Ti Umuna a Samuel 12:1-25
12 Kamaudiananna, kinuna ni Samuel iti intero nga Israel: “Inaramidko* ti amin a kiniddawyo, ket nangpiliak iti maysa nga ari a mangituray kadakayo.+
2 Ita, daytoy ti ariyo a mangidadaulo kadakayo!*+ Lakayakon ken ubanan, ket adda ditoy a kaduayo dagiti annakko,+ ken indauluankayo manipud idi agtutuboak agingga ita nga aldaw.+
3 Adtoyak. Saksiandak iti imatang ni Jehova ken iti daydiay dinutokanna:*+ Adda kadi baka wenno asno nga innalak iti asinoman kadakayo?+ Wenno adda kadi sinaurko wenno inrurumenko? Immawatak kadi iti pasuksok* iti asinoman kadakayo tapno baliktadek ti hustisia?+ Ibagayo no adda, tapno maisublik kadakayo.”+
4 Insungbatda: “Awan kadakami ti sinaurmo wenno inrurumenmo. Saanka met a pulos nga immawat iti aniaman kadakami.”
5 Isu a kinunana kadakuada: “Ita nga aldaw, saksian ni Jehova ken daydiay dinutokanna nga awan a pulos ti inaramidko a dakes kadakayo.”* Kinunada: “Wen, isu ti saksi.”
6 Ket kinuna ni Samuel kadagiti umili: “Ni Jehova ket saksi. Isu ti nangpili kada Moises ken Aaron ken nangiruar kadagidi ammayo idiay Egipto.+
7 Agtakderkayo ngarud iti sanguanak, ket saggaysaek nga ibaga kadakayo iti imatang ni Jehova ti amin a nalinteg nga inaramid ni Jehova kadakayo ken kadagidi ammayo.
8 “Apaman a nakadanon ni Jacob idiay Egipto+ ken rinugian dagidi ammayo ti agpatulong ken Jehova,+ imbaon ni Jehova da Moises+ ken Aaron tapno idauluanda dagidi ammayo a rummuar idiay Egipto ken pagnaedenda ida iti daytoy a lugar.+
9 Ngem linipatda ni Jehova a Diosda, isu nga inlakona ida+ ken Sisera+ a pangulo ti armada ni Hazor, kadagiti Filisteo,+ ken iti ari ti Moab,+ ket nakigubatda kadakuada.
10 Nagpatulongda ken Jehova+ ket imbagada: ‘Nagbasolkami,+ ta pinanawanmi ni Jehova tapno agserbikami kadagiti rebulto ni Baal+ ken ni Astoret;+ isalakannakami ita kadagiti kabusormi tapno makapagserbikami kenka.’
11 Imbaon ni Jehova da Jerubaal,+ Bedan, Jefte,+ ken Samuel+ ket insalakannakayo iti amin a kabusoryo, tapno natalged ti panagbiagyo.+
12 Idi nakitayo a rautennakayo ni Nahas+ nga ari dagiti Ammonita, sangkaibagayo kaniak, ‘Saan, kayatmi ti maaddaan iti ari a mangituray kadakami!’+ uray no ni Jehova a Diosyo ti Ariyo.+
13 Ita, daytoy ti ari a kayatyo ken kiniddawyo. Kitaenyo! Nangdutok ni Jehova iti agbalin nga ariyo.+
14 No agbutengkayo ken Jehova+ ken agserbikayo kenkuana+ ken tungpalenyo ti saona+ ken saanyo a sukiren ti linteg ni Jehova, ken no agtulnogkayo agraman ti ariyo iti bilin ni Jehova a Diosyo, nasayaat.
15 Ngem no saankayo nga agtulnog iti sao ni Jehova ket sukirenyo ti linteg ni Jehova, dusaennakayto ni Jehova ken dagiti ammayo.+
16 Agtakderkayo ngarud ket kitaenyo ti naindaklan nga ar-aramiden ni Jehova iti imatangyo.
17 Saan kadi a panagaani ita iti trigo? Ikararagko ken Jehova a mangyeg iti gurruod ken tudo; tapno maammuan ken maawatanyo a nagdakes ti inaramidyo iti imatang ni Jehova gapu iti panagkiddawyo iti ari a mangituray kadakayo.”+
18 Nagkararag ni Samuel ken ni Jehova, ket nangyeg ni Jehova iti gurruod ken tudo iti dayta nga aldaw, isu a napalalo ti buteng ti amin a tattao ken Jehova ken ni Samuel.
19 Kinuna ti amin a tattao ken Samuel: “Ikararagannakami nga adipenmo iti Diosmo a ni Jehova+ ta saanmi a kayat ti matay. Nanayonan manen dagiti basolmi gapu iti dakes nga inaramidmi a panagkiddawmi iti ari a mangituray kadakami.”
20 Kinuna ni Samuel kadagiti umili: “Dikay agbuteng. Agpayso nga inaramidyo amin daytoy a kinadakes. Ngem saanyo a taltallikudan ni Jehova,+ ken agserbikayo ken Jehova iti amin a pusoyo.+
21 Dikay agdayaw kadagiti awan serserbina a banag,*+ a saan a makatulong+ ken saan a makaisalakan, gapu ta awan serserbida.*
22 Maigapu iti naindaklan a naganna,+ saan a baybay-an ni Jehova dagiti tattaona,+ gapu ta inkeddeng ni Jehova a pagbalinennakayo nga ilina.+
23 Diak maitured ti agbasol ken Jehova babaen ti panagsardengko a mangikararag kadakayo, ket itultuloyko nga isuro kadakayo ti nasayaat ken umiso a dalan.
24 Ni laeng Jehova ti pagbutnganyo,+ ken agserbikayo kenkuana a simamatalek* iti amin a pusoyo, ta kitaenyo dagiti naindaklan nga inaramidna para kadakayo.+
25 Ngem no igagarayo ti agaramid iti dakes, madadaelkayto+ agraman ti ariyo.”+
Footnotes
^ Lit., “Immimdengak iti timekyo maipapan.”
^ Lit., “magmagna iti sangoyo.”
^ Wenno “pinulotanna.”
^ Wenno “papetpet.”
^ Lit., “awan a pulos ti nasarakanyo iti imak.”
^ Wenno “kadagiti saan nga agpaypayso.”
^ Wenno “saanda nga agpaypayso.”
^ Wenno “iti kinapudno.”
