‘Ɔwɔicō je ɛjɛ̄ɛ̄jī Ɛlā ku nu tá ipú ɔtū kú ācɛ á.’—2 Utímōti 3:16, Ubáyíbu kú Idɔ̄ma Ā.

Ó gē je ɛnɛɛnɛ ohi ku aɔka nōo cɛgbá nɛ ācɛ gē da lɛyikwu oyeeyi a.—Aíita 2:1-5.

Ó gē mafu ukɔ́ nōo géē ta uwɔ abɔ lā oyeeyi ku ɛ̄cī doodu.—Aíjē kú Ɛ̄gbā 119:105.

Ó gē je eyiyoce okpɔcii ku ɛcɔbu.—Ācɛ Uróm 15:4.

Ii, ohigbu ɛlā ɛta nyā:

• Ɛgɛ nōó cɛtɔha a wɛ ɔdā ohidaago. Eko néē bi le ta Ubáyíbu duudu a wɛ ihayi ula ɛnɛ. Ācɛ ɛyɛɛyɛyi ofu ɛpa nɛ Ɔwɔico bi le ta Ubáyíbu á. Alɛwa ku uwa i jé iyi uwa ŋ. Náana a, ɛjɛɛji ɔkpá néē ta a cɛtɔha klla yɔ i kɛla ekponu!

• Ācɛ nōo ta Ubáyíbu a kɛla ɔkwɛyi. Ācɛ ō ta ɔkpá ɔlamu gē je ɛga nɛ ācɛ ɔlɛ uwa ya bɔbi a tayinu. Amáŋ, ācɛ nōo ta Ubáyíbu a i lɛbɛɛka uwa a ŋ. É ka ɔkwɛyi ɛga nɛ uwa amāŋ éwo ku uwa ya bɔbi a.—2 Úklɔ́ kú Aɔ́cɛ́ 36:15, 16; Aíjē kú Ɛ̄gbā 51:1-4.

• Akacɛ nōo gē ya jila. Ó fiyɛ ihayi ula ce ofu igwo ɛhɔ (700) nɛ Ubáyíbu ka taajɛ ka ɛga néē gáā ma Umɛsayiya a wɛ Ubɛtlɛhɛm, ipɔlɛ nɛ̄ŋcɛ́ éyi ajɛ ku Ujudiya. (Umáyíka 5:2) Ini néē ma Ujisɔsi a? Ɔdiya néē ma ɔ ipɔlɛ ɔɔma piii a?—Umátiyu 2:1-6.

  Ó lɛ aakacɛ alɛwa ɔhá ipu Ubáyíbu nōo ya jila ɛgɛ néē ka ɔ a. Ó wɛ ɛgɔɔma nɛ Ɛlā ku Ɔwɔico cika ō lɛ a ŋ?—2 Upíta 1:21.