Surat ken Filemon 1:1-25
1 Siak ni Pablo, maysa a balud+ maigapu ken Kristo Jesus, agraman ti kabsattayo a ni Timoteo,+ nagsuratak kenka Filemon a patpatgenmi a katrabahuan,
2 ken ni Apia a kabsatmi a babai, ken ni Arquipo+ a padami a soldado, ken iti kongregasion nga adda iti balaymo:+
3 Adda koma kadakayo ti nagpaiduma a kinaimbag ken talna manipud iti Dios nga Amatayo ken iti Apo a ni Jesu-Kristo.
4 Kanayon nga agyamanak iti Diosko no dakamatenka kadagiti kararagko,+
5 ta madamdamagko ti maipapan iti pammatim ken iti ayatmo ken Apo Jesus ken iti amin a nasantuan.
6 Ikararagko a ti pammati nga adda kenka ken iti dadduma ti mangtignay kenka a mangbigbig iti tunggal naimbag a banag nga adda kadatayo babaen ken Kristo.
7 Ta nariknak ti dakkel a rag-o ken liwliwa idi nadamagko ti ayatmo, ta ti puso* dagiti nasantuan ket nabang-aran gapu kenka, kabsat.
8 Gapu iti daytoy, nupay dakkel ti wayawayak nga agsao mainaig ken Kristo tapno bilinenka a mangaramid iti umiso,
9 kaykayatko ti agpakaasi kenka maibatay iti ayat, ta ammom a siak, ni Pablo, ket lakayen, wen, maysan a balud maigapu ken Kristo Jesus.
10 Agpakpakaasiak kenka para iti anakko, ni Onesimo,+ ta nagbalinak nga ama kenkuana+ bayat nga addaak iti pagbaludan.*
11 Awan idi ti serserbina kenka, ngem adu itan ti usarna kadata.
12 Ibaonko nga agsubli kenka, wen, ti mismo a pusok.*
13 Kayatko koma nga agtalinaed a kaduak ditoy kas kasukatmo nga agserbi kaniak bayat ti pannakaibaludko maigapu iti naimbag a damag.+
14 Ngem diak kayat nga aramiden ti aniaman no awan ti pammalubosmo, tapno saanka a mapilpilit nga agaramid iti naimbag no di ket situtulokka koma.+
15 Nalabit daytoy ti makagapu a simmina kenka iti apagbiit,* tapno mapasublim iti agnanayon,
16 saanen a kas adipen,+ no di ket nasaysayaat pay ngem iti adipen, kas kapammatian. Ipatpategko unay,+ ket ad-addanto nga ipategmo kas adipen ken kapammatian iti Apo.
17 Isu a no ibilangnak a gayyem,* siaayat nga awatem a kas iti panangawatmo koma kaniak.
18 Kasta met, no nakabasol wenno nakautang kenka, siak ti singirem.
19 Siak ni Pablo, ti nangisurat iti daytoy: Bayadakto dayta—saanen a kasapulan nga ibagak nga utangmo kaniak uray ti biagmo.
20 Wen, kabsat, ipaaymo koma kaniak daytoy a tulong mainaig iti Apo; bang-aram ti pusok* maigapu iti Kristo.
21 Nagsuratak kenka ta agtalekak a patgam ti kiddawko, ta ammok nga aramidemto ti ad-adda pay ngem iti imbagak.
22 Ngem karaman iti dayta, mangisaganaka met iti pagdagusak, ta mangnamnamaak a babaen kadagiti kararagyo, makasubliakto kadakayo.*+
23 Pakpakomustaannaka ni Epafras+ a padak a naibalud gapu ken Kristo Jesus,
24 kasta met da Marcos, Aristarco,+ Demas,+ ken Lucas,+ dagiti katrabahuak.
25 Adda koma kadakayo ti nagpaiduma a kinaimbag ni Apo Jesu-Kristo gapu iti espiritu nga ipakpakitayo.
Footnotes
^ Wenno “nadungngo a panagayat.”
^ Lit., “bayat a nakakawarak.”
^ Wenno “nadungngo a panagayatko.”
^ Lit., “maysa nga oras.”
^ Wenno “kadua.”
^ Wenno “nadungngo a panagayatko.”
^ Wenno “mawayawayaanakto para kadakayo.”