Aku Tetemuka Saut ngagai Utai ti Enda Lurus

Baka ke ditusui Ursula Menne

Kenyau ari suba, aku deka ngaduka utai ti enda lurus. Tang sayau, tu ngujungka aku dijil perintah Komunis Jerman Timur. Iya ke ngalitka ati, dia meh alai aku belajarka chara mutarka utai ti enda lurus ba dunya tu. Dingaka meh cherita pengidup aku.

AKU ada kena taun 1922, ba siti kampung di Jerman ke dikumbai Halle. Kampung tu ngembuan sejarah ke udah makai lebih ari 1,200 taun, sereta dalam urung 200 kilometer ari Berlin. Agama Protestan udah lama dititihka orang ba ditu. Madi aku, Käthe, ada kena taun 1923. Apai aku siku soldadu, lalu indai aku penyanyi.

Sama baka apai, aku mega bisi pengingin deka ngaduka utai ti enda lurus. Pengudah apai aku badu nyadi soldadu, iya meli siti kedai. Tang mayuh ari pelanggan iya nya orang ke miskin. Ketegal apai aku senang sinuka orang, iya pan enda bekira enggau sida, lalu ngemendarka sida berutang. Enda nyangka, pemanah iya nya nyau ngujungka bisnis iya enda ulih tan. Utai ke nyadi ba apai ngajar aku, semina ngereja pemanah enda ulih mutarka utai ti enda lurus. Taja pia, pengingin aku deka ngaduka utai ti enda lurus tetap mau.

Aku murihka penau indai aku. Indai ngajar kami duai madi aku pasal musik, tanda sereta lagu. Pengalaman kami maya agi mit amat manah. Tang semua nya berubah kena taun 1939.

Semua Utai Ngenyit Berubah

Pengudah abis belajar sekula, aku enggau sekula balet sereta Ausdruckstanz (iya nya sebengkah tanda ke ulih alai penari iya mansutka asai ati nengah kebut tanda). Cikgu aku Mary Wigman, iya nya siku ari orang ke ngaga tanda tu. Aku mega belajar ngelukis. Maya nya, pengidup aku amat lantang lalu aku ulih belajarka mayuh utai ti baru. Tang enda memukai, Perang Dunya Kedua nyadi kena taun 1939. Udah nya, kena taun 1941, apai aku nadai ketegal penyakit tibi.

Maya perang nya nyadi, aku semina 17 taun aja. Perang nya amat ngenakutka, lalu serata dunya balat charut. Mata aku empu meda, bala rayat nyau nunda penyai bala Nazi. Pemati, pengerusak sereta pemerinsa nyau nyadi sebagi ari pengidup. Rumah kami balat rusak ketegal bom, lalu beberapa iku ari kami sebilik bebadi ketegal perang.

Lebuh perang ngetu kena taun 1945, aku, indai aku, enggau madi aku agi ba Halle. Maya nya, aku udah kawin sereta bisi siku anak indu ke agi mit. Tang, tikah aku enda lantang, lalu kami duai laki aku ngaga pemutus, kami deka beserara. Kena ngidupka diri sereta ngemesaika anak indu aku, aku gawa nyadi penari sereta pelukis.

Pengudah perang, Jerman dibagi ngagai empat iti begian. Lalu endur kami, dipegai Kesatuan Soviet. Nyadi, kami patut nelebaka diri enggau pengidup di baruh kuasa Komunis. Kena taun 1949, endur kami ke suba ti dikumbai Jerman Timur, udah ditukar nyadi Republik Demokratik Jerman (GDR).

