Mayuh orang ngumbai ajar Triniti nya, “ajar Kristian ti pemadu penting.” Nitihka ajar tu, Apai, Anak, sereta Roh Kudus nya tiga iku orang ke nyadi siku Petara. Tuai pengarap Roman Katolik ke benama John O’Connor madahka tu pasal Triniti: “Ajar tu amat misteri lalu enda ulih difaham.” Nama kebuah ajar Triniti tu tusah difaham?

The Illustrated Bible Dictionary (siti kamus Bup Kudus) meri siti kebuah. Kamus tu nerangka pasal Triniti: “Ajar tu ukai ajar Bup Kudus, laban nadai ayat Bup Kudus ke nerangka pasal Triniti.” Ketegal ajar Triniti “ukai ajar Bup Kudus,” orang ke pechayaka ajar Triniti bebendar ngiga ayat ke nyukung ajar tu. Indah sida sanggup mutarbelitka ayat Bup Kudus.

Siti ari ayat ke suah salah dikena iya nya ba John 1:1. Dalam Bup Kudus Baru, ayat tu madahka: “Ba pun iya kelia, Jaku endang udah bisi. Jaku nya enggau Allah Taala [jaku Gerika, ton the·onʹ], lalu Jaku nya endang Allah Taala [the·osʹ].” Ayat tu dua kali madahka pasal leka jaku the·osʹ (Allah Taala tauka petara) dalam jaku Gerika enggau chara ti bebida. Dalam jaku Gerika, leka jaku ton ditepu sebedau leka jaku the·onʹ (Petara) kena nunjukka siku Petara aja ke ngena gelar tu. Lalu ton the·onʹ ba ayat tu dituju ngagai Petara ti Pemadu Bekuasa. Tang ba kali kedua leka jaku petara ayan ba ayat tu, the·osʹ nya gelar ti ulih dikena lebih ari siku orang, laban nadai ton ke ditepu dia. Kati penulis Bup Kudus enda ingat nepu leka jaku ton ba kali kedua tu?

Bup Injil John ditulis dalam jaku Koine, iya nya jaku Gerika ke dikena orang besehari-hari maya jeman nya. Bansa jaku tu amat nyemetak nentuka chara leka jaku ton enggau ho dikena. Enti ton tauka ho nya ditepu ba depan kedua-dua subjek ba sesiti ayat, subjek nya ulih dikumbai sama. Peratika siti chunto ba Matthew 13:38 ke madah: “Ladang gandum [jaku Gerika, ho a·grosʹ] nya, dunya [jaku Gerika, ho koʹsmos] tu.” Pakar Bup Kudus A.T. Robertson nerangka, dalam sempama Jesus tu, Jesus madahka dunya tu endang ladang gandum, lalu ladang gandum tu, endang dunya tu. Tu ketegal leka jaku ho bisi ditepu ba depan kedua-dua leka jaku nya.

Tang baka ni enggau John 1:1? Ayat tu bisi dua kali madah leka jaku petara, tang semina leka jaku petara keterubah aja bisi ton. Siku pakar ke benama James Allen Hewett madah pasal ayat tu: “[Dua iku petara] ke disebut ba ayat tu enda sama enggau enda sama penuduk.”

Hewett ngena 1 John 1:5 nyadika chunto. Ayat nya madah: “Petara nya penampak.” Dalam jaku Gerika, “Petara” nya ho the·osʹ, lalu bisi leka jaku ho ba dia. Tang “penampak” nya phos, lalu nadai leka jaku ho ba dia. Hewett nerangka: “Kitai ulih madah . . . Petara nya baka penampak, tang kitai enda ulih madah penampak nya Petara.” Bisi chunto bukai ba 1 John 4:16. Ayat tu madah: “Petara nya pengerindu.” Ba ayat tu “Petara” bisi leka jaku ho, tang ‘pengerindu’ nadai leka jaku ho. Nyadi, ketegal tu, kitai enda ulih nyebut “pengerindu nya Petara.”

Mayuh pakar jaku Gerika enggau penyalin Bup Kudus besetuju John 1:1 ukai nerangka identiti “Jaku” nya, tang gaya “Jaku” nya. Ku siku penyalin Bup Kudus ke benama William Barclay: “Laban [rasul John] nadai nepu ho tauka ton ba leka jaku theos nyadi leka jaku theos dikena iya nerangka gaya [Jaku nya] . . . John nadai ngumbai Jaku enggau Petara nya sama. Pandakka jaku, iya nadai madah Jesus nya Petara.” Pakar Bup Kudus Jason David BeDuhn mega madahka: “Dalam jaku Gerika, enti ho enda ditepu sebedau theos, baka ba ujung ayat John 1:1, sida ke macha deka nyimpulka ayat tu madah pasal ‘siku petara.’ . . . Tu bebida ari leka jaku ho theos, baka ‘siku petara’ bebida ari ‘Petara.’” Ku iya nampung baru: “Ba John 1:1, ‘Jaku’ nya ukai Petara ti bendar, tang iya ulih dikumbai siku petara, tauka baka Petara.” Siku pakar ke benama Joseph Henry Thayer, ke nyalin Bup Kudus American Standard Version madah: “Gaya ‘Jaku’ nya baka Petara, tang iya ukai Petara.”

Kati identiti Petara tu “amat misteri”? Nya ukai misteri ba Jesus. Ba sampi Jesus ngagai Apai iya, Jesus enggau terang madahka iya enggau Apai iya bebida. Ku iya: “Enti orang ngelala Nuan, siku aja Petara ti bendar, sereta ngelala Jesus Kristus ke dikirumka Nuan, sida deka bulih pengidup ti meruan belama iya.” (John 17:3) Enti kitai arapka Jesus sereta faham ajar ti terang ba Bup Kudus, kitai deka bebasaka iya laban kitai nemu iya endang Anak Petara. Kitai mega deka nyembah Jehovah, “siku aja Petara ti bendar.”