Nama Ulih Dipelajarka Kitai Ari Utai ti Idup ke Ngelingi Kitai?

“Indah burung enggau jelu deh ulih ngajar nuan mayuh macham utai. Uji tanyaka penemu-dalam ari utai ti idup di darat, enggau di tasik.”—JOP 12:7, 8.

BARU-BARU tu, bala saintis enggau bala injinir, udah mayuh belajar ari utai tumbuh sereta jelu. Sida udah mansik sereta nitihka gamal pelan bemacham utai ti ditempa, kena ngasilka utai baru sereta ngemanahka utai ti udah digaga. Pengawa tu dikumbai biomimetik. Lebuh nuan berundingka chunto tu, tanya diri empu, ‘Sapa patut nerima puji ke ngaga semua nya?’

Belajar Ari Sirip Ikan Paus

Nama utai ke ulih dipelajarka bala orang ke ngaga bilun ari ikan paus kelasa? Bisi mayuh utai ke ulih dipelajar. Berat seiku ikan paus kelasa ke tuai kekira 30 tan, iya nya baka pemerat sebuah lori ke penuh enggau barang. Ikan paus tu ngembuan tubuh ti liat. Pemanjai iya ulih datai ngagai 12 meter, lalu sirip iya besai sereta baka sayap. Taja pia, ikan paus tu amat sikar ba dalam ai. Ambika chunto, lebuh makai, ikan paus nyemerai ari baruh jelu ke bisi chengkerang tauka ikan bukai dalam bentuk bulatan nuju ke atas ai. Ikan paus tu deka nyepu mayuh gelembung ai, lalu ngasilka jaring gelembung ke ulih ngemesai 1.5 meter. Tu ngujungka pemakai iya ulih ditulak ke atas ai lalu ditegam sekali gus.

Bala pemansik amat alit ati enggau jelu tu, laban taja pan tubuh iya liat tang iya ulih bepusin dalam bulatan ti mit. Nama kebuah sida ulih ngereja nya? Sirip depan iya enda lichin baka sayap bilun, tang begerigi. Gerigi tu dikumbai tubercles.

Lebuh ikan paus nyemerai dalam ai, tubercles deka nulung iya niki atas ai. Baka ni? Majalah Natural History madahka, tubercles ngasuh ai ngalun enggau jampat atas sirip ikan paus, taja pan ikan paus nya benung nyemerai ke atas enggau sudut ti tajam. Tang enti sirip depan iya nadai tubercles tauka rata, iya tusah deka ngangkatka diri ke atas ai. Tu deka ngasuh iya tusah deka nyemerai.

Baka ni utai ke ditempa tu ulih dikena? Enti sayap bilun digaga nitihka sirip ikan paus tu, sayap bilun nya enda begunaka mayuh utai kena nulung iya terebai enggau manah. Sayap baka nya selamat sereta senang dijaga. Pakar biomekanik ke benama John Long pechaya, enda lama da agi “kitai engka ulih meda tiap iti bilun deka ngembuan sayap baka sirip ikan paus ke bisi tubercles.”

Niru Sayap Burung Camar

Kitai nemu, sayap bilun digaga nitihka gamal pelan sayap burung. Tang baru-baru tu, bala injinir udah ngaga pemansang ba pekara tu. Nitihka majalah New Scientist, “Bala pemansik ba University Florida, udah ngaga siti bilun ke ngena remote-control [drone] ke sama baka burung camar ti ulih terebai ba endur ti sama, entachang, sereta niki enggau jampat.”

Burung camar ulih terebai enggau jampat sereta sikar laban iya ulih ngelipat sayap iya ba senentang siku enggau bau iya. Enggau nitihka sayap burung tu, ku majalah nya, “drone ke pemesai 24 inchi tu ngena siti injin ti mit kena ngasuh beberapa iti batang besi engkebutka sayap drone nya.” Sayap drone tu ngasuh iya terebai lalu enda engkebut. Pia mega, iya ulih nurun enggau jampat ba selepak bengunan ti tinggi. Ketegal tu, bala soldadu Amerika Serikat deka ngaga perengka ti sebaka enggau drone tu kena ngiga senyata kimia enggau biologi ba bandar ti besai.

