh aku nginjil, radio kerita aku dichuri. Aku begagaika penchuri nya, lalu lebuh aku semak iya, penchuri nya ninggalka radio nya lalu ngerarika diri. Lebuh aku madahka cherita nya ngagai bala menyadi Kristian, seiku tuai gempuru nanya aku, “Stephen, enti nuan ulih nangkap penchuri nya, nama deka digaga nuan?” Tanya nya ngasuh aku berunding lalu meransang aku bebendar deka bebaik enggau orang.

Kena Oktober 1974, aku berengkah gawa penuh jam ngagai Jehovah, lalu aku ngena 100 jam sebulan ngajar orang Bup Kudus. Udah nya, aku bisi peluang gawa ba indu opis sedunya Saksi-Saksi Jehovah ba Brooklyn, New York. Tang ba taun 1978, aku pulai baru ngagai Los Angeles kena nyaga indai aku ke sakit. Dua taun udah nya, aku jadi enggau Aarhonda. Iya mayuh nulung aku nyaga indai datai ke indai aku mati. Udah nya, aku enggau Aarhonda enggau sekula Gilead. Pengudah nya, kami duai dianjung ngagai Panama nyadi pengerintis seberai tasik.

Kenyau ari maya aku dibaptisa, bisi sekeda utai ti nyadi ke ulih ngasuh aku ringat. Enti orang bukai nguji ngasuh aku ringat, aku deka mupuk ari endur nya tauka mutarka utai ti nyadi nya enggau chara bukai. Mayuh orang, nyengkaum bini aku, muji aku laban udah mutarka penanggul nya enggau manah. Aku tekenyit meda ubah tu! Aku pechaya utai tu nyadi ukai ketegal aku empu. Tang, laban Bup Kudus endang bisi kuasa ngubah pengidup.—Hebrew 4:12.

Bup Kudus udah meri tuju ba pengidup aku lalu ngajar aku baka ni deka nyadi orang ti rinduka pemaik. Aku nadai agi malu orang; tang, aku nulung sida belajarka pemendar. Aku indah bisi peluang belajarka Bup Kudus enggau seiku bakih sekula ke suba nya munsuh aku! Pengudah iya dibaptisa, kami duai kala diau sama bilik. Nyentukka seharitu, kami duai agi nyadi kaban ti manah. Ke diatu, aku enggau bini aku udah nulung lebih ari 80 iku orang nyadi Saksi-Saksi Jehovah.

Ati aku penuh enggau asai terima kasih ngagai Jehovah. Iya udah nulung aku ngembuan pengidup ti bisi reti sereta lantang enggau bala menyadi Kristian.