Pengidup ba Baruh Kuasa Komunis

Maya tu, indai aku sakit lalu aku patut nyaga iya. Nyadi, aku pan gawa ba opis perintah. Ba maya ti sama mega, aku berengkah bekelala enggau seraban pemelajar ke bebendar deka ngetanka hak orang ke enda dilayan enggau lurus. Bisi sekali, siku kaban aku enda dikemendarka tama universiti ketegal apai iya kala enggau parti Nazi. Aku amat rapat enggau iya, lalu kami selalu begulai enggau pangan diri. Nyadi aku bisi runding, “Nama kebuah iya patut dilayan enggau enda lurus ketegal pengawa apai iya?” Nyau kelama, aku pan berengkah enggau orang ba pengawa muguk, sereta kala ngelekatka keretas ba tangga siti kot.

Ketegal aku siku sekretari ba opis perintah, aku patut ngaga pengawa naip surat. Lebuh aku meda isi surat ke patut ditaip aku nya, asai ati ti enda puas dalam ati aku majak balat. Bisi siti da agi utai ke ngasuh aku ringat. Bala Komuniti pelilih ba opis perintah nya ngaga pelan, nganjung barang Komunis ngagai siku lelaki ke tuai ba Jerman, ngambika orang ngumbai iya penyukung Komunis. Aku enda sanggup nulung sida ngereja pengawa tu, nyadi aku pan ngelalaika barang nya ba opis. Pengujung iya barang nya enda dikirim.

“Orang ti Pemadu Jai” Meri Aku Harapan

Kena taun 1951, dua iku lelaki datai ngagai opis aku lalu madahka, “Nuan ditangkap.” Udah nya, sida mai aku ngagai siti rumah jil ke dikumbai Roter Ochse. Setaun pengudah nya, aku didawa besalah ketegal ngelaban perintah. Siku pemelajar madah ngagai polis, aku kala enggau orang nyadung keretas sereta ba pengawa muguk. Kes aku dipechara enggau amat enda lurus, laban semua utai ke disebut piak ke ngarika aku enda didinga sida. Tu ngujungka, aku diukum jil pengelama enam taun. Maya nya, aku sakit lalu patut dipindahka ngagai sepital ba rumah jil. Dia, bisi 40 iku da agi orang indu ke bukai. Pengudah meda pemerinsa semua sida tu, aku berengkah kesal ati. Aku belanda ngagai pintu lalu malu nya enggau pengabis pengering.

“Nama gaga nuan?!” ku jejaga jil.

“Aku enggai ditu, aku ka pansut!” ku aku nyerauh. Udah nya ku aku baru, “Aku enda kisah dipindahka ngagai sil ke bukai, asal aja ukai ditu!” Tang jejaga nya enda pedulika aku. Enda lama udah nya, aku tepedaka siku indu ba dia berupai tenang. Nyadi, aku pan duduk sepiak iya.

“Nuan patut bejimat enti deka duduk sepiak aku,” ku indu nya. Aku enda faham nama kebuah iya munyi nya. Lalu ku iya baru, “Semua orang ditu ngumbai aku meh orang ti pemadu jai, laban aku Saksi-Saksi Jehovah.”

Maya nya, aku enda nemu Saksi-Saksi Jehovah dikumbai munsuh Komunis. Ketemu aku, sida kala ngabas apai aku maya aku agi mit. Aku agi ingat apai kala madah, “Nembiak Bup Kudus (nama lama Saksi-Saksi Jehovah) endang amat!”

Aku berasai gaga lalu berengkah nyabak laban ulih betemu enggau indu tu. Aku minta ngagai iya, “Padahka meh ngagai aku pasal Jehovah.” Kenyau ari nya, aku enggau Berta Brüggemeier selalu begulai lalu berandau pasal Bup Kudus. Aku belajar, Jehovah meh Petara ti bendar, lalu Iya endang pengerindu, lurus sereta rinduka pengelantang. Aku mega belajar, Iya deka munaska semua penyai ke digaga mensia. Masmur 37:10 madahka, “Enda lama da agi orang ke jai deka abis; taja pen kita bebendar begigaka sida, tang kita nadai tetemuka sida.”

