Idi Pebrero 24, 2021, impakaammo ti komisioner ti USCIRF * a ni Nury Turkel a kiddawenna a mawayawayaan ti 70 ti tawenna a ni Brother Shamil Khakimov kas paset ti USCIRF Religious Prisoners of Conscience Project. Inlawlawag ni Commissioner Turkel: “Manipud idi 2019, daytoy a masakit a lakay ket agrigrigaten iti daan ken napno iti balud a pagbaludan gapu iti saan a nainkalintegan a pito ket kagudua a tawen a sentensiana. Daytoy ket kasla dusa nga ipapatay para iti maysa a lakay a di umiso a naibalud gapu iti natalna a panangannurotna iti narelihiosuan a patpatienna kas Saksi ni Jehova.”

Ni Brother Khakimov, a balo, ket maysa kadagiti 24 a Saksi idiay makin-amianan a Tajikistan a pinalutpot dagiti opisial ti Department of Organized Crime Control (DOCC) idi Enero ken Pebrero 2019. Inaresto ti DOCC ni Brother Khakimov ken pinalutpotda maipapan iti organisasion ken no kasano a nagbalin a maysa a Saksi ni Jehova.

Nabiit pay a naoperaan ni Brother Khakimov. Na-detain iti walo nga oras ken saan a nakapagpaagas. Nangato pay ti presion ti darana. Idi intulod dagiti polis iti balayna, innalada dagiti gadyet, Biblia, naibatay-Biblia a publikasion, ken ti passport-na. No awan ti passport-na, saan a maala ni Brother Khakimov ti pensionna nga usarenna nga agpaagas.

Idi Pebrero 28, 2019, nagdesision ti hues idiay Khujand City Court a maikabil ni Brother Khakimov iti pretrial detention. Namitlo a nabaliwan ti kapaut ti panagyanna iti pretrial detention. Nagyan iti dayta agingga a nalpas ti pannakaimbestigar ken pannakabistana.

Idi Septiembre 10, 2019, nayetnag ti desision ket nasentensiaan iti pito ket kagudua a tawen a pannakaibalud. Ngem idi Hulio 4, 2020, imbaga ti administrasion ti pagbaludan ken ni Brother Khakimov a ti linteg iti Tajikistan maipapan iti amnestia ket agaplikar iti sentensiana isu a napaababa dayta iti dua a tawen, tallo a bulan, ken sangapulo nga aldaw. Mawayawayaan inton Mayo 16, 2024.

Ammotayo nga itultuloy a tulongan ni Jehova dagiti kakabsattayo nga aganus ken siraragsak nga agibtur.—Salmo 20:2.