BEJUTA iku orang Kristian milih enda ngintu Hari Krismas. Nama runding sida pasal pemutus ke digaga sida? Kati sida berasai puang? Kati anak sida berasai tusah ati ketegal enda nyambut Hari Krismas? Peratika nama dipadah Saksi-Saksi Jehovah ba serata dunya pasal pekara tu.

Berunding pasal Jesus Kristus: “Indah sebedau aku nyadi Saksi-Saksi Jehovah pan aku jarang ngagai gerija. Enti aku ngagai gerija pan, mina ba maya Hari Krismas tauka Easter. Indah ba maya nya, aku nadai berunding pasal Jesus Kristus. Diatu, aku nadai agi ngintu Krismas, tang dua kali seminggu aku datai ngagai gempuru Kristian, lalu ngajar orang bukai ajar Bup Kudus pasal Jesus Kristus!”—EVE, AUSTRALIA.

Gaga ati meri hadiah: “Aku berasai gagit lebuh orang meri aku hadiah, kelebih agi lebuh aku enda nyangka nya. Aku amat rinduka surprise! Aku mega rindu ngaga kad sereta ngelukis gambar ke orang bukai, laban nya ukai semina ngasuh sida gaga, tang pia mega ngasuh aku empu gaga.”—REUBEN, IRELAND UTARA.

Nulung orang bukai: “Kami rindu manduk pemakai ke orang ke sakit. Kekadang kami mai bungai, kuih tauka hadiah ti mit kena ngagaka ati sida. Kami rindu ngereja tu laban kami ulih ngabas orang bukai ba sebarang maya.”—EMILY, AUSTRALIA.

Begulai enggau diri sebilik: “Lebuh kami sebilik begumpul begulai, anak kami bisi peluang ngelala bala aya, bala ibu, aki ini, sereta bala betunggal sida. Ketegal kitai ukai semina ngereja tu ba maya pengerami, kitai enda berumban, lalu diri sebilik nemu kitai ngabas sida laban kitai rinduka sida.”—WENDY, PULAU CAYMAN BESAI.

Bulih pengelantang: “Maya Krismas, ketegal mayuh pengawa ke patut digaga, mayuh orang ngasaika tusah deka bulih pengelantang. Ketegal aku udah belajar, aku nemu semaya Bup Kudus ngagai mensia. Tu meh ngasuh aku lantang. Aku andal, anak aku tentu deka bulih pengidup ti menyana dudi hari.”—SANDRA, SEPANYOL.