Nama Kebuah Nyerahka Diri ngagai Jehovah?
Nama Kebuah Nyerahka Diri ngagai Jehovah?
‘Malam tadi siku melikat Jehovah, iya nya Petara ke dipetuaika sereta disembah aku, bisi bediri ngimbai aku.’—SURAT KEREJA RASUL 27:23.
1. Sebedau dibaptisa, nama utai ke udah digaga chalun baptisa, lalu nama tanya ke deka dikerandauka ba artikel tu?
“KATI nuan udah nesal ati ke dosa nuan, nyerahka diri ngagai Jehovah, sereta nerima chara Iya nyelamatka kitai nengah Jesus Kristus?” Tu siti ari saut ngagai dua iti tanya ke patut disaut chalun baptisa ba pengujung cheramah baptisa. Nama kebuah orang Kristian patut nyerahka diri ngagai Jehovah? Nama penguntung nyerahka diri ngagai Petara? Nama kebuah kitai ngumbai, sembah kitai ngagai Petara deka diterima Iya enti kitai nyerahka diri ngagai Iya? Kena nemu saut iya, keterubah kitai patut nemu nama reti nyerahka diri.
2. Nama reti nyerahka diri ngagai Jehovah?
2 Nama reti nyerahka diri? Peratika, baka ni chara rasul Paul nerangka kaul iya enggau Petara? Lebuh rasul Paul ba atas siti kapal, iya madah ngagai orang dia, “Petara ke disembah sereta dipetuaika aku.” (Bacha Surat Kereja Rasul 27:22-24.) Semua orang Kristian ti bendar betuaika Jehovah magang. Tang, “serata dunya di baruh kuasa Sitan.” (1Jo 5:19) Orang Kristian betuaika Jehovah lebuh sida nyerahka diri enggau chara besampi ngagai Petara. Nya baru sida layak dibaptisa.
3. Nama utai ke digambarka baptisa Jesus, lalu baka ni bala murid iya nitihka teladan Iya?
3 Jesus ngayanka teladan ngagai kitai lebuh iya empu milih deka ngereja peneka Petara. Ketegal Jesus ada ari peturun Israel, kenyau ari mit iya endang udah nyerahka diri ngagai Petara. Taja pia, iya tetap nunjukka diri deka ngereja peneka Petara. Nyentukka Jesus madah, “O Petara, aku datai deka ngereja peneka Nuan.” (Heb 10:7; Luk 3:21) Nya alai, baptisa Jesus ngambarka pengeran ati iya deka ngereja peneka apai iya. Murid Jesus nitihka teladan iya lebuh sida mega deka dibaptisa. Tang bebida ari baptisa Jesus, baptisa kitai nunjukka ba mua orang mayuh, kitai udah nyerahka diri ngagai Petara nengah sampi.
Nama Penguntung Nyerahka Diri ngagai Petara?
4. Nama utai ke dipelajarka kitai pasal tanggungjawap nengah kaul ti rapat entara David enggau Jonathan?
4 Nyerahka diri ngagai Petara siti tanggungjawap ti besai. Tu ukai semina janji aja, tang siti pemutus ti pemadu penting ba pengidup kitai. Nyadi, nama penguntung nyerahka diri? Aram kitai meda chunto tanggungjawap dalam kaul ti rapat. Lebuh dua iku orang bisi tanggungjawap ngagai pangan diri, sida deka enggau naka ulih nyaga asai ati sereta berundingka pangan diri. Asil iya, sida ulih nyadi kaban ti rapat. Nya meh kaul ti rapat ke diasaika David enggau Jonathan. Kaul seduai iya amat penting ba seduai iya, nyentukka seduai iya besemaya deka mengkang tetap ati ngagai pangan diri. (Bacha 1 Samuel 17:57; 18:1, 3.) Tanggungjawap ke baka tu amat beguna lalu nulung sida ngembuan kaul ti rapat agi.—Jlam 17:17; 18:24
