ỊBayịbụụ Kaa Yẹ Ọhịhị Da

Ịịyẹ ọlẹng ọhẹ bwu Scotland à tị́ yẹ kọ jwoo apyobwuna gụ ọhị ọtụka-ọtụka ọlẹ kọ kaa da? Ịyẹ à tị́ da ọlẹng ọhẹ ịị Brazil ụbwọ nyọka hwabwọ la ọhịhị nya ụya ọhọhọ bala ẹchụ ọnyọọngịrị ọnwanwa? Ányị ọlẹng ọhẹ ịị Slovenia à tị́ jẹ́ hwabwọ hi ere ọ-nwà kpoye? Wa ẹla ọlẹ ká angịwẹ ya.

Ọhịhị Kpụm Ịpyọ Ịịwẹ.”—JOHN RICKETTS

ẸKA ỌLẸ KỊ MỌỌ: 1958

ẸPWỤMA: SCOTLAND

EGO: ỌLỌHỊ ỌTỤKA

EGO NYAM: Abwọlẹ kị kpam nwà kpụm ịpyọ yẹẹyẹẹ. Adam ri olegbeju nya isoja ịla Britain, lẹ ahị kaa mwụ ẹpwa hyaahyaa. Datị hi Scotland, ahị kụ England, Germany, Kenya, Malaysia, Ireland, bala Cyprus. Ụka kam gu ẹka ineku, m̀ dọmwụ nyọka ka ube-ụpwụ ọlẹ kị kaa kpa anyị rụ hi ẹpwa ka hụ ịị Scotland. M̀ họ kpá bwu ube-ụpwụ ọgbẹgbịlẹ ịị Cambridge University.

Ụka kam gu ẹka 20, m̀ dọmwụ nya ọhị nya ida lala ẹka ineku. M̀ họ ụkụrwọ ọwẹ họhẹ-họhẹ ịị South America, ụka ọkịla m̀ họ ịnyịnyị ụ-ụwa Africa, bala Western Australia. Ụka kam mwụ ka Australia, m̀ wụrụ ọhị ọtụka-ọtụka ọhẹ ọlẹ kam kaa kpa ang ra.

Okpoko ọlẹ kam ye bwu ọhị ọwẹ du kam mwịịnyọ hi ụkụrwọ ụka kam gu ẹka 40. M̀ kaa kpa ụka nyam kanyị bwu ẹgẹhẹ ka ẹga ọkịla. M̀ kụ ẹgẹrẹ da koko ju Australia ụka imiiye bala ọ-kanyị chị odehe wuu ọnụ. Ọhịhị kpụm ịpyọ ịịwẹ.

JAABWỌ KÁ ỊBAYỊBỤỤ BWU YA ỌHỊHỊ NYAM DA: Ene kam dọmwụ lẹẹ mwịịnyọ hi ụkụrwọ, m̀ tịtọ nyọka mwahị nya ụgbẹyị ọlẹ kam ka ji Ohe obe chajị nya ọhịhị ọkpịpyọ ọlẹ kam la. M̀ dọmwụ nyọka ka Anglican Church, ẹga ọlẹ kam kaa ka la enjwo-enjwo. Ma ang ọmẹjẹ nyaa á kaa bwu ịBayịbụụ ịnyị ka. M̀ dọmwụ nya ọ-jẹ́ ang bala Mormons, ma ẹla nyaa chịm abwọ pyẹpyẹ chaji nyọlẹ kị kaa kpụnịrọ ịBayịbụụ ka.

