Ti Umuna a Samuel 14:1-52
14 Maysa nga aldaw, kinuna ni Jonatan+ nga anak ni Saul iti katulonganna nga agaw-awit kadagiti armasna: “Umayka ket mapanta iti kampo dagiti Filisteo nga adda idiay bangir.” Ngem dina imbagbaga dayta ken amana.
2 Adda idi ni Saul iti pagpatinggaan ti Gibea+ iti sirok ti kayo a granada idiay Migron, ket agarup 600 a lallaki ti kakaduana.+
3 (Ket ni Ahias ti nakakawes iti efod.+ Isu ket anak ni Ahitub,+ a kabsat ni Ikabod,+ nga anak ni Finehas,+ nga anak ni Eli+ a padi ni Jehova idiay Shilo.)+ Saan idi nga ammo dagiti soldado a pimmanaw ni Jonatan.
4 Dagiti dalan a pinadas a lasaten ni Jonatan tapno madanonna ti kampo dagiti Filisteo ket adda iti nagbaetan ti dua a nagdadakkel a natirad a bato; Bozez ti nagan ti maysa, ken Sene ti nagan ti maikadua.
5 Sumango iti Mikmas ti dakkel a bato iti amianan ket sumango iti Geba+ ti dakkel a bato iti abagatan.
6 Isu a kinuna ni Jonatan iti paraawit iti kabalna: “Umayka ket mapanta iti kampo dagitoy di nakugit a lallaki+ bareng no tulongannata ni Jehova, ta awan ti makalapped ken Jehova a mangisalakan, adu man wenno bassit ti usarenna.”+
7 Kinuna ngarud kenkuana ti paraawit iti kabalna: “Aramidem ti aniaman nga idiktar ti pusom. Mapanka iti kayatmo a papanan ket sumurotakto iti sadinoman a papanam.”
8 Kinuna ni Jonatan: “Mapanta danonen dagita a lallaki ket agpakitata kadakuada.
9 No ibagada, ‘Ditakayo laeng ta umaykami dita!’ urayenta ida iti ayanta ket saanta a mapan kadakuada.
10 Ngem no ibagada, ‘Darupendakami!’ sumang-attanto ngarud, ta iyawatto ida ni Jehova kadata. Daytanto ti pagilasinanta.”+
11 Nagpakitada ngarud iti kampo dagiti Filisteo. Kinuna dagiti Filisteo: “Kitaenyo! Rimmuar dagiti Hebreo kadagiti paglemlemmenganda nga abut.”+
12 Isu a kinuna dagiti lallaki iti kampo ken Jonatan ken iti paraawit iti kabalna: “Umasidegkayo, ket ikkandakayo iti pagnakmanyo!”+ Dagus a kinuna ni Jonatan iti paraawit iti kabalna: “Surotennak, ta ited ida ni Jehova iti ima ti Israel.”+
13 Kimmalay-at ni Jonatan a sinaruno ti paraawit iti kabalna; rinaut ida ni Jonatan, ket pinatay met ti paraawit iti kabalna ti dadduma kadakuada.
14 Iti damo nga iraraut ni Jonatan ken ti paraawit iti kabalna, agarup 20 a lallaki ti napapatayda iti asideg a distansia.*
15 Napabutngan ti amin nga adda iti kampo dagiti soldado, ken uray dagiti rumaraut nga armada.+ Nagginggined ket pinagbuteng ti Dios dagiti Filisteo.
16 Dagiti soldado ni Saul a parabantay idiay Gibea+ ti Benjamin nakitada a kumarkaro ti riribuk iti intero a paset ti kampo.+
17 Kinuna ni Saul kadagiti kakaduana a soldado: “Pangngaasiyo ta agbilangkayo, ket ammuenyo no asino ti awan kadatayo.” Idi nagbilangda, naduktalanda nga awan ni Jonatan ken ti paraawit iti kabalna.
18 Kinuna ni Saul ken Ahias:+ “Iyasidegmo ti Lakasa ti pudno a Dios!” (Ta ti Lakasa ti pudno a Dios ket adda idi kadagiti Israelita iti daydi a tiempo.*)
19 Ket bayat a kasarsarita ni Saul ti padi, kumarkaro ti riribuk iti kampo dagiti Filisteo. Kinuna ni Saul iti padi: “Isardengmo ti ar-aramidem.”*
20 Naguummong da Saul ken ti amin a soldadona ket napanda iti paggugubatan. Nakitada nga agpipinnatay dagiti Filisteo ken nakaro ti riribuk.
