Stress siti reaksi tubuh ngagai situasi ke tusah. Untak nuan meri segenil ngambika hormon dianjung ngagai semua sistem tubuh. Semua hormon tu ulih nikika degup jantung, sintak seput, tekanan darah, sereta ulih ngasuh otot nuan nyadi terit. Sebedau nuan sedar nama utai ke nyadi, tubuh nuan udah dulu meri reaksi. Pengudah situasi ke tusah nya nadai agi, tubuh nuan deka pulai baka selama.

Stress nya reaksi semula jadi ke ngasuh nuan besedia napi situasi ti tusah tauka bahaya. Reaksi tu berengkah ari untak nuan. Stress ke meri penguntung nulung nuan meri reaksi enggau jampat. Pia mega, stress tu nulung nuan nyapai juluk ati. Chunto iya, ba peresa, maya interbiu tauka ba pengawa sukan.

Tang stress ba timpuh ti panjai tauka kelalu balat ulih ngemediska nuan. Enti tubuh nuan selalu berasai stress tauka tetekan, tu ulih ngenataika penanggul ba fizikal, emosi, enggau mental. Perangai nuan nyengkaum chara nuan ngelayan orang bukai engka berubah. Orang ke kelalu lama ngasaika stress, kesuah iya senang agi ngereja ulah ti enda manah. Ngambika chunto, mabuk, makai dadah, nginsap, enggau mayuh agi ke bukai. Stress ke baka tu ulih ngujungka kemurungan, kelesuan (burnout), sereta bisi pengingin deka munuh diri.

Kesan stress ngagai tiap iku orang bebida. Stress mega ulih ngenataika mayuh macham penyakit lalu ngachau nyauka tiap iti begian tubuh.