5. Nama utai ke ulih digaga siku ulun ke tetemuka tuan ti manah?
5 Adat Moses mega ngambarka penguntung tanggungjawap dalam siti da agi kaul. Siku ulun ke tetemuka tuan ti manah, ulih ngaga sempekat ngambika iya ulih nyadi enggi tuan iya belama iya. Tanggungjawap ke baka nya ulih ngasuh ulun nya berasai likun di baruh jaga tuan iya. Nitihka adat Moses, ‘Tang enti ulun nya madahka diri rinduka tuan iya, rinduka bini iya, enggau ke anak iya, lalu enggai dilepaska, tuan iya enda tau enda mai iya ngagai endur alai nyembah Petara. Dia iya deka ngasuh ulun nya bediri ngimbai pintu tauka tiang pintu, lalu nanchum pending iya ngena siti pekekas, lalu iya deka nyadi ulun seumur idup.’—Psut 21:5, 6
6, 7. (a) Nama penguntung tanggungjawap ke bukai? (b) Pasal kaul kitai enggau Jehovah, nama kebuah amat penting alai kitai nyerahka diri?
6 Tikah mega begunaka tanggungjawap ti berat. Enti lelaki enggau indu begulai tang enda kawin, seduai iya nadai tanggungjawap ngagai pangan diri. Tu ngujungka seduai iya enggau bala anak enda berasai likun. Tang, laki bini ke bisi tanggungjawap enda jampat putus asa maya bisi penanggul. Sida ngemeratka tikah laban sida sedar tu tanggungjawap ti berat. Nyadi sida enggau naka ulih ngayanka pengerindu, lalu nitihka prinsip Bup Kudus ngambika tikah sida mujur.—Mat 19:5, 6; 1Ko 13:7, 8; Heb 13:4.
7 Ba jeman Bup Kudus kelia, orang mega bulih penguntung lebuh sida bisi tanggungjawap ba pengawa dagang sereta kereja. (Mat 20:1, 2, 8) Kemayaharitu, kitai mega bisi tanggungjawap tauka ngaga surat perjanjian sebedau ngepunka pengawa dagang tauka nerima kereja. Enti tanggungjawap amat beguna lalu mai asil ti manah dalam kaul ti rapat entara kaban, pia mega ba tikah sereta kereja, enda ibuh sebut meh kaul kitai enggau Petara. Enda ke tu nunjukka pemesai guna nyerahka diri ngagai Jehovah? Diatu, aram kitai berandau penguntung ke diulih bansa Israel ke nyerahka diri ngagai Petara.
Orang Israel Bulih Penguntung ari Nyerahka Diri ngagai Jehovah
8. Nama kaul entara bansa Israel enggau Jehovah pengudah sida nyerahka diri ngagai Iya?
8 Lebuh ba bukit Sinai, Jehovah bejaku ngagai bansa Israel, ‘Enti kita deka ngasika Aku, lalu nitihka sempekat Aku, kita deka nyadi nembiak Aku. Semua orang Israel lalu nyaut sama sereta. Ku sida, “Kami deka ngereja semua utai ti udah disebut Jehovah.”’ (Psut 19:4-8) Semaya sida tu nunjukka sida udah nyerahka diri ngagai Petara Jehovah. Ketegal tu sida enggi Jehovah, lalu Jehovah ngumbai sida ‘bansa ke dipilih Iya.’
9. Nama penguntung ke diulih bansa Israel pengudah nyerahka diri ngagai Petara?
9 Bansa Israel bulih mayuh berekat pengudah sida nyadi enggi Jehovah. Jehovah enda kala ninggalka sida baka apai indai ti pengasih ke nyaga anak sida. Ku Jehovah bejaku ngagai bansa Israel, “Kati indu enda ingatka anak diri lalu enda rinduka anak ke diadaka iya empu? Enti sema indai enda ingatka anak diri, Aku deka seruran ingatka kita.” (Isa 49:15) Jehovah mega ngiring sida nengah adat Iya, meransang sida nengah nabi Iya, sereta nyaga sida nengah melikat Iya. Bup Kudus madahka, ‘Iya meri pesan ngagai [Jakop] atur enggau adat Iya ngagai orang Israel. Iya nadai kala ngereja utai nya ke semua bansa bukai.’ (Ms 147:19, 20; bacha Masmur 34:7, 19; 48:14.) Enti Jehovah nyaga nembiak Iya ti suba, Iya mega deka ngereja utai ti sama kemayaharitu.
