Aku ada ba Paddington, siti endur ba London, England, endur ti amat mayuh orang diau. Aku diau enggau indai sereta tiga iku menyadi indu. Apai enda seruran enggau kami laban iya udu ngirup.

Maya agi mit, indai ngajar aku chara besampi ninting malam. Aku bisi Bup Kudus ti mit ke semina ngundan bup Masmur, lalu aku belagu ke nya nitihka tiun diri empu. Aku kala macha siti rambai jaku dalam siti bup ke madahka: “Bisi maya ila pengidup kitai deka datai ba pengujung iya.” Utai tu ngasuh aku enda tinduk maya malam hari laban kelalu irau pasal jemah ila. Aku berunding, ‘Kati pengidup kitai naka tu aja?’ ‘Nama kebuah aku bisi ditu?’ Aku enggai mati!

Aku bisi minat enggau pengawa bemanang. Aku nguji bejaku enggau orang mati, ngagai kubur enggau bala kaban sekula, sereta meda cherita antu enggau sida. Ba kami, utai tu amat ngenakutka tang iya amat ngalitka ati.

Maya aku beumur sepuluh taun aku berengkah ngembuan ulah ti enda manah. Aku berengkah udu nginsap. Udah nya, aku berengkah makai dadah. Lalu berengkah ngirup ai bisa maya aku beumur 11 taun. Taja pan aku enda rindu asai ai bisa nya, tang aku rindu mabuk. Aku mega rindu muzik, betanda, sereta ngagai parti enggau kelab malam. Aku suah belalai pansut maya malam hari lalu pulai maya rerak tawas. Pagi siti, aku kesuah iya enda datai sekula laban kelalu lelak. Maya ba sekula, aku ngirup ai bisa maya sesi kelas betukar.

Ketegal ulah aku enda manah aku bulih peresa ti enda ngemuaska ati maya ujung taun sekula aku. Indai amat asa sereta ringat. Kami duai bekelikuh, lalu aku pan rari ari rumah. Aku diau enda lama enggau pangan lelaki aku, Tony. Iya ngereja pengawa ti jai sereta nyual dadah. Lalu, iya mega dikumbai orang ti amat mangah. Udah nya aku betubuh bisi, lalu maya aku beumur 16 taun, aku ngadaka seiku anak lelaki.

Keterubah kali aku betemu enggau Saksi-Saksi Jehovah maya aku diau ba asrama ngagai indai ke bedau kawin enggau anak sida. Piak bekuasa meri aku siti bilik dia. Dua iku indu Saksi suah betemu enggau sekeda ari bala indai ti biak dia. Bisi sekali aku enggau randau sida. Aku deka nunjukka ajar bala Saksi nya salah. Tang sida enggau manah nyaut tiap iti tanya aku ngena Bup Kudus enggau silik. Aku amat rinduka sida, laban sida manah sereta nelap. Nya alai, aku setuju belajarka Bup Kudus enggau sida.

Enda lama udah nya, aku belajar siti utai ari Bup Kudus ke ngubah pengidup aku. Kenyau ari mit, aku takut mati. Tang diatu aku udah belajar pasal ajar Jesus bekaul enggau pengangkat ari mati! (John 5:28, 29) Aku mega belajar pasal Petara ke amat ibuhka aku. (1 Peter 5:7) Aku rinduka jaku ba Jeremiah 29:11, ke madahka: “Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.” Aku berengkah pechaya, ila aku deka bisi pengidup ti meruan belama iya ba dunya Paradais.—Masmur 37:29.

Saksi-Saksi Jehovah ngayanka pengerindu ti bendar ngagai aku. Lebuh aku datai begempuru keterubah kali, semua sida amat manah enggau aku! (John 13:34, 35) Chara sida ngelaluka aku amat bebida enggau orang ba gerija. Taja pan pengidup aku enda manah tang sida agi nerima aku. Sida meri awak, ibuh, sereta nulung aku. Aku ngasaika diri baka ba ruang bilik ti besai ke penuh enggau pengerindu.

Pengudah belajarka Bup Kudus, aku sedar aku patut ngaga ubah ngambika ulih nitih standard moral Petara ti tinggi. Aku ngasaika diri tusah deka badu nginsap. Kelimpah ari nya, sekeda muzik meransang aku makai dadah. Nyadi, aku ngubah muzik ke didinga aku. Aku badu ngagai parti sereta kelab malam ngambika enda dipanjuk pengingin deka mabuk. Aku mega ngiga kaban ti bisi ulah ti manah ngambika ulih nulung aku ngubah gaya pengidup aku.—Jaku Dalam 13:20.

Ba maya ti sama, Tony belajarka Bup Kudus enggau Saksi-Saksi Jehovah. Lebuh bala Saksi nyaut tanya iya ngena Bup Kudus, iya andal utai ke dipelajar iya nya utai ti bendar. Iya ngaga ubah ti besai ba pengidup: iya badu begulai enggau bala kaban iya ke mangah, badu ngereja pengawa ti jai, sereta enda agi makai dadah. Ngambika ulih ngelantangka ati Jehovah, kami patut ngubah gaya pengidup ti enda bemoral ngambika pendiau kami manah ke anak kami. Kami kawin ba taun 1982.

Aku ngiga artikel ari majalah Menara Jaga enggau Peratika! * ke ngembuan cherita pengidup orang ke udah mujur ngaga ubah ba pengidup. Teladan sida meransang aku terus bebendar sereta enda ngalahka diri! Aku seruran besampi ngagai Jehovah ngambika terus nulung aku ngaga ubah. Aku enggau Tony dibaptisa nyadi Saksi-Saksi Jehovah kena bulan Julai 1982.

Bisi kaul enggau Petara Jehovah udah nyelamatka nyawa aku. Jehovah udah nulung aku enggau Tony napi penanggul. Kami udah belajar bepanggai ba Petara. Kami ulih ngasaika Jehovah seruran mantu sereta nyaga ruang bilik kami.—Masmur 55:22.

Aku gaga ati ulih nulung bala anak kami belajar pasal Jehovah. Ba maya ti sama, aku rindu meda bala uchu kami besai dalam pemendar.

Diatu aku ulih tinduk jenak maya malam hari lalu aku enda irau pasal jemah ila tauka pemati. Ninting minggu aku enggau Tony kisuk ngelawa eklisia Saksi-Saksi Jehovah ke bukai ngambika ulih meransang sida. Kami enggau sida ngajar orang bukai pasal pengidup ti meruan belama iya ke deka diulih sida, enti sida arapka Jesus.