Runding Bup Kudus

“Sukan Ekstrem”—Patut Nuan Berambunka Nyawa Ketegal Nya?

“KEMAYAHARITU, MAYUH ORANG UKAI SEMINA RINDU MEDA SUKAN TI KELALU KASAR, TANG SIDA MEGA DEKA NGUJI SUKAN NYA. NGAMBIKA CHUNTO, SUKAN TEREJUN ARI BILUN, TEREJUN ARI GUNUNG, NGENA KAYAK NGEREDAH AI WONG, SERETA SANGGUP NYELAM NGAMBIKA SEMAK IKAN BAM.”—SURAT KHABAR WILLOW GLEN RESIDENT.

TU nunjukka sukan ekstrem majak tebilang. Mayuh orang rindu sukan ti bahaya tu, chunto iya, terejun udara (skydiving), niki dinding ais (ice climbing), luncur udara (paragliding), sereta terejun tapak (BASE jumping). a Sekeda orang mega ngena papan luncur salji, bebasikal ba bukit, skateboard, sereta ngena kasut roda ba endur ti amat tinggi lalu nyukat penyauh sida ulih engkechit. Nitihka majalah Time, majak mayuh orang rinduka “sukan ekstrem” enda ngira sekalika nya semina hobi aja, tauka profesional tauka kepakaran sida. Sida sanggup berambunka nyawa diri sereta ngelaban asai ati ti takut, kena nyapai juluk ati sida lalu ngemansangka pengelandik ba sukan tu.”

Taja pan sukan tu tebilang, tang iya ulih ngenataika pemedis. Mayuh ari sida bulih pemedis ketegal sida main sukan tu enggau chara ti ekstrem. Kena taun 1997, ba Amerika Serikat aja, penyampau orang ke bakal ba sukan skateboard, udah niki ngagai 33 peratus; snowboard 31 peratus; lalu ba sukan niki gunung udah manggai 20 peratus. Sayau amat, mayuh orang bebadi ketegal sukan ekstrem ke bukai. Orang ke enggau sukan tu pan sedar, sukan tu bahaya. Ku siku indu ke bemain sukan luncur ais enggau ekstrem madahka, “Aku nemu, aku engka ulih mati barang maya.” Lalu siku pemain snowboard ti profesional madahka, “Enti nuan bedau bakal, reti iya nuan bedau nguji enggau naka ulih.”

Nama runding ti patut ba orang Kristian pasal sukan ke baka tu? Baka ni Bup Kudus ulih nulung kitai milih sekalika kitai ulih enggau sukan ekstrem tauka enda? Runding Petara pasal nyawa, ulih nulung kitai nyaut tanya tu.

Runding Petara pasal Nyawa

Bup Kudus madahka kitai, Jehovah nya “pun pengidup.” (Masmur 36:9) Iya ukai semina nempa mensia, tang Iya mega meri utai ke diguna mensia ngambika mensia ulih gaga ati ba pengidup. (Masmur 139:14; Surat Kereja Rasul 14:16, 17; 17:24-28) Nyadi, Iya tentu deka kitai nyaga sereta beterima kasihka nyawa ti udah diberi Iya. Kena kitai faham enggau dalam agi, aram kitai meresa adat sereta prinsip Jehovah ke diberi ngagai orang Israel.

Nitihka adat Moses, tiap iku kitai patut ngelindung nyawa diri enggau orang bukai ngambika kitai enda berutang darah. Chunto iya, orang ke bempu rumah patut ngaga reraga ba tisi perambung rumah iya. Laban enti enda, sema bisi orang labuh ari perambung rumah iya lalu mati, iya patut betanggungjawapka pemati orang nya. (Ulang Adat 22:8) Enti sapi ti lelaki nanduk orang, orang ke bempu sapi nya enda diukum. Tang, enti orang ke bempu sapi nya nemu, sapi iya selalu nanduk orang tang iya enda nagang sapi nya, orang ke bempu sapi nya engka berutang darah, sereta ulih diukum mati enti bisi orang mati ketegal sapi iya. (Pemansut 21:28, 29) Endang amat, adat Jehovah nunjukka nyawa amat berega ba Iya, lalu Iya deka kitai bejimat bekaul enggau nyawa.

Nembiak Jehovah ti tetap ati, faham prinsip Petara pasal nyawa. Ba cherita Bup Kudus, David bisi pengingin deka ngirup ai ba telaga ke semak pintu kuta di Betlehem. Maya nya, Betlehem dibaruh kuasa orang Pilistin. Pengudah ninga David bejaku munyi nya, tiga iku soldadu ngerenchah kem orang Pilistin, lalu nyauh ai ba telaga nya sereta mai ai nya ngagai David. Nama reaksi David? Iya enggai ngirup ai nya, tang nuangka ai nya ngagai tanah. Ku iya, “Enggai nyadi aku ngirup ai tu, laban nya baka ke ngirup darah orang ke udah berambunka nyawa!” (1 Bansa Israel 11:17-19) Ba David, iya enggai berambunka nyawa orang bukai ketegal deka ngemuaska pengingin diri empu.

Jesus mega nunjukka nyawa nya amat berega. Lebuh Sitan ngasuh Jesus terejun ari dinding rumah sembiang, lalu madahka melikat tentu deka nyambut iya sebedau iya terengkah ba tanah, ku Jesus nyaut, “Nuan enda tau nguji Petara nuan, Jehovah.” (Matthew 4:5-7) David enggau Jesus nemu, enti kitai berambunka nyawa enggau chara ti sengaja, tu salah ba mata Petara.

Tang, baka ni kitai ulih nemu sekalika sukan tu ekstrem tauka bahaya? Taja pan sukan tu dikumbai biasa lalu enda bahaya, tang tu ulih ngachau nyawa kitai enti kitai bemain bemain enggau chara ti ekstrem. Nyadi, baka ni kitai nemu tatak iya deh?

Kati Berambunka Nyawa Diri ketegal Sukan ti Ekstrem Bisi Penguntung?

Kitai patut berunding enggau bejimat lalu nanya diri empu, “Berapa penyuah orang bakal ketegal main sukan tu? Kati aku bisi chukup nerima latih tauka ngembuan perengka kena ngelindung diri ari bakal? Nama nyadi enti aku labuh, salah terejun, tauka perengka kena aku ngelindung diri jai? Kati sukan tu ngujungka aku bulih telih ti mit, balat bakal tauka engka ulih ngachau nyawa aku?”

Iya ke amat, orang Kristian ke rinduka sukan ti ekstrem tauka bahaya, benung ngerusak kaul diri enggau Jehovah. Tu mega engka ngujungka iya enda layak nerima pengawa ba raban gempuru. (1 Timoti 3:2, 8-10; 4:12; Titus 2:6-8) Enda ngira maya besukan tauka lebuh sesais, orang Kristian ti bendar patut nemu runding Petara ke ngumbai nyawa nya utai ti amat berega.

[Nota kaki]