Aku Dibibaska lalu Ngerarika Diri ngagai Jerman Barat

Pengudah dijil pengelama lima taun lebih, aku dibibaska kena taun 1956. Lima hari pengudah nya, aku ngerarika diri ngagai Jerman Barat enggau dua iku anak aku iya nya, Hannelore sereta Sabine. Udah nya, aku sarak enggau laki aku, lalu betemu baru enggau Saksi-Saksi Jehovah. Pengudah belajarka Bup Kudus, aku sedarka diri patut berubah ba pengidup ngambika aku ulih ngelantangka ati Jehovah. Pengujung iya, aku dibaptisa kena taun 1958.

Udah nya, aku kawin baru enggau siku Saksi ke benama Klaus Menne. Tikah kami lantang lalu kami bisi dua iku anak iya nya, Benjamin enggau Tabia. Tang sayau, Klaus udah nadai 20 taun ti udah ketegal eksiden. Taja pan aku balu, tang aku bisi pengelantang laban aku nemu pasal pengangkat ari mati. Petara besemaya, orang mati deka diangkatka idup baru ba bumi Paradais. (Luke 23:43; Surat Kereja Rasul 24:15) Aku amat gaga ati laban keempat-empat anak aku mega nyembah Jehovah.

Ari belajarka Bup Kudus, aku amat andal, semina Jehovah ulih mai pengelurus ti bendar. Semina Iya aja nemu situasi kitai, chara pengidup kitai sereta semua utai ke nyadi ba kitai. Tu meri aku ati tenang sereta ngembuan runding ti betul, kelebih agi maya aku meda tauka ngasaika utai ti enda lurus. Pengajar 5:8 madahka, “Anang tekenyit ati lebuh nuan meda perintah nekanka pengidup orang ke seranta, lalu enggai meri sida atur ti lurus, sereta enggai meri sida hak ti endang enggi sida. Genap iku pemesai endang dijaga siku orang ke tinggi agi pangkat ari iya, lalu seduai iya pen sama mega dijaga pemesai ti tinggi agi pangkat ari seduai iya.” Iya ke amat, Penempa kitai ngembuan penuduk ti pemadu tinggi, lalu munyi ku Hebrew 4:13, “Nadai siti pan utai ke udah ditempa ke dilalaika ari Petara. Semua utai ayan lalu ulih dipeda Iya enggau terang, lalu kitai deka diakim Iya.”

Ngenang Pengidup Aku Pengelama 90 Taun

Kekadang, bisi orang nanya aku, baka ni gaya pengidup aku dibaruh perintah Nazi enggau Komunis. Iya ke amat, pengidup aku ba jeman nya amat merinsa. Semua perintah mensia, nyengkaum kedua-dua pemerintah tu nunjukka, mensia endang amat enda ulih merintah enggau manah. Dalam Bup Kudus bisi madahka, “Sekeda orang ke bisi kuasa diau, alai orang bukai ke natka diri merinsa dipegai sida.”—Pengajar 8:9.

Maya aku agi biak sereta agi pabu runding, aku ngumbai mensia ulih mutarka utai ti enda lurus. Tang diatu, aku amat andal, semina Penempa kitai ulih ngenataika pengelurus ti bendar. Iya deka munaska semua penyai, lalu ngasuh Anak Iya Jesus merintah. Lalu baka ke ditemu kitai, Anak Iya tu seruran ngemeratka orang bukai, iya enda berundingka diri empu. Dalam Bup Kudus kala nyebut pasal Jesus, ti madahka, “Nuan rinduka pengelurus, tang begedika penyai.” (Hebrew 1:9) Aku amat gaga laban Petara udah ngiring aku ngagai raja ti lurus tu, lalu aku nganti maya aku ulih idup belama iya ba baruh perintah iya.

[Gambar]

Enggau anak indu aku Hannelore sereta Sabine pengudah kami datai ba Jerman Barat

[Gambar]

Saritu, aku begulai enggau anak aku Benjamin sereta bini iya, Sandra