La ahyẹẹnụ ọhẹ lẹ, Alibeenu nya iJihova à yụbwọ kpụm ụgbẹyị nya ube ẹẹ. M̀ yẹ i-ijata nyori ang ọmẹjẹ nyaa wuu kpụnịrọ ịBayịbụụ. Ụpwụ ịgọgọ ọhẹ ọlẹ kị wụrụ mẹjẹ́m ri ụpwụ nya 1 iTimoti 2:3, 4. Ọgba ịwẹ ya nyori nyị ri “irya nya Ohe Oluhye ayịdang ká angịnyị ehe wuu ka chịda bala ọ-ka ri angị jẹ́ ẹla nya ịlẹhị nya Ohe Oluhye yẹẹyẹẹ.” Alibeenu nya iJihova á ya ọnụ rịrị ang ọjẹ́jẹ ịịwẹ kem ka, ma ang ọjẹ́jẹ ọkpẹẹkpẹẹ ọlẹ kọ kpụnịrọ ịBayịbụụ ịnyị, lẹ ẹla ọọwa wum ẹpwụ yẹẹyẹẹ.

Ọ-jẹ́ ang bala Alibeenu nya iJihova dam ụbwọ nyọka la ẹla ọjẹ́je ọkpẹẹkpẹẹ ọọwa. Ọ-chụ pwokwita, m̀ jẹ́ nyori Ohe bala iJisọsị á ri ụpa nya Ohe Ịta ẹ-Ẹpwụ nya Okpokpo ka, ọngọngọọng nyaa datị. (ỊJọn 14:28; 1 Ala ịKọrịntị 11:3) Ọ kpụm ịpyọ yẹẹyẹẹ nyọka jẹ́ ẹlịlẹhị ọwẹ. Ọ jụm nya ịlẹhị-ịlẹhị nyọlẹ kam kpa ọngịrị nyam bịrị ododu juwa maga nyọka jẹ́ ang ọlẹ kọ la etu ka!

Ahyaahị m̀ dọmwụ nyọka ka ọjịra-jịra nya Alibeenu nya iJihova. Abwọlẹ kị ye ọngịnyị myị bala abwẹla nyaa myịm lẹhị yẹẹyẹẹ, o du kị mem angị ịgọgọ nya Ohe. Ọháha nyịlẹhị ọlẹ kị mẹjẹ ya ọ-jẹ́ myị̀myị̀ ham nyori m̀ ye ịgba ọgbagba nyịlẹhị lẹ.—ỊJọn 13:35.

APYOBWUNA ỌLẸ KAM YÉ: Nyọlẹ kam hu enyi Ohe kpá, m̀ tọ ọnyang ọnyịịla-ọnyịịla ọhẹ ká ẹnyị nyamwụ ri Diane. O ri Olibeenu nya iJihova bwu eji-eji, o tị la abwẹla ịnyịịla-ịnyịịla ịhyẹ ịlẹ kị hám. Ọ ka nọ kaka lẹ, ahị ye awụlẹ lẹlẹ. Ọ-yẹjula awụlẹ nyam bala Diane bala ụbwọ ọdada nyamwụ ri ahị ọwawa bwu ẹga nya iJihova.

Am bala Diane tịtọ nyọka mwụ ka ẹga ọlẹ ká ọbaba nya ẹrụ ọnyịịla ọ-kpa pyẹ ji. La 2010, ahị mwụ rụ ka Belize, Central America. Am ẹ-ẹga ọlẹ, ahị ya ẹrụ ọnyịịla je angịlẹ kị la ọháha ha iJihova bala ọ-tịtọ nyọka jẹ́ ẹlịlẹhị gụ ọọwa.

Lẹẹlẹẹ, m̀ ye okpunyi nya ọkịlẹtụ nyọlẹ kam jẹ́ ẹlịlẹhị u-uhye nya Ohe bala Omyi Ẹla nyamwụ, ịBayịbụụ. Lala ọngọ kaa kpa ụka nyamwụ wuu họ ụkụrwọ nya Ohe, m̀ ye ọkẹkẹnị nya ọ-kaa mẹ ẹlịlẹhị ọla ịBayịbụụ jẹ iru nya angịkịla. Ịngịngịhyẹ-ẹ́ ji kọ há gụ ọ-ka yẹ jaabwọ ká ẹlịlẹhị ọla ịBayịbụụ juwa yẹ ọhịhị nya ọngịnyị da kaka, jaabwọ kọ la ẹ-ẹga nyam. Ụka ohyẹẹkpẹ, m̀ ye ụgbẹyị ọlẹ kọ há gụ wuu nyọka ji Ohe obe chajị nya ọhịhị ọkpịpyọ ọlẹ kam la lẹ.

