PILAY SI LUZIA. Ta kabbinna, nattaki yayya tu polio, makeyali nga taki nga umatake ta nervous system na baggi. Turi ta 16 yayya, kinagi na amo ni Luzia nisa, “Pinattaki ka na Dios, matagga gare i ulum anna maloku ka ta yenam.” Pappasa na piga ragun, manono lagapa ni Luzia i daddam nga natagenona.

TURI TA NAMMUAN NI DAMARIS NGA EGGA CANCER NA UTONA, niyavu na yamana sa: “Anni kari kingnguam? Egga siguru nakuam nga kitaddake. Panentensia yatun na Dios.” Talaga natakitan si Damaris ta kinagi na yamana.

Nabayag ngana nga kuru-kurugan na totolay nga panentensia na Dios i taki. Kagian na libru nga Manners and Customs of Bible Lands nga aru ta tiempo ni Cristo i nangurug nga “i taki ay megafu ta liwa na mataki nga tolay, onu na parientesna, anna sentensia i taki megafu ta liwa.” Kagian na Medieval Medicine and the Plague nga ta Middle Ages, “kurugan na karuan nga totolay nga nangirattal tu epidemia i Dios tapenu sentensian ira ta liwi-liwada.” Yatun tu turi ta minillion i natay ta interu Europa megafu ta epidemia ta meka-14 siglo, pangukum kari yatun na Dios ta marake nga totolay? Onu infeksion laman yatun megafu ta bacteria, kagitta na nadiskubre na researcher ira ta medisina? Nonopan na karuan, usan kari talaga na Dios i taki tapenu parigatan i totolay megafu ta liwi-liwada? *

PANNONOPAN: Ngatta gafu inuru ni Jesus i mataki ira nu mepangngo laman nga sentensia na Dios i taki anna pazziga-riga? Ari kari tu pangontra yatun ta kinahustisia anna kinatunung na Dios? (Mateo 4:23, 24) Ari vuluvuga kontran ni Jesus i kukukuan na Dios. Kunna: “Kuak-ku nga kanayun i makapagayaya sa” anna, “kuak-ku ngamin i ipakua na Yama.”​—Juan 8:29; 14:31.

Manawag i kagian na Biblia. “Ari vuluvuga mangipasingan tu kawan tu hustisia” si Jehova nga Dios. (Deuteronomio 32:4) Angngariganna, ari vuluvuga nga Dios i kegafuan na kadaral na eroplano, nga mamatay ta minagatu nga inosente nga totolay, megafu ta kayàna sentensian i tadday nga nakatakay! Mekunnay ta kinatunung na Dios, kinagi ni Abraham, matalo nga aripanna, nga i Dios arianna vuluvuga ‘daralan i matunung kavulu na marake.’ “Arayyu nga mesimmu” yatun, kunna. (Genesis 18:23, 25) Kagian paga na Biblia nga “ari magangngua tu kinamarake i Dios”; ari yayya “magangngua tu ari fustu.”​—Job 34:10-12.

Ari tu panentensia na Dios i pazziga-riga tam megafu ta espesipiko nga liwa. Manawag i kinagi mismu ni Jesus meyannung taw turi ta nakasingan ira na disipulosna tu lalaki nga vuling namegafu ta nikeyanana. “Niyavu sa na disipulo na ira, ‘Mestru, sinni i nattagaruli nga gafu na nikeyana tu vuling naw nga tolay? Yaya onu i magana na?’ Simibbag si Jesus, ‘Ari tu megafu ta katagarulian na onu katagarulian na magana na, ngem neyana yaya tu vuling tapenu mepasingan i pakapangngua na Dios.’”​—Juan 9:1-3.

Megafu ta mali nga pagabbo, posible nga nasorpresa i disipulos ni Jesus ta pakkagina nira nga ari tu megafu ta liwa na lalaki onu na maganana i marake nga nesimmu sa. Ari laman nga pinammapia  ni Jesus i vuling nga lalaki, netunungna paga i ugo nga pangurug nga panentensia na Dios i pazziga-riga. (Juan 9:6, 7) I totolay nga mazziga-riga ta grabe nga takida sangawe ay mabanna-bannayan ta pakannammu nga ari naggafu ta Dios yatun.

Ipasiguradu nittam na Biblia

• “I Dios ay ari nga matenta ta marakay anna ari yaya nga manenta.” (SANTIAGO 1:13) I kurug, aranni ngana mapawan i “marakay” ira nga gannug nga mamazziga ta totolay ta aru nga siglo, nelagum i taki, daddam, anna patay.

• “Pinammapia [ni Jesu-Cristo] gapa ngamin i makkataki.” (MATEO 8:16) Ta panguruna ta ngamin nga minay sa, nipasingan na Ana na Dios i ituppal noka na Pappatulan na Dios ta interu mundo.

• “Funatan [na Dios] ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.”​—NEPAKANNAMMU 21:3-5.

Ngatta gafu nepallo i daddam anna pazziga-riga na totolay? Nabayag ngana nga nononopan na totolay yatun nga pakkiavu. Nu ari tu Dios i makalliwa, sinni gafu? Matabbag danatun ta tumunug nga artikulo.