21 Dagiti met Hebreo a dimmasig idi kadagiti Filisteo ken kimmuyog kadakuada a rumaut iti kampo ket nakikapponen kadagiti Israelita nga idadauluan da Saul ken Jonatan.
22 Nadamag ti amin a soldado ti Israel a naglemmeng+ iti kabambantayan ti Efraim a nagtalawen dagiti Filisteo, isu a nakipagkamatda metten kadakuada iti paggugubatan.
23 Iti dayta nga aldaw, insalakan ni Jehova ti Israel,+ ket dimmanon ti gubat agingga idiay Bet-aven.+
24 Ngem marigrigatan dagiti soldado ti Israel iti dayta nga aldaw ta pinagsapata ida ni Saul: “Mailunod ti tao a mangan iti aniaman a taraon* sakbay ti rabii ken agingga a diak makaibales kadagiti kabusorko!” Isu nga awan kadakuada ti nangan iti aniaman.+
25 Napan ti amin a soldado* iti bakir, ket adda diro iti rabaw ti daga.
26 Idi nakadanonda iti bakir, nakitada nga agtedtedted ti diro, ngem awan kadakuada ti nangraman iti dayta, ta mabutengda iti sapata.
27 Ngem saan a nangngeg ni Jonatan a pinagsapata ni tatangna dagiti soldado+ isu nga inyunnatna ti sarukodna ket insawsawna iti diro ti murdong ti sarukodna. Idi nakapanganen, limmawag ti panagkitana.
28 Kinuna ti maysa kadagiti soldado: “Siiinget a pinagsapata ni amam dagiti soldado, a kinunana, ‘Mailunod ti tao a mangan iti aniaman a taraon ita nga aldaw!’+ Isu nga agkakapsut unayen dagiti soldado.”
29 Ngem kinuna ni Jonatan: “Nangpataud ni amak iti dakkel a riribuk* iti daga. Kitaenyo no kasano a limmawag ti panagkitak idi rinamanak daytoy a diro.
30 Nasaysayaat koma nga amang no nawaya a nangan+ ita dagiti soldado kadagiti naalada kadagiti kabusorda! Ta no kasta ti naaramid, ad-adu pay koma a Filisteo ti napapatay.”
31 Iti dayta nga aldaw, intultuloyda ti nangpapatay kadagiti Filisteo manipud Mikmas agingga idiay Aijalon,+ ket nabannog unayen dagiti soldado.
32 Isu a dinardarasda ti nagtiliw kadagiti animal dagiti kabusor ket pinartida dagiti karnero ken baka iti daga ken kinnanda dagiti karne nga adda darana.+
33 Naipadamag ken Saul ti napasamak: “Kitaem, agbasbasol dagiti tattao ken Jehova ta mangmanganda iti karne nga adda darana.”+ Isu a kinuna ni Saul: “Nagkaro ti basol nga inaramidyo. Darasenyo, mangitulidkayo iti dakkel a bato ditoy ayanko.”
34 Kalpasanna, kinuna ni Saul: “Ibagayo kadagiti kakaduayo a soldado, ‘Iyegyo ditoy dagiti baka ken karnero a naalayo, ket ditoy ti pagpartian ken pangananyo. Dikay mangan iti karne nga adda darana+ tapno saankayo a makabasol ken Jehova.’” Isu nga inyegda dagiti bakada iti dayta a rabii ket pinartida sadiay.
35 Ket nangaramid ni Saul iti altar para ken Jehova.+ Dayta ti kaunaan nga altar nga inaramidna para ken Jehova.
36 Kalpasanna, kinuna ni Saul: “Intay rauten dagiti Filisteo iti rabii ket alaentayo dagiti adda kadakuada agingga nga aglawag. Awan ibatitayo kadakuada.” Kinuna dagiti soldado: “Aramidem ti ammom a nasayaat.” Ket kinuna ti padi: “Agsaludsodtayo ditoy iti pudno a Dios.”+
37 Sinaludsod ngarud ni Saul iti Dios: “Mapanko kadi rauten dagiti Filisteo?+ Pagballigiemto kadi ti Israel?” Ngem saan a sinungbatan ti Dios iti dayta nga aldaw.