“Ị Kpam Hiigu-hiigu.”—MAURÍCIO ARAÚJO

ẸKA ỌLẸ KỊ MỌỌ: 1967

EPWỤMA: BRAZIL

EGO: ỌHỊHỊ NYA ỤYA

EGO NYAM: Ị kpam nwà Avaré, epweji ochiche ọhẹ ịị São Paulo. Ụmụmẹ nya angịlẹ kị juwa ri alụkụrwọ.

Adam gbu ụka ọlẹ ká ịnam kpẹnyị nyam. Ụka kam ri onjwo, m̀ kaa go ang ịwụrụ nya ịnam kụrụ ụka kọ kpehe ka ẹga. M̀ dọmwụ nyọka họ ẹla lala ọnyang, ọọwa du ká angịnyị kaa yẹm nya ọlẹng ọ-họ ụya tọ alẹng ịkịla. Nyọlẹ kọ nọ chẹẹ, m̀ dọmwụ nyọka họ ụya ta alẹng ịkịla, tụ́ anjwo bala angịgbahị.

Ụka kam wẹẹ tụ́ ju ẹka ohu chuu, m̀ juwa tịtọ nya ọngọlẹ kọ ka ri ọngọ oheeye nyam (ọnyang tụ́ ọlẹng) ka ẹga myị́ ẹga—ẹga ịhụhụ nwa ere, ipati, dọmwụ tụ́ ịchọọchị. Ọ-ọhụhụ nya ẹka, m̀ kaa kụrụ ang lala ọnyang juwa chewo. Angịnyị jẹ́m yẹẹyẹẹ.

Angịlẹ kị ri aligu nyam ri alẹng-alẹng bala anyang-anyang ị-họ ụya ta awụlẹ, alakpara, bala angị kaa nwà ẹchụ. Angịhyẹ nyaa tụm tutu nyọka nwà cocaine, ahyaahị ọọwa bam ahị. Ụka ọhẹ, ahị kaa nwà ẹchụ lododu gbee ká ahị ka pyẹ kpakpịra. Ụka ọkịla, m̀ kaa juwa ụbwọm-ụbwọm ja nwà lụtụrụ-lụtụrụ gbee ká odu ka hi. M̀ myị́ hi kẹngbẹẹ lala uke-ehye du ká angịnyị juwa kpa ya nyori am nyị la ọbẹja lẹ.

JAABWỌ KÁ ỊBAYỊBỤỤ YẸ ỌHỊHỊ NYAM DA: Lụka ọwe, m̀ tọ Alibeenu nya iJihova. Ị kpam hiigu-hiigu. Ọhẹ lẹpwụ nya ọgba nya ịBayịbụụ ọlẹ kị wa jem ri Ala iRom 10:13, ọlẹ kọ yẹkẹẹ: “Ọng myị́ ọng ọlẹ wuu kọ juwa kpa ọmyịmyị ọlala be ẹkọ wụrụ ẹnyị nya [iJihova] lẹ aalẹ, ọngọọwa ka la ọchịda lẹ.” Omyi ẹla ịwẹ mẹjẹ́m ang odudu ọlẹ kọ baba nyọka wụrụ ẹnyị nya iJihova. Ụka lụmẹ-lụmẹ, ụka kam nwà ẹchụ jụm-jụm lododu gbee ká ahị pye, m̀ kaa wụrụ iwindo nyam, hu ẹhị hwaa ka epwoohe juwa raabwọ ha iJihova la egbejida ẹ-ẹhị, bịlọọ nyọka dam ụbwọ.