Nama Kebuah Kitai Patut Nyerahka Diri ngagai Petara
10, 11. Nama kebuah kitai enda ulih dikumbai sebagi ari ruang bilik Petara kenyau ari ada?
10 Sekeda orang engka nanya, “Nama kebuah aku patut nyerahka diri ngagai Petara?” Kitai patut ngereja tu ngambika ulih nyadi sebagi ari ruang bilik Jehovah. Tang tanya iya, “nama kebuah kitai enda ulih dikumbai sebagi ari ruang bilik Petara kenyau ari ada?” Tu bisi kaul enggau ulah Adam sereta Awa.—Ro 3:23; 5:12.
11 Pengudah Adam enggau Awa ngelaban Petara lalu bedosa, sida enda ulih meri pengidup ti sempurna ngagai peturun sida. (1Ti 6:19) Tu ngujungka, semua kitai jauh ari Petara sereta enda dikumbai anak Iya.—Bandingka Ulang Adat 32:5.
12. (a) Baka ni mensia ti enda sempurna ulih nyadi sebagi ari ruang bilik Petara? (b) Nama utai ke patut digaga kitai sebedau dibaptisa?
12 Kitai ulih minta Petara nerima kitai nyadi sebagi ari ruang bilik Iya. a Baka ni chara iya? Ku rasul Paul madah, “Suba kitai nyadi munsuh Petara, tang kitai udah bebaik enggau Iya, ketegal pemati Anak Iya.” (Ro 5:10) Kelimpah ari nya, kitai mega patut ngereja utai ti penting. Chunto iya, kitai patut ngelala Petara, pechaya ngagai Iya, nesal ati sereta ngubah chara pengidup kitai. (Jhn 17:3; SKR 3:19; Heb 11:6) Pengudah nya baru kitai ulih dibaptisa. Maya dibaptisa kitai minta Petara meri kitai ati ti beresi. (1Pe 3:21) Tang bisi siti da agi pengawa ti penting ke patut digaga kitai sebedau nyadi sebagi ari ruang bilik Petara. Nama pengawa nya?
13. Padahka siti chunto ke nunjukka kebuah kitai patut besemaya ngagai Jehovah sebedau nyadi sebagi ari ruang bilik Iya.
13 Kitai patut bebendar besemaya ngagai Jehovah ngambika kitai ulih nyadi sebagi ari ruang bilik Iya. Aram kitai meda siti chunto ke ulih nulung kitai faham agi pasal utai tu. Gambarka, siku apai ti manah deka ngambu siku nembiak nyadi anak iya. Sebedau nerima nembiak nya nyadi sebagi ari ruang bilik iya, iya dekaka nembiak nya besemaya bebasa sereta sayauka iya. Pengudah nembiak nya besemaya nya baru iya deka diterima ba ruang bilik nya. Sama mega, ngambika kitai diterima ba dalam ruang bilik Jehovah, kitai patut nyerahka diri sereta besemaya deka nyembah Iya aja. Bup Kudus madahka, ‘Serahka tubuh kita nyadi pemeri ti idup, ke kudus, sereta ke diterima Petara.’—Ro 12:1
Nyerahka Diri Tanda Pengerindu sereta Pengarap
14. Nama kebuah kitai ngumbai pengawa nyerahka diri nya nunjukka pengerindu kitai ngagai Petara?
14 Lebuh kitai nyerahka diri ngagai Jehovah, kitai nunjukka diri rinduka Iya enggau dalam. Tu sama baka sempekat ke digaga ba tikah. Ba pengerami tikah, pengantin lelaki nunjukka pengerindu Iya enggau besemaya deka tetap ati ngagai bini iya. Enti nadai sempekat nya, iya enda ulih ngasaika peluang ti istimewa ba entara laki bini. Sama mega, kitai enda ulih ngasaika semua penguntung nyadi sebagi ari ruang bilik Jehovah, enti kitai enda dulu besemaya ngagai Iya. Lebuh kitai besemaya deka nyerahka diri, tu nunjukka kitai deka nyadi enggi Jehovah lalu mengkang tetap ati ngagai Iya.—Mat 22:37.
