JESUS ngajar mayuh utai pasal sampi. Maya jeman nya, tuai pengarap orang Judah rindu besampi “ba sukut jalai raya.” Nama kebuah? Laban sida “minta diri dipeda orang.” Sida deka orang muji sida. Kelimpah ari nya, sida suah ngulang sampi ti sama laban sida ngumbai Petara deka ningaka sida enti “sampi sida panjai.” (Matthew 6:5-8) Tang, Jesus madah ulah sida nadai reti. Iya ngajar bala murid chara ti betul kena besampi lalu nama utai ke enda patut digaga.

Jesus madah kitai patut besampi pasal pengudus nama Petara, penatai Perintah Iya, sereta ngambika peneka Iya nyadi. Kitai mega ulih besampi pasal utai ke diguna kitai. (Matthew 6:9-13; Luke 11:2-4) Ba sempama Jesus, iya madahka, kitai patut besampi enggau baruh ati, bisi pengarap, sereta bebendar. Nya baru Petara deka ningaka sampi kitai. (Luke 11:5-13; 18:1-14) Jesus empu mega netapka teladan ti manah bekaul enggau sampi.—Matthew 14:23; Mark 1:35.

Ajar Jesus tentu udah nulung bala murid iya ngemansangka sampi sida. Ba malam ti penudi Jesus ba dunya, iya udah ngajar sida utai ti amat beguna bekaul enggau sampi.

Ba malam ti penudi Jesus ba dunya, iya meri bala murid iya jaku peransang. Iya mega ngajar sida utai ti amat beguna. Ku Jesus: “Aku tu meh jalai, pemendar, enggau pengidup. Nadai orang ulih datai ngagai Apai enti enda nengah aku.” Udah nya, iya besemaya: “Aku deka ngereja sebarang utai ti dipinta kita dalam nama aku, ngambika Apai dimuliaka dalam Anak. Enti kita minta sebarang utai dalam nama aku, aku deka ngereja nya.” Iya nambah: “Nyentuk ngagai diatu, kita nadai udah minta utai dalam nama aku. Pinta lalu kita deka nerima, ngambika ati kita chukup gaga.”—John 14:6, 13, 14; 16:24.

Jaku Jesus amat besai reti. Nitihka siti pansik, tu meh “ubah ti besai bekaul enggau sampi.” Jesus nadai madah sampi nya patut dituju ngagai iya, tang iya buka jalai ti baru ngambika kitai ulih semak ngagai Petara Jehovah.

Kebendar iya, Petara ninga sampi nembiak Iya ti tetap ati kenyau ari kelia. (1 Samuel 1:9-19; Masmur 65:2) Tang ba maya nya, orang ke deka sampi sida didinga Petara patut ngaku, bansa Israel nya bansa ke dipilih Iya. Pia mega, ba jeman Solomon, sida patut ngaku rumah Petara nya endur alai meri pemeri. (Ulang Adat 9:29; 2 Bansa Israel 6:32, 33) Tang atur tu semina enda lama aja. Rasul Paul nulis, Adat Moses enggau pemeri ba rumah Petara nya “ayuk utai ti badas ti deka datai, ukai utai nya empu.” (Hebrew 10:1, 2) Lebuh utai nya udah datai, ayuk nya enda agi dikena. (Kolosi 2:17) Nya alai, kenyau ari taun 33 M., kaul seseiku orang enggau Petara bepanggai sekalika sida ngasika Jesus, ukai ba Adat Moses.—John 15:14-16; Galatia 3:24, 25.

Jesus madah, iya meh jalai ke ngasuh kitai semak sereta ulih besampi ngagai Petara Jehovah. Nama kebuah Jesus ulih nyadi jalai nya?

Tu ketegal iya udah nyerahka nyawa ke sempurna nyadika tebus kitai. (Rome 5:12, 18, 19) Enti nadai Jesus nyadika tebus, kitai enda ulih bisi kaul enggau Petara kitai ti tuchi, laban kitai enda ulih muai dosa diri empu. (Rome 3:20, 24; Hebrew 1:3, 4) Tang diatu, kitai ulih nyadi beresi ba mata Petara. Nya alai, kitai ulih bejaku enggau berani ngagai iya, enti kitai arapka Jesus sereta besampi ngena nama iya.—Epesus 3:11, 12.

Lebuh kitai besampi ngena nama Jesus, kitai ngayanka pengarap ngagai tiga tanggung pengawa iya ke ngamatka tuju Petara: (1) Kitai ngaku iya ‘Anak Domba Petara’ lalu tebus iya ngasuh dosa kitai ulih diampun. (2) Jehovah udah ngangkatka iya idup baru. Ketegal iya “imam besai”, iya ngena rega tebus iya merekatka mensia. (3) Semina Jesus aja “jalai kitai” ulih semak ngagai Jehovah nengah sampi.—John 1:29; 14:6; Hebrew 4:14, 15.

Sampi ke disebut nengah nama Jesus mega nunjukka kitai bebasaka iya. Tu amat beguna laban Jehovah madahka: ‘Lebuh nama Jesus disebut, semua utai di serega, di dunya enggau di dunya ti di baruh, besugang magang, lalu semua dilah deka ngaku Jesus nya Tuan, ke mulia Petara ti Apai.’ (Pilipi 2:10, 11) Kelimpah ari nya, sampi nengah nama Jesus nunjukka kitai bebasaka Jehovah, laban Jehovah meh ke nganjung anak Iya kena nyelamatka kitai.—John 3:16.

Kena nulung kitai beratika pemesai penuduk Jesus, kitai ulih beratika nama enggau gelar ke dikena Bup Kudus ngambarka iya. Enggau meretika tanggung pengawa ke udah, benung, sereta deka digaga Jesus, kitai deka mereti agi berekat ke dibai iya. (Peda kutak “ Tanggung Pengawa Jesus”.) Endang amat, Jesus udah diberi “nama ti ari atas semua nama.” * Semua kuasa ba serega enggau ba dunya udah diberi ngagai iya.—Pilipi 2:9; Matthew 28:18.

Kitai nemu, sampi kitai patut ngena nama Jesus, ngambika Jehovah ninga. (John 14:13, 14) Tang anang semina nyebut “dalam nama Jesus” aja. Nama kebuah kitai enda patut berunding baka nya?

Perundingka chunto tu. Lebuh nuan nerima surat ari seiti kompeni, nuan meda leka jaku “datai ari” ke ditulis ba ujung surat nya. Kati nuan ngasaika leka jaku nya datai ari ati penulis nya? Nuan engka sedar leka jaku nya semina patut ditulis ba surat nya, lalu ukai datai ari ati iya. Baka nya mega, kitai enda patut ngumbai leka jaku “dalam nama Jesus” semina penutup sampi kitai. Kitai deka ingat reti nama Jesus lalu besampi “enggau pengabis ati.”—Masmur 119:145; 1 Tesalonika 5:17.

Kitai ulih ngereja tu enggau belematika kualiti manah Jesus. Kelimpah ari nya, perundingka utai ti udah sereta deka dikereja iya ke nuan. Lebuh besampi sebut meh terima kasih ngagai Jehovah lalu beri puji ngagai Iya laban udah meri anak Iya tanggung pengawa ti spesial. Enggau ngereja nya, nuan ulih andalka semaya Jesus ke madah: “Enti kita minta sebarang utai ari Apai dalam nama aku, Iya deka meri utai nya ngagai kita.”—John 16:23.