1. Kati mayuh orang pechaya pasal pengawa bemanang enggau majik?

 BUP African Traditional Religion madahka, “Nadai guna nanya orang ba Afrika sekalika pengawa bemanang nya bisi tauka enda, laban ba sida, pengawa bemanang tu utai ti bendar.” Orang ke enda bepelajar sereta orang ke bepelajar pechaya pasal pengawa bemanang enggau majik. Indah sekeda tuai pengarap Islam enggau Kristian mega pechayaka pengawa tu.

2. Nitihka mayuh orang, ari ni penatai kuasa majik?

² Mayuh orang pechaya bisi kuasa tauka roh ti enda ulih dipeda. Petara ngawal iya. Semengat sida ke udah mati ulih ngena kuasa nya, lalu sekeda mensia nemu ngena kuasa tu. Sida ngena kuasa tu kena nulung tauka ngemediska orang.

3. Mayuh orang pechaya kuasa majik ti jai ulih dikena ngereja nama?

³ Orang ulih ngena kuasa nyelai nya kena ngemediska orang bukai. Ambika chunto sida ngasuh kesindap, burung, lalat tauka jelu bukai nyerang orang. Mayuh orang ngumbai bansa majik tu ulih ngujungka orang belaya, mandul, sakit sereta ulih ngasuh orang mati.

4. Nama dipechaya sekeda orang Afrika pasal bemanang? Lalu nama dipadah sekeda orang ke kala nyadi manang?

⁴ Orang ba mayuh endur di Afrika pechaya bala manang ninggalka tubuh sida maya malam hari. Sida terebai ngagai endur bukai lalu betemu enggau manang ke bukai tauka ngerusak pengidup mansa sida. Laban tubuh sida mengkang ba katil, nadai bukti ti nunjukka tu amat nyadi kelimpah ari cherita ke ditusui sida ke udah nyadi manang. Ngambika chunto, siti majalah ba Afrika madahka utai ke disebut sida ke kala nyadi manang, kelebih agi nembiak ke indu. Ku sida: “Aku udah munuh 150 iku orang ketegal ngasuh moto eksiden.” “Aku munuh lima iku anak mit enggau chara nginsap darah sida.” “Aku munuh tiga iku boyfriend aku ketegal sida ninggalka aku.”

5. Baka ni kuasa ti nyelai tu dikumbai ulih ngelindung orang?

⁵ Sekeda orang ngumbai kuasa ti nyelai tu mega ulih ngelindung orang. Sida ngena engkerabun nyadika gelang sida. Bisi orang ngengkahka ai pengaruh tauka jimat ke bukai ba rumah sida, lalu digitang ba pintu kena ngelindung sida. Sida pechaya marik ke ngundan ayat Bup Kudus tauka al-Quran ulih ngelindung sida.

6. Nama utai ti dikereja Sitan enggau bala melikat iya ti jai suba? Lalu nama runding kitai pasal kuasa sida?

⁶ Sigi amat, munsuh mensia ti pemadu bahaya iya nya Sitan enggau bala melikat ti jai. Sida bisi kuasa ngachau runding sereta pengidup mensia. Kenyau ari suba, sida ulih ngerasuk mensia enggau jelu. (Matthew 12:43-45) Kitai enda patut ngumbai sida enda bekuasa, lalu kitai mega enda patut ngumbai sida pemadu bekuasa.

7. Sitan deka kitai pechayaka nama? Lalu beri sempama.

⁷ Sitan nya raja pemula. Iya nipu orang ngambika sida berunding iya bisi mayuh agi kuasa ari ke dikembuan iya. Kena ngambarka tu: Kekadang bala soldadu ngena sepika ti besai kena ngemba munsuh sida. Sebedau nyerang, bala soldadu masang rikut bunyi senapang ngena sepika ti besai nya. Sida deka munsuh berunding, sida benung diserang ngena senyata ti bekuasa. Enggau chara ti sama, Sitan deka mensia pechaya kuasa iya nadai tatak. Tuju iya deka ngenakutka mensia ngambika ngereja peneka iya, ukai peneka Jehovah. Diatu aram kitai bejuraika tiga iti pemula ke dipadah Sitan.

8. Nama pemula ke dipadah Sitan?

⁸ Siti ari pemula Sitan nya, nadai utai jai nyadi pia aja. Sitan dekaka orang pechaya utai ke jai nyadi ketegal orang sengaja ngereja nya tauka laban kuasa majik. Ngambika chunto, gambarka siku anak mit mati ketegal malaria. Indai iya engka nemu malaria nya siti penyakit ti berampit ketegal nyamuk. Tang iya mega engka berunding bisi siku orang ke ngena manang nganjung nyamuk nya ngigit anak iya.

9. Baka ni Bup Kudus nunjukka ukai Sitan ke ngasuh semua penanggul nyadi?

⁹ Taja pan Sitan bisi kuasa ngasuh sekeda penanggul nyadi, tang iya nadai kuasa ngasuh semua penanggul nyadi. Bup Kudus madah: “Orang ke laju belanda di dunya tu enda selalu menang belumba, lalu orang ke berani enda selalu menang beperang. Orang ke bepenemu-dalam enda selalu bulih pengidup, orang ke nemu berunding enda selalu nyadi kaya, lalu orang ke nemu ngereja utai enda selalu niki pangkat, laban utai ti jai endang tau nyadi ba genap iku orang.” (Pengajar 9:11) Orang ke laju belanda ari orang bukai, enda semesti iya menang lebuh belumba. Utai ke enda disadang engka nyadi lalu ngujungka iya alah. Engka iya tesangkut lalu labuh, tauka engka iya sakit lalu kaki iya kram tauka besintak. Semua utai tu ulih nyadi ngagai sapa-sapa. Utai tu enda semesti iya datai ari Sitan tauka manang. Tu semina nyadi pia aja.