38 Kinuna ni Saul: “Umaykayo ditoy, dakayo amin a panguluen dagiti soldado, ket ammuentayo no ania a basol ti naaramid ita nga aldaw.
39 Ta isapatak iti nagan ti sibibiag a Dios a ni Jehova a nangisalakan iti Israel, a mapapatay ti asinoman a matakuatan a nagbasol, uray pay no ni Jonatan nga anakko.” Ngem awan a pulos ti uray maysa a simmungbat.
40 Kinuna ni Saul iti intero nga Israel: “Mapankayo amin agtakder dita a bangir, ket agtakderkami a dua ken ni Jonatan nga anakko ditoy a bangir.” Ket kinuna dagiti soldado: “Aramidem ti ammom a nasayaat.”
41 Kinuna ni Saul ken Jehova: “O Dios ti Israel, sumungbatka koma babaen ti Tummim!”+ Ket da Jonatan ken Saul ti napili, isu a naammuan nga awan ti basol dagiti soldado.
42 Kinuna itan ni Saul: “Agbibinnunotkayo+ tapno maikeddengyo no siak wenno ni Jonatan nga anakko ti nagbasol.” Ket ni Jonatan ti napili.
43 Kinuna ni Saul ken Jonatan: “Ibagam kaniak, ania ti inaramidmo?” Insungbat ni Jonatan: “Nangramanak laeng met iti bassit a diro iti murdong ti sarukodko.+ Adtoyak! Nakasaganaak a matay!”
44 Kinuna ni Saul: “Kasta koma ti aramiden ti Dios ken nakarkaro pay koma ngem iti dayta. Masapul a matayka, Jonatan.”+
45 Ngem kinuna dagiti soldado ken Saul: “Rumbeng kadi a matay ni Jonatan a nangipaay iti dakkel a balligi*+ iti Israel? Saan a mabalin! Isapatami iti nagan ti sibibiag a Dios a ni Jehova, nga awan ti maregreg nga uray maysa a buokna; ta pinagballigi ti Dios dagiti inaramidna ita nga aldaw.”+ Gapu iti dayta, sinalbar* dagiti soldado ti biag ni Jonatan, isu a saan a natay.
46 Insardeng ni Saul ti panangkamatna kadagiti Filisteo, ket nagsubli dagiti Filisteo iti lugarda.
47 Pinapigsa ni Saul ti kinaarina iti intero nga Israel ket ginubatna ti amin a kabusorna a kas kadagiti Moabita,+ Ammonita,+ Edomita,+ ar-ari ti Zoba,+ ken kadagiti Filisteo;+ inabakna ida iti sadinoman a napananna.
48 Situtured ni Saul a nakigubat ket pinarmekna dagiti Amalekita+ ken insalakanna ti Israel manipud kadagiti kabusor.
49 Dagiti annak a lallaki ni Saul ket da Jonatan, Isvi, ken Malki-shua.+ Dua met ti annakna a babbai; Merab+ ti nagan ti inauna ken Mical+ ti inaudi.
50 Ti nagan ti asawa ni Saul ket Ahinoam nga anak ni Ahimaaz. Ti nagan ti pangulo ti armadana ket ni Abner+ nga anak ni Ner, nga angkel ni Saul.
51 Ni Kis+ ti ama ni Saul, ken ni Ner+ nga ama ni Abner ket anak ni Abiel.
52 Bayat ti panagari ni Saul, nakaro idi ti pannakigubatna kadagiti Filisteo.+ No adda makitana a napigsa ken natured a lalaki, alaenna a soldadona.+
Footnotes
^ Wenno “iti agarup kagudua ti talon a maarado ti agpareha a kalakian a baka iti agmalem.”
^ Lit., “iti daydi nga aldaw.”
^ Lit., “Iyatrasmo ta imam.”
^ Lit., “tinapay.”
^ Lit., “daga.”
^ Wenno “pannakailaksid.”
^ Wenno “pannakaisalakan.”
^ Lit., “sinubbot.”
