Ọtụtụ ndị amaghị ma Chineke ọ̀ dị. Ha anaghịkwa achọ ịma ma ọ̀ dị. Otu nwoke Frans aha ya bụ Hervé kwuru, sị: “Ọ bụ eziokwu na agaghị m asị na amaghị m ma Chineke ọ̀ dị ma ọ bụkwanụ kwuo hoo haa na ọ dịghị, ekweghị m na Chineke. N’uche m, otú ka mma anyị kwesịrị isi na-ebi ndụ bụ ime ihe ọ bụla obi anyị gwara anyị. Ọ baghị uru ikwutewe okwu Chineke.”

Otu onye Amerịka aha ya bụ John kwuru, sị: “Papa m na mama m ekweghị na Chineke. N’ihi ya, mgbe m na-etolite, amaghị m ma Chineke ọ̀ dị. Ma mgbe ụfọdụ, m na-eche ma ọ̀ ga-abụ na Chineke dị.” Ndị ọzọ nwekwara ike ịna-eche ụdị ihe a John na-eche.

È nwetụla mgbe ị jụrụ onwe gị ma Chineke ọ̀ dị nakwa na ọ bụrụ na ọ dị n’eziokwu, ò nwere ihe ọzọ mere o ji kee ụmụ mmadụ? O nwere ike ịbụ na ị chọpụtala na e nwere ihe ụfọdụ a na-agaghị akọwali ma ọ bụrụ na Chineke adịghị. Dị ka ihe atụ, e nwere ihe ndị gosiri na ihe ndị dị ndụ anọkataghị jiri aka ha dịrị. Ihe ndị sayensị chọpụtarala gosiri na ihe ndị dị n’ụwa a na-enyere ihe ndị dị ndụ aka. Ihe a niile gosiri na ọ ga-enwerịrị onye kere ha.—Gụọ igbe isiokwu ya bụ “ Gbalịa Mata nke Bụ́ Eziokwu.”

Ihe a anyị kwuru ugbu a ga-abara anyị ezigbo uru ma anyị chọpụta ihe ndị gosiri na Chineke dị n’eziokwu nakwa ihe ndị bụ́ eziokwu gbasara ya. Ka anyị leba anya n’uru anọ anyị ga-erite.

Ọ bụrụ na e nwere ihe ọzọ mere Chineke ji kee ụmụ mmadụ, anyị kwesịrị ịmata ihe ọ bụ na otú o si gbasa anyị. Ọ bụrụ na Chineke dị n’eziokwu ma anyị amaghị ihe ọ bụla gbasara ya, ọ pụtaranụ na e nwere ihe dị ezigbo mkpa anyị na-amaghị.

Baịbụl kwuru na ọ bụ Chineke kere ihe niile dị ndụ. (Mkpughe 4:11) Ọ bụrụ na anyị eburu ihe a n’obi, olee uru ọ ga-abara anyị? Ka anyị leba anya n’ihe Baịbụl kwuru gbasara ya.

A bịa n’ihe niile Chineke kere n’ụwa, ụmụ mmadụ dị iche. Baịbụl kwuru na Chineke kere anyị ka anyị yie ya, ya bụ, ka anyị na-akpa àgwà ka ya. (Jenesis 1:27) Baịbụl kwukwara na anyị na Chineke nwere ike ịdị ná mma. (Jems 2:23) E nweghị ihe ga-eme ka ndụ anyị nwee isi ma ọ bụrụ na anyị na Onye kere anyị adịghị ná mma.

Olee uru ọ ga-abara anyị ma anyị na Chineke dịrị ná mma? Anyị na Chineke dịrị ná mma, anyị nwere ike ịkọrọ ya mkpa anyị. O kwekwara anyị nkwa na ya ga-ege anyị ntị ma nyere anyị aka. (Abụ Ọma 91:15) Anyị na Chineke dịrị ná mma, anyị ga-ama ihe bụ́ uche ya gbasara ọtụtụ ihe. Anyị mara uche ya, anyị ga-enwe ike ịma ọtụtụ ihe gbasara ndụ anyị.

Ọ na-esiri ụfọdụ ndị ike ikweta na Chineke dị n’ihi ahụhụ juru n’ụwa a. Ha nwere ike ịna-eche na ọ bụrụ na Chineke nwere ike na-enweghị atụ, gịnị mere o ji kwe ka ahụhụ na ihe ọjọọ dịrị?

Baịbụl kwuru na mgbe Chineke kere ụmụ mmadụ, o bughị n’obi ka ha na-ata ahụhụ ma ọ bụ na-anwụ anwụ. Ihe a o kwuru na-akasị anyị obi. (Jenesis 2:7-9, 15-17) Ihe a Baịbụl kwuru ọ̀ bụ ụgha? Mba. Ọ bụrụ na e nwere onye nwere ike na-enweghị atụ nke kere ihe niile, ọ bụrụkwa na ịhụnanya bụ àgwà ya kacha àgwà ya ndị ọzọ, o doro anya na ọ bụ ụdị ndụ a ka ọ ga-achọ ka ụmụ mmadụ na-ebi.

Ma, gịnị mere imi na anya ji dị ụmụ mmadụ otú ọ dị ha taa? Baịbụl kwuru na Chineke kere ụmụ mmadụ otú ha ga na-ekpebi ihe ọ bụla ha chọrọ ime, ọ naghị amanye ha ife ya. Adam na Iv nupụụrụ Chineke isi ma họrọ ime ihe ha chọrọ. (Jenesis 3:1-6, 22-24) Anyị na-atazi ahụhụ ihe ahụ ha mere.