10. Nama ku sekeda orang pasal manang? Lalu baka ni kitai nemu tu pemula?

¹⁰ Peratika pemula kedua ke dipadah Sitan. Orang ba sekeda menua pechaya bala manang ninggalka tubuh sida lalu bejalai lebuh malam hari ngambika ulih betemu enggau bala manang ke bukai tauka ngerusak pengidup mansa sida. Tanya diri empu: ‘Enti bala manang amat ngereja nya, nama utai ke ninggalka tubuh sida?’ Kitai udah belajar ari Bup Kudus, nadai semengat tauka roh ti diserara ari mensia.

11. Baka ni kitai nemu bala manang enda ninggalka tubuh sida, lalu kati nuan pechayaka tu?

¹¹ Nadai semengat tauka roh ke diseraraka ari tubuh lalu ngereja nama-nama utai, sekalika nya manah tauka jai. Nyadi, bala manang enda ulih ninggalka tubuh sida. Iya ke amat, sida enda ngereja utai ke dipadah sida.

12. Baka ni Sitan ngasuh mensia pechaya sida amat kala ngereja sesiti utai, taja pan sida enda kala ngereja nya?

¹² Nama kebuah sida ke kala nyadi manang madah utai ke kala dikereja sida? Sitan ulih ngasuh mensia pechaya sida kala ngereja utai taja pan sida nadai kala ngereja utai nya. Sitan ulih ngasuh orang meda genera. Enggau tu, sida ngumbai diri kala meda, ninga tauka ngereja sesiti utai, taja pan utai nya nadai kala nyadi. Nengah chara tu, Sitan ulih ngelimpangka mensia ari Jehovah lalu ngasuh sida berunding utai ke dipadah Bup Kudus nya salah.

13. (a) Kati bisi bansa pengawa bemanang ti manah? (b) Nama ajar Bup Kudus pasal pengawa bemanang enggau majik?

¹³ Peratika pemula ketiga ke dipadah Sitan: Bisi pengawa bemanang ti manah sereta ulih nulung orang. Bup Kudus nadai madah bisi bansa pengawa manang ti manah sereta pengawa manang ti jai. Bup Kudus madahka semua pengawa majik enggau bemanang nya salah. Peratika adat ke diberi Jehovah ngagai orang Israel pasal majik enggau pengawa bemanang:

•   “Anang betilitka nasit tauka bemanang.”—Adat Lewi 19:26.

•   “Lelaki tauka indu ke bejaku enggau semengat orang ke udah mati, deka dituku ngena batu datai ke mati.”—Adat Lewi 20:27.

•   “Anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati.”—Ulang Adat 18:10-14.

14. Nama kebuah Jehovah meri adat bekaul enggau pengawa bemanang sereta majik?

¹⁴ Semua adat tu enggau terang madahka Petara enggai nembiak Iya ngereja pengawa bemanang tauka majik. Jehovah meri semua adat tu ngagai nembiak Iya laban Iya sayauka sida lalu enggai sida nyadi ulun penakut. Iya enggai sida diperinsa bala melikat ti jai.

15. Baka ni Bup Kudus nunjukka Jehovah nya jauh bekuasa agi ari Sitan?

¹⁵ Taja pan Bup Kudus nadai madah enggau terang pasal utai ke ulih dikereja sereta utai ti enda ulih dikereja bala melikat ti jai, iya nunjukka Petara Jehovah nya jauh bekuasa agi ari Sitan enggau bala melikat iya ti jai. Jehovah muru Sitan ari serega. (Pemandang 12:9) Peratika mega, Sitan minta pemendar kena nguji Jop, lalu iya ngasi lebuh Petara enda nyagi iya munuh Jop.—Jop 2:4-6.

16. Kitai patut ngiga pengelikun ari sapa?

¹⁶ Jaku Dalam 18:10 madah: ‘Jehovah baka menara ti tegap, endur alai orang ke lurus tau datai lalu diau enggau likun.’ Nyadi kitai patut ngiga pengelikun ari Jehovah. Nembiak Petara enda ngena jimat tauka pengaruh kena ngelindung sida ari Sitan enggau bala melikat ti jai, lalu sida enda takut disumpah orang tauka dikemediska bala manang. Nembiak Petara pechaya utai ti dipadahka Bup Kudus: ‘Jehovah ngemataka semua dunya, lalu meri pengering ngagai orang ke taluk ngagai Iya.’—2 Bansa Israel 16:9.

17. Nama semaya James 4:7 lalu nama patut digaga kitai?

¹⁷ Nuan mega ulih andalka tu enti nuan nyembah Jehovah. James 4:7 madah: “Nya alai, ngasi meh ke Petara, lalu laban meh Sitan. Enggau nya, Sitan deka rari ari kita.” Enti nuan nyembah Petara ti bendar, nunduk ngagai Iya, nuan ulih andal Jehovah deka ngelindung nuan.