Tanya ari Pemacha

Ketegal Bup Kudus nadai nyebut nyaguka gelas, nama kebuah Saksi-Saksi Jehovah enda ngereja tu?

Pengawa nyaguka gelas lebuh ngirup wain (tauka ai bisa ke bukai) siti pengawa ke udah teleba digaga ba mayuh menua bukai. Ba sekeda endur, orang ngangkat lalu nyatupka gelas sida enggau gelas orang bukai. Udah nya, sida engka ngucap, “Arapka panjai umur” tauka “Arapka nuan lantang belama” enggau mayuh agi ucapan ke bukai. Orang bukai ke ba pengerami nya mega sama ngangkatka gelas lalu ngirup. Ba mayuh orang, pengawa tu enda bahaya laban nunjukka tanda basa, tang Saksi-Saksi Jehovah bisi kebuah ti manah enda enggau pengawa nyaguka gelas.

Ke bendar iya, semua orang nyengkaum Saksi-Saksi Jehovah dekaka orang bukai idup lantang sereta ngembuan pengerai ti manah. Raban ti ngiring ba abad keterubah mega ngujungka surat sida enggau ucapan, “Ngarapka semua kita seruran gerai.” (Surat Kereja Rasul 15:29) Kelimpah ari nya, penyembah Petara mega kala ngucap, “Awakka Tuan Raja aku idup belama iya!”—1 Raja 1:31; Nehemiah 2:3.

Tang, Saksi-Saksi Jehovah bisi kebuah ti penting ari nyeliahka diri ba pengawa nyaguka gelas. Tu bisi kaul enggau asal penatai adat tu. Menara Jaga kena 1 Januari 1968 ngambi jaku ari Encyclopædia Britannica (1910), Jilid 10, lambar 121 ke madahka, “Adat ngirup lalu ngucap selamat ngambi orang bulih pengerai ti manah, engka datai ari pengarap agama orang dulu kelia, tauka pengerami orang mati. Maya sida makai, orang Gerika enggau orang Rome nuangka ai ngagai petara aki ini sida. Lalu, ba pengerami nya sida deka ngucapka selamat ngagai petara aki ini sida enggau orang ke udah mati.” Penerang nya mega nambah, “Adat ngirup enggau ngucap selamat amat bisi kaul enggau pengarap orang dulu kelia.”

Pia mega, bup International Handbook on Alcohol and Culture ke dikeluarka kena 1995 madahka, “[Pengawa ngirup enggau ngucap selamat] engka datai ari pengerami pengarap pelesu dulu kelia. Lebuh pengerami nya, orang deka meri piring darah tauka wain ngagai petara sida ngambika sida bulih utai ke dipinta. Udah nya, sida deka ngucap “Arapka panjai umur” tauka “Arapka nuan gayu guru.”

Enti pia, kati semua utai, pengawa, chura, tauka ukir, ke ngembuan adat asal pengarap pelesu dulu kelia enda tau dikena orang Kristian ti bendar. Ukai semua baka nya. Siti ari chunto iya, buah delima. Nitihka encyclopedia Bup Kudus, “Buah delima mega dikena nyadika tanda ti tuchi ba pengarap kapir.” Taja pia, Petara ngasuh chura buah delima dikena ngias pekayan imam besai, enggau tiang temaga ba rumah sembiang. (Pemansut 28:33; 2 Raja 25:17) Siti agi utai ke ngembuan adat asal ba agama, iya nya tinchin kawin. Tang kemayaharitu mayuh orang ngumbai, tinchin kawin nya nyadi tanda ke nunjukka sesiku orang udah bisi orang ngempu.

Perundingka mega pengawa ngirup wain ba pengerami agama. Chunto iya, orang Sekem ke nyembah Baal, “Mansang ngagai rumah sembiang petara sida, alai sida ke makai ngirup, lalu ngeleseka Abimelek.” (Pengulu 9:22-28) Nembiak Petara ke tetap ati tentu enda ngirup wain ba maya nya laban pengerami nya bisi kaul enggau pengarap pelesu. Enti nembiak Petara ngirup wain lalu nyembah petara ti pelesu, tu nunjukka sida enda tetap ati. Utai tu nyadi ngagai nembiak Petara ke enda setia ba jeman Amos. Dalam Bup Kudus madah, sida “ngirup wain” ba tiap rumah sembiang. (Amos 2:8) Iya ke amat, sida udah ngelaban Jehovah lalu ngemediska ati Iya. (Jeremiah 7:18) Nyadi patut ke enda penyembah Petara meri wain tauka utai irup ke bukai ngagai serega, kena minta berekat ari kuasa ti misteri? Tentu enda! Tang baka ni enggau pengawa ke ngangkatka jari tunga ke serega?

Pengawa ngangkatka jari tunga ke serega enda salah, enti nya ditujuka ngagai Petara ti bendar. Ba jeman kelia Bup Kudus madahka, Solomon bediri ba mua rumah sembiang, lalu ngangkatka kedua-dua lengan iya tunga ke langit sereta besampi. ‘Jehovah Petara ke disembah orang Israel, nadai petara bukai ti baka Nuan, . . . Dingaka kami ari rumah Nuan di serega, lalu ampun meh kami.’ (1 Raja 8:22, 23, 30) Sama mega, ku Esra bejaku, ‘Pujika Jehovah Petara ti pemadu besai! Semua orang mayuh lalu ngangkatka jari sida, lalu nyaut, “Amin! Amin!” Sida besugang lalu nyungkurka diri ke tanah nyembah Petara.’ (Nehemiah 8:6; 1 Timoti 2:8) Petara enda ngutuk pengawa sida laban sida ukai ngangkatka jari ketegal sida minta berekat ari petara nasit.—Isaiah 65:11.

Kemayaharitu, orang ke nyaguka gelas engka ngumbai pengawa sida ukai minta berekat ari petara aki ini. Ke bendar iya, sida pan enda entu nemu kebuah sida nyaguka gelas sida tunga ke serega. Taja pan mayuh orang enda peduli asal penatai sesiti pengawa, tang orang Kristian ti bendar patut bejimat berundingka pekara tu. Kitai enggai nitihka pengawa orang bukai pia aja.

Chunto iya, mayuh orang nabi bendira tauka lambang menua. Sida engka enda sedar, pengawa tu sebagi ari sembah sereta enda nitihka ajar Bup Kudus. (Pemansut 20:4, 5; 1 John 5:21) Taja pia, orang Kristian ti bendar enda nagang orang bukai ari ngereja pengawa tu. Tang kami, tetap enggai nabi bendira tauka lambang menua. Kami tetap ngayanka basa enggau enda ngeleseka orang ke ngereja tu. Sama mega, mayuh orang kemayaharitu enda ngumbai pengawa nyaguka gelas nya bisi bekaul enggau pengerami pengarap pelesu. Tang ketegal pengawa nyaguka gelas tunga ke serega ulih dikumbai minta berekat ari petara pelesu, nya kebuah orang Kristian ti bendar enda besangkut-paut enggau pengawa tu.—Pemansut 23:2.