15. Baka ni semaya deka nyerahka diri nunjukka pengarap kitai ngagai Petara?
15 Lebuh kitai deka nyerahka diri ngagai Petara, tu nunjukka kitai bisi pengarap ngagai Iya. Kitai pechaya, kaul ti rapat enggau Petara ulih mai mayuh penguntung. (Ms 73:28) Amat, enda senang kitai deka nyembah Petara laban kitai idup “enggau orang ke jai ba rebak tu.” Tang kitai andalka semaya Jehovah ke deka nyukung kitai. (Plp 2:15; 4:13) Kitai mega andalka Jehovah deka ngayanka pengasih ngagai kitai lebuh kitai ngereja penyalah. (Bacha Masmur 103:13, 14; Rome 7:21-25.) Kelimpah ari nya, kitai andalka Jehovah deka merekatka penetap ati kitai.—Jop 27:5.
Bulih Pengelantang ari Nyerahka Diri
16, 17. Nama kebuah nyerahka diri ngagai Petara ulih mai pengelantang?
16 Lebuh kitai nyerahka diri ngagai Petara, kitai berasai lantang laban kitai enggau pengabis ati nyerahka semua pengidup kitai ngagai Iya. Tu sejalai enggau utai ke dipadah Jesus, “Orang ke meri deka gaga agi ati ari orang ke nerima.” (SKR 20:35) Maya Jesus ba bumi, iya mega berasai lantang, laban iya selalu meri ngagai orang bukai. Iya sanggup ngena awak belelak sereta penyenang ba pengidup ngambika ulih nulung orang bukai. (Jhn 4:34) Jesus madahka, “Aku seruran ngereja utai ke ngelantangka ati [Petara].” (Jhn 8:29) Amat, pengaga ati Jesus nya ngelantangka ati Jehovah.—Jlam 27:11.
17 Jesus mega deka murid iya ngasaika pengidup ti bisi reti. Nya kebuah iya madahka sida, “Barang sapa deka nitihka aku, awakka iya nulak pengingin diri empu.” (Mat 16:24) Lebuh kitai nitihka lalau Jesus, kitai ulih semak ngagai Jehovah. Kitai tentu bulih pengelantang laban kitai ba baruh jaga Petara.
18. Nama kebuah kitai ulih gaga ati lebuh kitai ngamatka semaya nyerahka diri?
18 Mayuh orang kemayaharitu ngena pengidup sida ngiga pengaya. Tang sida enda ulih tetemuka pengelantang ti bendar sereta ati ti puas. (Mat 6:24) Ketegal kitai “gawa begulai enggau Petara,” kitai bulih pengaga ati belama iya. Kitai nemu, Jehovah amat beterima kasihka pengawa ke udah digaga kitai. Nadai pengawa bukai ke ulih ngasuh kitai puas baka tu. Taja pan kitai bisi tatak ketegal umur majak tuai, tang Jehovah besemaya deka ngasuh kitai nyadi biak baru. Kitai andal, Iya deka merekatka semua nembiak Iya ke tetap ati belama iya.—Jop 33:25; bacha Hebrew 6:10.
19. Nama utai ke deka diasaika orang ke nyerahka diri ngagai Jehovah?
19 Pengudah nyerahka diri ngagai Jehovah, kitai ulih ngasaika kaul ti rapat enggau Iya. Bup Kudus madah, “Semak meh ngagai Petara, lalu Iya pan deka semak ngagai kita.” (Jas 4:8; Ms 25:14) Ba artikel ke nangkanka tu, kitai deka meda kebuah kitai enda patut kakang, lebuh kitai milih nyerahka diri ngagai Jehovah lalu nyadi enggi Iya.
[Nota kaki]
a “Bedus bukai” semina ulih nyadi anak Petara ba ujung seribu taun. Tang ketegal sida udah nyerahka diri ngagai Petara, sida ulih ngangauka Petara “Apai” sida, lalu nyadi sebagi ari ruang bilik Iya.—Jhn 10:16; Isa 64:8; Mat 6:9; Pem 20:5.
Nama Saut Nuan?
• Nama reti nyerahka diri ngagai Jehovah?
• Nama penguntung iya nyerahka diri?
• Nama kebuah orang Kristian patut nyerahka diri ngagai Jehovah?
[Tanya Dipelajarka]
[Gambar]
Lebuh kitai nyerahka diri ngagai Petara, kitai berasai lantang