Oo ri olo nya ọkịlẹtụ ha ịnam jaabwọ kọ wẹẹ yẹm kam juwa bịrị ọhịhị nyam la ẹchụ ọnwanwa. Ọ kaa jụm lụmẹ, ọọwa du kam cheje nyọka hwabwọ. Ahyaahị ị-ịlahị nyọọwa, m̀ myị ọnụ nyọka jẹ́ ịBayịbụụ bala Alibeenu nya iJihova. Ị ya ahị ọdahile ham nyori ịBayịbụụ ọjẹ́jẹ nyị ka ju eje ọchịchị nyam ọngịrị nyọka hwabwọ la ẹchụ ọnwanwa—ọ tị lịnyị ịlẹhị!

Jaabwọ kam wẹẹ kịnyaa la ịBayịbụụ ọjẹ́jẹ, m̀ wẹ ka yẹ nyori m̀ baba nyọka yẹ ọhịhị nyam da. Abwẹla ọhẹ ọlẹ kọ lujwo ham gụ wuu nyọka tụụbwọ hi ri abwẹla nya alẹng-alẹng ọ-họ ụya ta awụlẹ, chajị o ri ụpa nya ọhịhị nyam bwu eji-eji lẹ. Ịngịhyẹ ọlẹ kọ dam ụbwọ ri o-gbile ẹta-ẹkpẹ hi ang ịlẹ kị kaa bịrị ọhịhị nyam. M̀ hwabwo la ọ-ka ba aligu inyogo nyam jẹ bala ọ-ka ẹga ị-hụhụ nwà ere bala ipati.

Nanana nyori ọ́ chịkpẹẹ nyọka yẹ ang ịwẹ da ọ-ọhịhị nyam ka, m̀ ye ẹjẹ ọkpụ́kpụ nyọlẹ kam jẹ́ nyori iJihova kpahị jum bala o-ri ọ-jẹ́ aga ọmama nyam. (1 ịJọn 3:19, 20) La 2002, m̀ jẹ́ hwabwọ hi abwẹla nya alẹng-alẹng ọ-họ ụya ta awụlẹ ụma ọnyị myị́ ọnyị wuu. Ẹka ọwẹ-ọwẹ m hu enyi Ohe nyọka ri Olibeenu nya iJihova lẹ.

APYOBWUNA ỌLẸ KAM YÉ: Ọ kpụ ịnam ịpyọ nya ịlẹhị-ịlẹhị nya abwọlẹ kam yẹ ọhịhị nyam da, kpụ ọwa dọmwụ nyọka jẹ́ ịBayịbụụ ịnyịnyị. O-tolujwo lụmẹ nyori ọ la ẹdụrụ nya ịnyịrọ o-gbu. Nanana nyọọwa, ọ kịnyaa la ọ-la ọháha ẹ-ẹga nya iJihova bala ẹlịlẹhị ọla ịBayịbụụ.

Lala ẹka ineku kẹkpẹ, m̀ kaa kpa ụka nyam lụmẹ-lụmẹ me ịBayịbụụ jẹ angịkịla. Nyọka ya ịnyịlẹhị, m̀ kaa ma uya ta irya nya ang ịtịpyọ ọhọhọ ụka ọhẹ. Ma, m̀ la ẹjẹ ọkpụ́kpụ nyori bwula am o-hu irya ịịwa họ ka, m̀ ka jẹ́-ẹ họ ẹla kpụ iJihova ịpyọ.

Ọ-tụ ju iJihova chwẹẹ bala ọ-hịhị ụ-ụgbẹyị ọlẹ kọ kpọọ ịpyọ du kam la ịlọm ihi-ihi gụ olene. M̀ ri ọngọ chị ọkẹkẹnị lẹẹlẹẹ lẹ.

“M̀ Ri Ọkpịlagada ọ-Nwà Ere Kpụ Ere.”—LUKA ŠUC

ẸKA ỌLẸ KỊ MỌỌ: 1975

ẸPWỤMA: SLOVENIA

EGO: ỌNGỌ NWÀ ERE KPOYE

EGO NYAM: Ị mam ịị Ljubljana, epweji nya Slovenia. Ọhịhị kpụm ịpyọ lụka kam ri onjwo gbee ka da ụka kam gu ẹka ine. Ọọwa lẹ adam à ju orinwa lẹlẹ. Nyọlẹ ká ẹla otolujwo ọwẹ họ kpá, ịnam kaa họ ụkụrwọ nya ịlẹhị-ịlẹhị chajị ká am bala ọọnang ọgbahị ka ye ang ri.