Niru Kaki Tichak

Bisi mayuh utai ditemu kitai ari jelu ba tanah. Ambika chunto, tichak ulih bejalai enggau senang ba dinding enggau siling. Bup Kudus mega bisi nyebut pasal tichak. (Jaku Dalam 30:28) Nama kebuah tichak senang bejalai ba dinding enggau siling?

Tichak ulih lekat ba endur ti amat lichin laban tapa kaki iya ngembuan utai ti sebaka enggau buk ti alus. Baka tichak ngena siti daya molekul ti mit ke dikumbai daya van der Waals. Daya van der Waals nya ngasuh dua iti utai lekat enggau pangan diri. Tang, daya graviti nya kuat agi ari daya van der Waals. Nya kebuah, kitai enda ulih niki dinding baka tichak, laban daya graviti ti kuat ngasuh kitai labuh. Tang, beribu iti utai ti alus baka buk ba kaki tichak nambahka daya van der Waals lalu nulung tichak ngetanka pemerat tubuh iya.

Baka ni utai ditempa tu ulih nulung? Pelekat sintetik ke digaga nitihka tapa kaki tichak manah agi ari pelekat Velcro. * Majalah The Economist madahka, pelekat ke digaga nitihka “tapa kaki tichak” ulih dikena “ba pengawa berubat kelebih agi enti pelekat kimia enda ulih dikena.”

Sapa ke Patut Nerima Puji?

The National Aeronautics and Space Administration benung ngaga sebuah robot ke ngembuan lapan iti kaki ke bejalai baka kala. Injinir ba menua Finland udah ngaga sebuah traktor ke ngembuan enam iti kaki ke ulih meraka sebarang utai baka seiku indu utai gerasi. Sekeda bala pemansik ngaga kain ke ulih buka enggau tutup baka kulit buah kon ari pun kayu pain. Siti ari kilang kerita benung ngaga kerita ke niru gamal pelan ikan kutak ke ulih ngelaban tekanan ai enggau senang. Bala pemansik bukai benung mansik chengkerang abalone ke ulih tan kena ngaga baju kebal mensia ke lempung, tang tan.

Mensia udah bulih mayuh idea ti ngalitka ati ari utai ti idup ke ngelingi kitai. Nya alai, bala pemansik udah ngumpul beribu iti sistem biologi ti bebida. Bala saintis ulih ngena penerang ti udah digumpul tu kena “mutarka penanggul gamal pelan ke digaga sida,” ku The Economist. Sistem biologi tu dikumbai “paten biologi.” Kesuah iya, orang ke megai paten tu iya nya, seseiku orang tauka sesiti serikat ke ngerejista idea tauka mesin ti baru enggau chara ti sah. The Economist mega madahka: “Bala pemansik ngumbai gamal pelan biomimetik nya ‘paten biologi.’ Nya alai, tu nunjukka utai ti idup ke ngelingi kitai meh, kebendar iya ke megai paten.”

Baka ni utai ti idup ke ngelingi kitai tau ngembuan gamal pelan ti amat ngalitka ati? Mayuh pemansik madahka, utai tu nyadi enggau enda sengaja ari proses evolusi ke ngena awak bejuta taun. Bala pemansik ke bukai ngaga simpul ti bebida. Ba taun 2005, seiku ari raban mikrobiologi ke benama Michael Behe nulis dalam majalah The New York Times: “Kitai enggau terang meda bukti semua gamal pelan utai ti idup ke ngelingi kitai endang udah digaga: Ambika chunto seiku itit. Enti gamal iya, chara iya bejalai, sereta bunyi ke dipansutka iya baka seiku itit, kitai ulih ngumbai jelu nya seiku itit. Nya alai, enti kitai udah meda utai nya enggau nyengala, terima aja meh fakta nya.”

Endang amat, injinir ke ngaga sayap bilun ke selamat sereta mudah, patut dipuji. Pia mega, sida ke ngasilka utai baka pelekat ti manah agi, kain ti nyamai dikena, kerita ti mudah, tauka mesin ti manah agi, patut nerima puji ke utai ti udah digaga sida. Kebendar iya, orang ke niru gamal pelan orang bukai tang enda meri puji ngagai orang ke ngaga gamal pelan ti asal, ulih dikumbai penjenayah.