Obi ga-eru anyị ala ma anyị ghọta na mgbe Chineke kere ụmụ mmadụ, o bughị n’obi ka ha na-ata ahụhụ. Ma, anyị niile chọrọ ka ahụhụ anyị na-ata kwụsị. Anyị chọkwara ihe ga-emesi anyị obi ike na ihe ga-emecha dị mma.

Ozugbo Adam na Iv nupụchaara Chineke isi, Chineke kwere nkwa na ya ga-emecha mezuo ihe o bu n’obi kee ụwa. O nweghị ihe ga-egbochi ya ime ya n’ihi na o nwere ike ime ihe ọ bụla ọ chọrọ. (Aịzaya 55:11) N’oge na-adịghị anya, Chineke ga-akwụsị nsogbu niile isi ahụ e nupụụrụ ya kpatara ma mezuo ihe o bu n’obi kee ụwa na ụmụ mmadụ.

Olee uru ọ ga-abara anyị ma Chineke mee ya? Ka anyị tụlee nkwa abụọ n’ime nkwa ndị Chineke kwere na Baịbụl gbasara ọdịnihu.

• AJỌ OMUME GA-AKWỤSỊ, UDO ADỊRỊKWA EBE NIILE. “N’oge na-adịghị anya, onye ajọ omume agakwaghị anọ; ị ga-elekwa anya n’ebe ọ na-anọ, ma ọ gaghị anọ ya. Ma ndị dị umeala n’obi ga-enweta ụwa, ha ga-enwekwa obi ụtọ dị ukwuu n’ihi udo nke zuru ebe niile.”—Abụ Ọma 37:10, 11.

• ỌRỊA NA ỌNWỤ GA-AKWỤSỊ. “Ọ dịghị onye bi na ya nke ga-asị: ‘Ana m arịa ọrịa.’” (Aịzaya 33:24) “Ọ ga-eloda ọnwụ ruo mgbe ebighị ebi, Ọkaakaa Onyenwe anyị Jehova ga-ehichapụkwa anya mmiri n’ihu niile.”—Aịzaya 25:8.

Gịnị mere obi kwesịrị iji sie anyị ike na Chineke ga-emere anyị ihe ndị o kwere anyị ná nkwa? Ọ bụ n’ihi na ọtụtụ amụma ndị dị na Baịbụl emezuola. Nkwa ndị a Chineke kwere anyị ọ̀ pụtara na anyị agaghịzi na-enwe nsogbu ugbu a? Mba. Olee otú Chineke si enyere anyị aka idi nsogbu ndị ahụ?

Chineke na-akụziri anyị ihe ga-enyere anyị aka ịma ihe anyị ga-eme ma nsogbu bịara anyị ma ọ bụ ma anyị nwee mkpebi anyị chọrọ ime. Mgbe ụfọdụ, anyị na-eme mkpebi ndị dị ezigbo mkpa, nweekwa mgbe anyị na-eme ndị nke na-adịchaghị mkpa. Ọ bụ eziokwu na ụmụ mmadụ nwere ike ịgwa anyị ihe ga-enyere anyị aka ná ndụ, ma ọ gaghị abara anyị uru ka ihe Chineke gwara anyị. Chineke ma ihe ndị merela eme nakwa ihe ndị ga-eme n’ọdịnihu. Ọ bụkwa ya kere anyị.

Ihe dị na Baịbụl bụ uche Chineke n’ihi na ọ bụ ya gwara ndị dere ya ihe ha dere. Jehova kwuru na Baịbụl, sị: “Mụ onwe m, Jehova, bụ Chineke gị, Onye na-akụziri gị otú ị ga-esi baara onwe gị uru, Onye na-eme ka i jee ije n’ụzọ i kwesịrị iso.”—Aịzaya 48:17, 18.

Ike Chineke enweghị atụ. Ọ chọkwara iji ya nyere anyị aka n’ihi na ọ bụ nna anyị, hụkwa anyị n’anya. Baịbụl kwuru gbasara ya, sị: ‘Nna unu nke nọ n’eluigwe ga-enye ndị na-arịọ ya mmụọ nsọ.’ (Luk 11:13) Chineke ji mmụọ nsọ ya eduzi anyị ma na-enyere anyị aka.

Gịnị ka anyị ga-eme ka Chineke nyere anyị aka? Baịbụl kwuru, sị: “Onye na-abịaru Chineke nso aghaghị ikwere na ọ dị adị, na ọ bụkwa onye na-akwụ ndị na-achọsi ya ike ụgwọ ọrụ.” (Ndị Hibru 11:6) Ihe ga-enyere anyị aka ikweta na Chineke dị bụ ileba anya n’ihe ndị gosiri na ọ dị n’eziokwu.

Ịmata eziokwu gbasara Chineke na-ewe oge, ma ọ ga-abara gị uru ma ị gbalịa mata onye ọ bụ. Otu nwoke onye Chaịna bi Amerịka kwuru, sị: “Na mbụ, m kweere na e keghị mmadụ eke. N’agbanyeghị na ọ bụ ihe m kweere, ọ gụrụ m agụụ ịmata ihe Baịbụl na-ekwu. N’ihi ya, mụ na Ndịàmà Jehova malitere ịmụ Baịbụl. Ma n’afọ ikpeazụ m na mahadum, ọ bịara na-esiri m ike inwe ohere mụ na ha ga-eji na-amụ Baịbụl. Obi adịghịkwa m mma n’oge ahụ. Mgbe m maliteghachiri ịmụ Baịbụl, m bidoro nwewe obi ụtọ.”

Ị̀ ga-achọ ịmụtakwu gbasara Onye kere anyị bụ́ Jehova Chineke? Ọ ga-adị mma ka i wepụta oge mụọ gbasara ya ka ị mara onye ọ bụ n’eziokwu.