Ti Umuna nga Ar-ari 10:1-29
10 Nadamag ti reyna ti Sheba ti kinalatak ni Solomon maigapu iti nagan ni Jehova,+ isu a napanna sinubok babaen kadagiti narigat a saludsod.*+
2 Adu ti kakaduana a dimteng idiay Jerusalem,+ a pakairamanan dagiti kamelio a nangawit iti lana ti balsamo+ ken nakaad-adu a balitok ken napateg a batbato. Napan ken Solomon ket sinaludsodna ti amin a kayatna a maammuan.
3 Sinungbatan ni Solomon ti amin a saludsod ti reyna. Awan ti banag a di nailawlawag* ti ari kenkuana.
4 Idi naammuan ti reyna ti Sheba ti amin a kinasirib ni Solomon+ ken nakitana ti balay a binangonna,+
5 ti taraon iti lamisaanna,+ ti kinaurnos ti tugaw dagiti opisialna, ti panagserbi dagiti serbidorna ken ti badoda, dagiti paraiggem iti kopana, ken dagiti datonna a mapuoran a kanayon nga idatonna iti balay ni Jehova, napalalo ti siddaaw* ti reyna.
6 Gapuna, kinunana iti ari: “Agpayso ti nadamagko idiay lugarmi maipapan kadagiti naaramidam* ken iti kinasiribmo.
7 Ngem diak namati kadagita agingga nga immayak ket nakitak a mismo. Awan pay gayam iti kagudua ti naipadamag kaniak! Adayo a nasirsirib ken nabakbaknangka ngem iti nadamagko.
8 Naragsak dagiti tattaom, ken naragsak dagiti adipenmo a kanayon a kaduam, a dumdumngeg iti kinasiribmo!+
9 Maidaydayaw koma ni Jehova a Diosmo,+ a naragsakan ken nangisaad kenka iti trono ti Israel. Gapu iti agnanayon nga ayat ni Jehova iti Israel, dinutokannaka kas ari a mangipakat iti hustisia ken kinalinteg.”
10 Kalpasanna, inikkanna ti ari iti 120 a talento* a balitok ken nakaad-adu a lana ti balsamo+ ken napateg a batbato.+ Dayta a lana ti balsamo nga inted ti reyna ti Sheba ti kaaduan pay laeng a naited ken Ari Solomon.
11 Dagiti barko ni Hiram a nagkarga iti balitok manipud Ofir+ nangyegda met iti nakaad-adu a kayo ti algum+ manipud Ofir ken napateg a batbato.+
12 Inusar ni Solomon dagiti kayo ti algum a pagaramid iti barandilias iti balay ni Jehova ken iti balay* ti ari, ken kadagiti arpa ken dekuerdas nga instrumento nga usaren dagiti kumakanta.+ Awanen ti nakita wenno naipan ken Solomon a kasta ti kaaduna a kayo ti algum agingga ita nga aldaw.
13 Inted met ni Ari Solomon iti reyna ti Sheba ti aniaman a kayatna ken kiniddawna, malaksid pay kadagiti intedna iti reyna gapu iti kinaparaburna.* Kalpasanna, nagawiden a kaduana dagiti adipenna.+
14 Ti kadagsen ti balitok a naited ken Solomon iti maysa a tawen ket katupag ti 666 a talento a balitok,+
15 malaksid pay iti napastrek manipud kadagiti komersiante ken negosiante ken iti amin nga ari dagiti Arabo ken kadagiti gobernador ti daga.
16 Nangaramid ni Ari Solomon iti 200 a dadakkel a kalasag a balitok a nalaokan iti sabali a metal+ (600 a siklo* a balitok ti nausar iti tunggal kalasag)+
17 ken 300 a sarapa* a balitok a nalaokan iti sabali a metal (tallo a mina* a balitok ti nausar iti tunggal kalasag). Kalpasanna, inkabilna dagita iti Balay iti Bakir ti Lebanon.+
18 Nangaramid met ti ari iti dakkel a trono a marfil+ ken kinalupkopanna iti napasudi a balitok.+
19 Innem ti tukad ti agdan nga umuli iti trono. Adda immarko a linong iti likudan ti trono, ken adda pagiparabawan iti ima iti agsumbangir a sikigan ti pagtugawan. Adda dua a sinanleon+ a sitatakder iti abay ti pagiparabawan iti ima.
20 Adda met 12 a sinanleon a sitatakder iti innem a tukad, saggaysa iti agsumbangir nga ungto ti tunggal tukad. Awanen ti sabali pay a pagarian a nakaaramid iti aniaman a kapada dayta.
21 Amin a paginuman ni Ari Solomon ket naaramid iti balitok, ken amin nga alikamen iti Balay iti Bakir ti Lebanon+ ket naaramid iti puro a balitok. Awan ti naaramid iti pirak, ta maibilang nga awan patpateg ti pirak idi tiempo ni Solomon.+
22 Addaan ngamin ti ari kadagiti barko ti Tarsis+ agraman dagiti barko ni Hiram. Maminsan iti kada tallo a tawen, agsangpet dagiti barko ti Tarsis a nagkarga iti balitok ken pirak, marfil,+ bakes, ken paboreal.
23 Gapuna, nabakbaknang+ ken nasirsirib+ ni Ari Solomon ngem iti asinoman nga ari iti daga.
24 Tartarigagayan ti amin a tattao iti daga ti mapan ken* Solomon tapno dumngeg iti sirib nga inkabil ti Dios iti pusona.+
25 Mangyeg ti tunggal maysa kadakuada iti sagut—alikamen a pirak ken balitok, badbado, kabal, lana ti balsamo, kabalio, ken mulo—ket tinawen a kasta ti maar-aramid.
26 Nagurnong ni Solomon iti adu a karuahe ken kabalio.* Naaddaan iti 1,400 a karuahe ken 12,000 a kabalio,*+ ket inkabilna dagita kadagiti siudad a pagyanan dagiti karuahe nga asideg iti ari idiay Jerusalem.+
27 Pinagbalinna ti pirak idiay Jerusalem a kas kaadu dagiti bato, ken ti kayo ti sedro a kas kaadu dagiti kayo a sikomoro idiay Sefela.+
28 Nagatang idiay Egipto dagiti kabalio ni Solomon, ket pinangen a gatangen dagita dagiti komersiante ti ari.*+
29 Ti presio ti tunggal karuahe a naangkat idiay Egipto ket 600 a pedaso a pirak, ken 150 ti presio ti maysa a kabalio; gimmatang met kadakuada ti amin nga ari dagiti Heteo+ ken Siriano.
Footnotes
^ Wenno “burburtia.”
^ Lit., “nga inlemmeng.”
^ Lit., “awan ti nabati nga espiritu.”
^ Wenno “sasaom.”
^ Wenno “palasio.”
^ Lit., “sigun iti ima ni Ari Solomon.”
^ Bassit a kalasag a masansan nga awiten dagiti pumapana.
^ Lit., “Sapsapulen ti amin a tattao iti daga ti rupa ni.”
^ Wenno “kumakabalio.”
^ Wenno “kumakabalio.”
^ Wenno mabalin a, “manipud Egipto ken Kue; gatangen dagita dagiti komersiante ti ari manipud Kue,” nalabit tumukoy iti Cilicia.