Ụka kam gu ẹka 15, m̀ rụ ka kụ bala ịnam ọgbahị. Ọ kụ balọọ kpụm ịpyọ yẹẹyẹẹ, chajị iru nya aligu nyam kụ o-oye ụ-ụwa ịnyịnyị. M̀ myịmyị la ịlọm yẹẹyẹẹ gụ ụka ọlẹ kam kụ bala ịnam anyị ẹ-ẹpwa. Ụka kam gu ẹka 16, m̀ dọmwụ nyọka yẹjula angịlẹ kị kaa kpehe kaka nwà ere ọmyịmyị nya epwihi-epwihi. M̀ pẹhi inyi nyam ị nwà lediyo, dọmwụ nyọka kụrụ ang lala angịlẹ kị ri aruwo-ka, bala ọ-dọmwụ nyọka nwà ẹchụ nyọlẹ kọ ka nọ ka.

Nanana nyori m̀ ma ẹchụ ọnwanwa ụma ịdatị-datị yẹ kpụ m hwabwọ, m̀ kịnyaa la ere ọnwanwa, chajị m̀ yọọ nya ang ọlẹ kọ kaa ya ọkẹkẹnị ham gụgụ wuu. Ahyaahị m̀ jẹ bwu ukoku nya ere ọnwanwa kem ka ekpem ọlẹpwụ-ọlẹpwụ lee ọ-gụ ọọwa ọnwanwa. M̀ jẹ́-ẹ kpa ere ụ-ụwa yẹẹyẹẹ la ọngọhẹ ọ-ka jẹ́ nyori m̀ nwà ere ka. Ụka lụmẹ-lụmẹ, oru ọlẹ kọ kaa kpehe bwu ọnụ nyam angịnyị à kaa kpa jẹ́ kẹnẹ-kẹnẹ nyori m̀ nwà ere lẹlẹ. Nanana nyọọwa, ọngọngọhẹ á kaa jẹ́ nyori am nyị nwà ekpem ịmanyị-ịmanyị nya ere, bala ọ-ya ogogoro yẹchị bwọọ lẹ ka!

Ụka lụmẹ-lụmẹ, am à kaa da aligu nyam ụbwọ wuleji dayị kọkọ ụka kahị nwà ere kpá i-ipati lẹ, ma kori kị ya nyị ya mẹ, ọhẹka m̀ nwa ere gụ ọlẹ ká ịwa ayịdang nwà ugbabwọ imiiye. Ẹnẹhẹ, m wo ká oligu nyam ọhẹ juwa ya nyori am nyị ri ọkpịlagada ọ-nwà ere kpụ ere, ko ri ẹnyị ọlẹ kị kaa wụrụ ọngọlẹ ko kaa jụ ere nwà gụ angịkịla wuu. Omyi ẹla ọwẹ jụm yẹẹyẹẹ.

M̀ dọmwụ nyọka kụ irya nya ang ọlẹ kam wẹẹ kpa ọhịhị nyam họ. M̀ ya ịlọm lala ọngọ kpụ̀ ịngịngịhyẹ kaka. Ọ lala o-ri ịngịngịhyẹ ọlẹ kam họ ọ-ọhịhị nyam wuu á la etu ọhẹ-lọhẹ ka.

