PAKKIAVU NA KABATAAN IRA
Kunnasì nga Malillitan i Negatibo nga Appana-panono?
Kunnasim imammatan i baggim?
Sobra nga positibo
“Masaya ngà laman anna relaks kadaggaw. Ngatta ta marraddam ngà?”—Valerie.
Negatibo
“Nu egga makasta nga mesimmu, insigida nga nonopakku nga ari tu kurug yatun anna gitta na egga i mali.”—Rebecca.
Realistiko
“Nu sobra i kapositibò, kanayun ngà madismaya nu ari tu makasta i ganna-gannug, anna nu negatibo ngà gapa, kanayun ngà nga marraddam. Ngem nu realistiko ngà, balanse i paningakku ta ganna-gannug.”—Anna.
Ngatta importante yatun?
Kagian na Biblia nga “kanayun nga maffiesta i tolay nga magayayya i futu na.” (Proverbio 15:15) Mas magayayya gafu danuri totolay nga ibita da i sobra nga pannegatibo anna positibo i paningadda ta pattolay. Mas aru gapa i kokkofudda. Kakurugan na, sinni gapa i maya nga makikavulu ta totolay nga kanayun nga negatibo?
Ngem maski nu sobra i kapositibom, egga lagapa i mariga ira nga situasion nga meparubang niko. Angngarigan na:
Baka puru dumug meyannung ta gerra, terorismo, onu krimen i maginnam.
Baka egga ira i problema ta familiam.
Siguradu nga egga ira i pakkafian nga laba-labanammu.
Baka natakitan naka na tadday nga kofummu.
Imbes nga pagurayammu danatun nga problema onu makkonsimisiokka tatun, realistiko nakuan i pagimamma mu. Makoffun nikaw i pabbalin tu realistiko tapenu malillitammu i sobra nga pannegatibo anna marubammu danatun nga ari tu sobra i pakkafi na nono mu.
Nu anni i makuam
Realistiko nakuan i paningammu ta pakkamaliammu ira.
Kagian na Biblia: “Awan tu matunung nga tolay ta davvun nga kanayun nga magangngua tu mapia anna ari vuluvuga nga makaliwa.” (Eclesiastes 7:20) Tolay ka laman yatutta makkamali ka, ngem ari kayà kagian natun nga awan ngana tu serbim.
Nu kunnasi mabbalin tu realistiko: Kuammu i adde na mawayyam tapenu itunung i nakkamaliammu, ngem daddammammu nga ari ka nga perfekto. “Ariakku maffokus ta nakkamaliakku ira tapenu ari ngà madismaya,” kinagi na kabataan nga si Caleb. “Ngem innakku nu anni i magigiammù tatun tapenu metunukku i nakkamaliakku ira.”
Ariammu ikumpara i baggim ta tanakuan.
Kagian na Biblia: “Mawag tu ari ittam nga mappara-parayag, mangara-aru tu dama, onu makkapassa-passil.” (Galacia 5:26) Nu inninnammu ta social media i letratu ira na okasion nu sitaw ari ka nga nembitan, awayya na nga mattaki i nono mu. Megafu tatun, baka nonopammu nga ari ira nga kurug nga kokkofun.
Nu kunnasi mabbalin tu realistiko: Nonopan nga ari ka nga kanayun nga membitan ta kada okasion. Kakurugan na, ari tu ngamin nga nesimmu ay naka-post ta social media. “Kanayun nga i-post na totolay ta social media danuri laman i pinakamagayayya nga nesimmu ta pattoleda,” kagian na kabataan nga si Alexis. “Ariadda nga i-post yuri i ari kuruga makapagayayya.”
Memammo nakuan i pattratum ta tanakuan—mas ngana ta familiam.
Kagian na Biblia: “Kuan nu ngamin i adde na awayya nu nga makillivu-livu ta memammo ta ngamin nga totolay.” (Roma 12:18) Ariammu nga makontrol i kuan na tanakuan, ngem makontrol mu i reaksiommu. Memammo nakuan i pattratum ta tanakuan.
Nu kunnasi mabbalin tu realistiko: Determinadu ka nakuan nga ari padakallan i problema na familia. Memammo ka nakuan kagitta na pattratum ta kofummu. “Awan tu perfekto anna nu mittan magga matakitattam i tanakuan,” kinagi na kabataan nga si Melinda. “Mawag tam laman nga pilian nu anni i reaksiottam—memammo onu ari.”
Mabbalin tu minappabalo.
Kagian na Biblia: “Mabbala-balo kamu gapa nga kanayun.” (Colosas 3:15) Nu minappabalo ka, mas makapaffokus ka ta makasta ira nga mesissimmu ta pattolem imbes tu ta marake ira nga mesissimmu.
Nu kunnasi mabbalin tu realistiko: Akseptammu nga egga ira i problemam, ngem ariammu nakuan kattaman i makasta ira nga mesissimmu ta pattolem. “Kada aggaw, itura ku ta diary i tadday nga makasta nga nesimmu,” kagian na kabataan nga si Rebecca. “Kayà ku gare nga ipanono ta baggì nga maski aru i problemà, aru lagapa i makasta ira nga gannug nga awayyà nga pannonopan.”
Piliammu tu mapia i kokkofummu.
Kagian na Biblia: “I marakay nga kakavvulu ay makadaral ta mapia nga kata-katolay.” (1 Corinto15:33) Nu kanayummu nga kavulu danuri minakkritika, minadduda, onu minassinti, posible nga mabbalikka tu kunnatun.
Nu kunnasi mabbalin tu realistiko: Makkaproblema i kokkofummu yatutta posible nga mannegatibo ira. Suportammu ira ngem ariammu nakuan pagurayan nga sobra nga mafektakka ta problema da. “Ari nakuan tu kanayun nga danuri negatibo i pakikavulutattam,” kinagi na kabataan nga si Michelle. “Ta Math, nu i-plus mu i dua nga negative nga number, mas dakal nga negative nga number i resulta natun.”
Mabbibbig paga meyannung tatun
Kagian na Biblia nga mattolay ittam ngana ta tiempo na “ziga-riga ta pangurianan ira nga aggaw.” (2 Timoteo 3:1) Marigatakka kari nga mabbalin tu positibo megafu ta karu na problema ta mundo? Bibbigan i “Ngatta Sobra i Ziga-riga?”