Perundingka fakta tu: Kena mutarka penanggul ke bekaul enggau pengawa ngasilka utai, bala pemansik ti landik deka niru utai ti idup ke ngelingi kitai. Taja pia, sida agi ngumbai utai ti idup ke ngelingi kitai datai ari proses evolusi ke nyadi pia aja. Kati runding nya betul? Enti utai ke ditiru begunaka seiku injinir ti landik sereta pintar, baka ni enggau utai ti asal? Sapa ke layak nerima mayuh agi puji? Penempa ti asal tauka orang ke niru iya?

Simpul ti Ngena

Pengudah meda bukti pasal gamal pelan utai ti idup ke ngelingi kitai, mayuh orang besetuju enggau utai ke dipadah pemasmur: ‘Jehovah, Nuan udah ngaga mayuh macham utai! Naka meh pemintar Nuan ngaga semua utai nya! Dunya nyau penuh laban utai ti idup ti digaga Nuan.’ (Masmur 104:24) Penulis Bup Kudus ke benama Paul mega madahka: ‘Kenyau ari penumbuh dunya, kuasa Petara ti meruan belama iya enggau kualiti Iya ti enda ulih dipeda, udah ditemu sereta dipeda mensia ari utai ti digaga Iya.’—Rome 1:19, 20.

Tang, mayuh orang ke pechayaka Petara sereta bebasaka ajar Bup Kudus madahka, Petara udah ngena evolusi kena nempa semua utai. Kati tu sejalai enggau ajar Bup Kudus?

[Nota Kaki]

[Blurb]

Baka ni utai ti idup ke ngelingi kitai tau ngembuan gamal pelan ti amat ngalitka ati?

[Blurb]

Sapa ke bempu paten utai ti idup ke ngelingi kitai?

[Kutak]

Enti utai ke ditiru begunaka seiku injinir ti landik sereta pintar, baka ni enggau utai ti asal?

Bilun tu niru sayap burung camar

Tapa kaki tichak enda ulih nyadi kamah, enda ninggalka tapa kaki, senang melekat sereta diangkat, lalu ulih melekat ba semua utai kelimpah ari Teflon. Bala pemansik bebendar ngasilka utai nitihka kaki tichak

Ikan kutak ngelaban tekanan ai. Tu ngasuh mensia nitihka sebuah kerita ke sama gamal pelan enggau ikan kutak

[Credit Lines]

Airplane: Kristen Bartlett/​University of Florida; gecko foot: Breck P. Kent; box fish and car: Mercedes-Benz USA

[Kutak/​Gambar]

NALURI JELU TI NGALITKA ATI

Mayuh jelu ba dunya tu, “pintar amat.” (Jaku Dalam 30:24, 25) Peratika dua iti chunto tu.

▪ Pejalai Semut Baka ni semut ke pansut ngiga pemakai ulih pulai baru ngagai sarang sida? Bala pemansik ba United Kingdom madahka, kelimpah ari ninggalka bau, semut mega ngena bentuk geometri kena nulung sida pulai baru ngagai sarang. Ambika chunto, maya semut firaun “pansut ari sarang, sida deka ngaga jalai ke bechabang. Sudut entara jalai nya kekira 50 ngagai 60 darjah,” ku majalah New Scientist. Nama kebuah tu ngalitka ati? Lebuh semut pulai baru ngagai sarang, sida ngena naluri kena milih jalai ti lurus ke nuju ngagai sarang sida. Enggau nya, sida ulih pulai ngagai sarang sida enggau selamat. Ku majalah nya agi, “bentuk geometri mega nulung semut ngambika jalai nya enda sesak. Sida mega enda jampat lelak ketegal tesat.”

▪ Kompas Burung Burung enda tesat taja pan iya terebai ngagai endur ti jauh sereta napi mayuh gaya mua hari. Nama kebuah? Bala pemansik madahka, burung ulih ngasaika medan magnet bumi. Tang “medan magnet bumi enda sama ba sekeda endur, lalu enda nunjukka jalai ti betul ngagai utara,” ku majalah Science. Nama utai ke ngasuh burung enda tesat? Endur mata panas padam ninting hari deka nyadi tanda ke kompas sida. Ketegal endur mata panas padam berubah nitihka endur enggau musin, bala pemansik ngumbai burung bisi “jam biologi kena nemu siti-siti musin,” ku majalah Science.

Sapa ngajar semut meretika geometri? Sapa meri burung kompas, jam biologi, sereta penau kena meretika nya? Kati semua utai nya nyadi ketegal evolusi? Tauka Penempa ti bepenemu-dalam?

[Credit Line]

© E.J.H. Robinson 2004