JAABWỌ KÁ ỊBAYỊBỤỤ YẸ ỌHỊHỊ NYAM DA: Lụka ọwẹ, m̀ yẹ nyori ọnyị ọla ịkịlasị nyam ọhẹ yẹda, ọ́ kaa ju agbama jaabwọ kọ kaa ju ene-ene kaka. M̀ tịtọ nyọka jẹ́ ang ọlẹ kọ yọọ da pyii, lẹ m̀ wụrọọ nyọka kpehe balam ka ẹga ọhụhụ nwà ere. Lụka kahị wẹẹ kpa oja ja, ọ wụlẹ ya jem nyori ọwa nyị dọmwụ nya ịBayịbụụ ọjẹ́jẹ bala Alibeenu nya iJihova lẹ. Ọ mẹ ẹla ịhyẹ ịlẹ kọ juwa jẹ́ jẹ́m, ị tị rim inyeewe wuu, chajị ị́ mẹ ẹla u-uhye nya ịgba ọgbagba jẹ́m ẹnẹnẹhẹ lẹ ka. M̀ dọmwụ nyọka kà ọjịra-jịra nya Alibeenu nya iJihova bala ọ-jẹ́ ịBayịbụụ.

ỊBayịbụụ ọjẹ́jẹ wụrụ ẹhị nyam nyọka yẹ ẹlịlẹhị lụmẹ-lụmẹ ịlẹ kị dam ụbwọ nyọka yẹda. Ọ-chụ pwokwita, m̀ jẹ́ nyori ahị jam hịhị ụ-ụka ọlẹ ká ịBayịbụụ wụrụ nya ‘ụka ohyẹẹkpẹ nya odehe.’ (2 iTimoti 3:1-5) Ịnyịnyị m̀ jẹ́ nyori Ohe Oluhye ka ta alabwẹla ịtịpyọ ayịreji hi odehe lụka o-kpii bala o-ya iwe da ha alabwẹla ịnyịịla nyọka hịhị gboyi myị́ oyi la ọkẹkẹnị ị-ịparadayịsị. (Eje Ọnyịịla 37:29) Lẹ ọ chịm ịla nyọka yẹ ọhịhị nyam da chajị kam ka juwa ẹ-ẹpwụ nya alabwẹla ịnyịịla ịwẹ.

M̀ dọmwụ nyọka ya ẹlịlẹhị ịlẹ kam wẹẹ jẹ́ bwu ịBayịbụụ je aligu nyam. Iru nyaa lụmẹ-lụmẹ kaa kpam họ, ma ọhọhọ nyaa dam ụbwọ ụ-ụgbẹyị ọlẹbyẹbyị. O du kam jẹ́ nyori ị́ ri aligu ịnyịịla ka. M̀ wẹ ka ye nyori aligu ịlẹ kam chụ à du kam la akama ẹ-ẹga nya ere ọ-nwà kpoye lẹ. Epwihi ọnyị myị́ ọnyị, ị kaa ya ẹhị rịrị ka ọmyịmyị nya epwihi chajị kị ka nwà ere juwa ya.

M̀ chị ịlọm ebwo hi aligu ịwẹ bala ọ-yẹjula ogu nya Alibeenu nya iJihova ịlẹ kị kaa kpa awụlẹ wule. Ọ yẹjulaa ri ọhụ ojuju ham nya ịlẹhị-ịlẹhị—ị ri angịnyị ịlẹ kị la ọháha ha iJihova bala ọ-kaa maga nyọka hịhị ba ehile nyamwụ jẹ. Dụmwọ-dụmwọ, m̀ jẹ́ hwabwọ hi ere ọ-nwà kpoye.

APYOBWUNA ỌLẸ KAM YÉ: M̀ ji iJihova obe chajị nyọlẹ kam baba nya ere ọnyọọngịrị nyọka chị ọkẹkẹnị kaka. Ḿ jẹ́ ang ọlẹ kọ ka họ tam ịnọ kori kam kịnyaa ẹ-ẹpwụ nya ọhịhị nyam onyogo ka. M̀ la ọ-jẹ́ myị̀myị̀ nyori ọhịhị nyam hiigu lẹẹlẹẹ lẹ.

Ọ la ẹka irwiye nyọlẹ kam kaa họ ụkụrwọ e-egbeju-ẹpwa nya Alibeenu nya iJihova ọla Slovenia lẹ. Ọ-jẹ́ iJihova bala ọ-gbịgba họọ du ká ọhịhị nyam la etu ọlam-ọlam.