Ti Umuna a Samuel 21:1-15
21 Idi agangay, napan ni David idiay Nob+ nga ayan ni Ahimelec a padi. Kasta unay ti danag ni Ahimelec idi nakitana ni David, ket kinunana: “Apay a siksika ken awan kaduam?”+
2 Insungbat ni David ken ni Ahimelec a padi: “Adda imbilin ti ari nga aramidek, ngem kinunana kaniak, ‘Saanmo nga ibagbaga iti sabali ti maipapan iti mision a pangibaonak kenka ken kadagiti imbilinko nga aramidem.’ Nakitulagak kadagiti tattaok nga agkikitakami iti maysa a lugar.
3 No adda lima a tinapaymo, itedmo laengen kaniak, wenno ti aniaman nga adda.”
4 Ngem kinuna ti padi ken David: “Awan ti ordinario a tinapay ditoy, ngem adda nasantuan a tinapay+—no la ket ta saan a nakikaidda dagiti tattaom kadagiti babbai.”+
5 Insungbat ni David iti padi: “Talaga a saankami a nakikaidda kadagiti babbai a kas iti dati no mapanak makigubat.+ No nasantuan dagiti tattaok uray no gagangay laeng ti misionmi, anianto la ketdi itan!”
6 Inted ngarud ti padi ti nasantuan a tinapay+ ta isu ti adda. Kaik-ikkat daytoy a pamarang a tinapay iti imatang ni Jehova ta nasuktan iti baro a tinapay iti dayta nga aldaw.
7 Adda met idi sadiay ti maysa kadagiti adipen ni Saul a naipan iti imatang ni Jehova. Doeg ti naganna,+ maysa nga Edomita+ ken panguluen dagiti pastor ni Saul.
8 Dinamag ni David ken Ahimelec: “Adda kadi pika wenno espada ditoy? Diak naitugot ti espadak wenno dagiti armasko ta naganat ti mision ti ari.”
9 Kinuna ti padi: “Adda ditoy ti espada ni Goliat+ a Filisteo a pinataymo idiay Tanap* ti Elah.+ Nabungon iti lupot iti likudan ti efod.+ Alaem no kayatmo ta dayta laeng ti adda ditoy.” Kinuna ni David: “Awan kapada dayta. Itedmo kaniak.”
10 Pimmanaw ni David iti dayta met la nga aldaw ket intultuloyna nga itarayan+ ni Saul agingga nga idi agangay, nakadanon ken Ari Akis ti Gat.+
11 Kinuna kenkuana dagiti adipen ni Akis: “Saan aya a daytoy ni David nga ari ti Israel? Saan aya nga isu ti sinalsalaan ken kinankantaanda,‘Rinibu ti pinatay ni Saul,Pinullo a ribu ti pinatay ni David’?”+
12 Pinampanunot ni David dagita nga imbagada isu a napalalo ti butengna+ ken Ari Akis ti Gat.
13 Binaliwanna ti panagtigtignayna+ iti imatangda ken naginmamauyong bayat ti kaaddana kadakuada.* Sinuratsuratanna dagiti rikep ti ruangan ken binaybay-anna nga agayus ti katayna iti barbasna.
14 Kinuna ngarud ni Akis kadagiti adipenna: “Makitayo la ngaruden nga agbagtit daytoy a lalaki! Apay nga inyegyo kaniak?
15 Kasapulak kadi dagiti agbagtit a tattao isu nga inyegyo kaniak daytoy a bagtit? Rumbeng kadi a sumrek daytoy a tao iti balayko?”
