Ti Umuna a Samuel 28:1-25
-
Mapan ni Saul iti espiritista idiay En-dor (1-25)
28 Kadagidi nga aldaw, inummong dagiti Filisteo dagiti armadada tapno gubatenda ti Israel.+ Kinuna ni Akis ken David: “Kumuyogka kaniak ken dagiti tattaom a mapan makigubat.”+
2 Kinuna ni David ken Akis: “Sigurado nga ammom ti aramiden daytoy adipenmo.” Imbaga ni Akis ken David: “Pagbalinenka ngarud kas permanente a guardiak.”*+
3 Natay idin ni Samuel, ket sinangitan ti amin nga Israelita ken intabonda idiay Rama a siudadna.+ Ket inikkat ni Saul iti Israel dagiti espiritista ken mammadles.+
4 Naguummong dagiti Filisteo sada nagkampo idiay Sunem.+ Inummong met ni Saul ti intero nga Israel ket nagkampoda idiay Gilboa.+
5 Nagbuteng ni Saul idi makitana ti kampo dagiti Filisteo, ket kasta unay ti nerbiosna.+
6 Uray agkonsulta ni Saul ken Jehova,+ saan a pulos a sinungbatan ni Jehova, kadagiti man tagtagainep wenno babaen iti Urim+ wenno kadagiti propeta.
7 Kalpasanna, kinuna ni Saul kadagiti adipenna: “Isapulandak iti babai nga espiritista,+ ket mapanakto agkonsulta kenkuana.” Insungbat dagiti adipenna: “Adda babai nga espiritista idiay En-dor.”+
8 Maysa a rabii, nagisuot ni Saul iti sabali a bado tapno saan a mailasin sa napan iti babai a kaduana ti dua nga adipenna. Kinunana: “Pangngaasim ta usarem ti laingmo iti panagbuyon+ ket ibagam kaniak ti mapasamakto ken ipakitam kaniak daydiay ibagak kenka.”
9 Ngem kinuna kenkuana ti babai: “Ammom nga inikkat ni Saul dagiti espiritista ken mammadles iti Israel.+ Apay ngarud a padpadasennak nga allilawen tapno mapapatayak?”+
10 Insapata ni Saul kenkuana iti nagan ni Jehova: “Isapatak iti nagan ti sibibiag a Dios a ni Jehova, saankanto a makabasol iti daytoy a banag!”
11 “Siasino ngarud ti ipakitak kenka?” insaludsod ti babai. “Kayatko a makita ni Samuel,” kinuna ni Saul.
12 Idi makita ti babai ni “Samuel,”*+ nagikkis ket kinunana ken Saul: “Apay nga inallilawnak? Sika met gayam ni Saul!”
13 Ngem kinuna kenkuana ti ari: “Dika agbuteng. Ania ti makitkitam?” Simmungbat ti babai: “Makitkitak ti maysa a dios a rumrummuar iti daga.”
14 Dagus a sinaludsod ni Saul: “Ania ti itsurana?” Simmungbat ti babai: “Maysa a lakay ti makitkitak, ken awan manggas ti badona.”+ Ammo lattan ni Saul nga isu dayta ni “Samuel,” ket nagdumog ken nagruknoy kenkuana.
15 Kinuna ni “Samuel” ken Saul: “Apay nga is-istorbuennak babaen ti panangparuarmo kaniak?” Simmungbat ni Saul: “Adda nadagsen a problemak. Gubgubatendak dagiti Filisteo, pinanawannakon ti Dios ken saannakon a sungsungbatan, babaen man kadagiti propeta wenno kadagiti tagtagainep,+ isu nga aw-awaganka tapno ammuek no ania ti aramidek.”+
16 Kinuna ni “Samuel”: “Apay nga agsaludsodka kaniak idinto ta pinanawannakan ni Jehova+ ken nagbalinen a kabusormo?
17 Aramidento ni Jehova no ania ti sinaona babaen kaniak: Ikkatento ni Jehova kenka ti pagarian ket itedna iti sabali a tao, ni David.+
18 Gapu ta saanka a nagtulnog iti imbaga ni Jehova ken saanmo nga impatungpal ti napalalo nga ungetna maibusor kadagiti Amalekita,+ isu nga ar-aramiden ita ni Jehova kenka daytoy.
19 Iyawatnakanto ni Jehova ken ti Israel iti ima dagiti Filisteo.+ Inton bigat,+ sika ken dagiti annakmo a lallaki+ ket makikaduanto kaniak. Iyawatto met ni Jehova ti armada ti Israel kadagiti Filisteo.”+
20 Dagus a natumba ni Saul iti daga ket napalalo ti butengna kadagiti imbaga ni “Samuel.” Naglusdoy met gapu ta saan a nangnangan iti nagmalmalem ken nagpatpatnag.
21 Idi makita ti babai a mariribukan unay ni Saul, kinunana kenkuana: “Tinungpalko ti imbagam ken inrisgok ti biagko*+ ken inaramidko ti impaaramidmo.
22 Ita, denggem koma ti ibaga daytoy adipenmo. Palubosannak a mangidasar kenka iti tinapay, ket manganka koma tapno adda pamigsam nga agawid.”
23 Ngem saanna a kinayat, ket kinunana: “Saanak a mangan.” Ngem pinilpilit dagiti adipenna ken ti babai agingga a nayat met laeng. Bimmangon sa nagtugaw iti sopa.
24 Dinardaras a pinarti* ti babai ti nalukmeg a bakana sa nangala iti arina, ginamayna ken linutona a tinapay nga awan lebadurana.
25 Indasarna dayta ken Saul ken kadagiti adipenna, ket nanganda. Kalpasanna, nagrubbuatda a nagawid iti dayta a rabii.+
Footnotes
^ Lit., “kas parabantay iti ulok iti amin nga aldaw.”
^ Wenno “ti nagparang a kasla ni Samuel.”
^ Wenno “inkabilko ti kararuak iti imak.”
^ Wenno “nga indaton.”
