Ulih kitai pechayaka semua semaya Petara deka dikeamatka? Jesus pechaya, lalu ajar ari Jesus negapka pengarap bala peninga iya. Peratika chunto ke diberi Jesus dalam Ajar ba atas Bukit, ke bisi ba Matthew 5:​18: ‘Enggau bendar aku madah ngagai kita, sebedau langit enggau dunya lesap, nadai leka jaku [urup] tauka titik ti pemadu mit deka lenyau ari Adat, sebedau semua utai dikamatka.’

Urup ti pemadu mit dalam urup Hebrew nya י (yod). Iya urup ti keterubah ba Tetragrammaton, nama Petara ti kudus, Jehovah. * Kelimpah ari leka jaku enggau urup ke bisi ba Adat Moses, bala penyalin enggau orang Parisi ngumbai tiap iti “titik ti pemadu mit” nya utai ti beguna.

Jesus madahka, seagi-agi penerang ti pemadu mit dalam Adat bedau dikeamatka, langit enggau dunya enda tau lesap. Tang Bup Kudus madahka, langit enggau dunya ti nyata deka meruan belama iya. (Masmur 78:69) Nya alai jaku Jesus nya nunjukka, penerang ti pemadu mit dalam Adat pan deka dikeamatka.

Kati Petara Jehovah ibuhka penerang ti mit nya? Au. Peratika tu: Orang Israel menya enda diasuh matahka sebarang tulang anak domba Pengerami Paska. (Pemansut 12:46) Tu engka penerang ti mit. Kati sida nemu kebuah sida enda patut matahka sebarang tulang nya? Engka enda. Tang Petara Jehovah nemu, penerang tu madah pasal nadai siti pan tulang Messiah dipatahka lebuh iya diukum mati ba tiang.​​​—⁠Masmur 34:20; John 19:​31-​33, 36.

Nama dipelajarka kitai ari jaku Jesus? Kitai mega ulih pechayaka semua semaya Petara Jehovah nyengkaum semaya ti pemadu mit, deka dikeamatka. Naka meh pemesai reti urup Hebrew ti pemadu mit nya!