Salmo 105:1-45
-
Dagiti aramid ni Jehova a mangipakita a matalek kadagiti tattaona
105 Agyamankayo ken Jehova,+ umawagkayo iti naganna,Ipakaammoyo dagiti aramidna kadagiti tattao!+
2 Kantaanyo, agkantakayo iti panangidaydayaw* kenkuana,Utobenyo* ti amin a nakaskasdaaw nga aramidna.+
3 Ipagpannakkelyo ti nasantuan a naganna.+
Agrag-o koma ti puso dagidiay mangsapsapul ken Jehova.+
4 Birokenyo ni Jehova+ ken ti pigsana.
Itultuloyyo a sapulen ti rupana.*
5 Laglagipenyo dagiti nakaskasdaaw nga inaramidna,Dagiti milagro ken panangukomna,+
6 Dakayo a kaputotan* ni Abraham nga adipenna,+Dakayo nga annak ni Jacob a pinilina.+
7 Isu ni Jehova a Diostayo.+
Mangukom iti intero a daga.+
8 Agnanayon a laglagipenna ti tulagna,+Ti kari nga imbagana,* iti sangaribu a henerasion,+
9 Ti tulagna ken Abraham,+Ken ti insapatana ken Isaac,+
10 Nga inaramidna a bilin ken Jacob,Ken kas agnanayon a tulag iti Israel,
11 Idi kinunana: “Itedkonto kadakayo ti daga ti Canaan,+Kas nairanta a tawidyo.”+
12 Bassit pay laeng idi ti bilangda,+Wen, nakabasbassit, ken ganggannaetda idi iti daga.+
13 Nagakar-akarda iti nagduduma a nasion,Iti nagduduma a pagarian ken ili.+
14 Dina impalubos nga irurumen ida ti asinoman,+No di ket tinubngarna dagiti ari maigapu kadakuada,+
15 A kinunana: “Diyo sagiden dagiti dinutokak,*Ken dikay agaramid iti dakes kadagiti propetak.”+
16 Nangyeg iti nakaro a bisin iti daga;+Insardengna ti abastoda a taraon.*
17 Imbaonna nga immun-una kadakuada ni JoseA nailako tapno agbalin nga adipen.+
18 Kinadenaanda* dagiti sakana,+Kinawaranda iti landok ti tengngedna;
19 Agingga a napaneknekan a pudno ti imbagana,+Ti sao ni Jehova ti nangpasudi kenkuana.
20 Imbilin ti ari ti pannakaruk-atna,+Ti agturay kadagiti tattao ti nangwayawaya kenkuana.
21 Dinutokanna nga agaywan iti sangakabbalayannaKen administrador iti amin a sanikuana,+
22 Tapno adda autoridadna* kadagiti prinsipena maitunos iti pagayatannaKen maisurona ti kinasirib kadagiti lallakay nga umilina.+
23 Ket napan ni Israel idiay Egipto,+Ken nakipagnaed ni Jacob iti daga ti Ham.
24 Pinaadu ti Dios ti annak dagiti tattaona;+Pinagbalinna ida a napigpigsa ngem kadagiti kabusorda,+
25 Binay-anna nga agbaliw ti pusoda tapno guraenda dagiti tattaona,Ken tapno planuenda ti maibusor kadagiti adipenna.+
26 Imbaonna ni Moises+ nga adipenna,Ken ni Aaron+ a pinilina.
27 Impakitada kadakuada dagiti pagilasinan nga impaayna,Ken dagiti milagrona iti daga ti Ham.+
28 Pinagsipngetna ket simmipnget ti daga;+Tinungpalda dagiti bilinna.
29 Pinagbalinna a dara dagiti danumdaKen pinatayna dagiti lamesda.+
30 Nagwaras dagiti tukak iti dagada,+Uray kadagiti kuarto ti palasio ti arida.
31 Binilinna nga umarak dagiti bingraw*Ken dagiti sepsep iti intero a teritoriada.+
32 Pinagtinnagna ti uraro imbes a tudoKen nangyeg kadagiti kimat* iti dagada.+
33 Dinadaelna dagiti kaubasan ken higosdaKen tinumbana dagiti kaykayo iti teritoriada.
34 Binilinna nga umarak dagiti dudon,Dagiti rineprep a babassit a dudon.+
35 Kinnanda ti amin a mulmula,Ken inibusda dagiti apit iti daga.
36 Pinatayna ti amin nga inauna nga annakda,+Dagiti inauna a putotda.
37 Inruarna dagiti tattaona, nagawitda kadagiti pirak ken balitok;+Ket awan ti asinoman nga agkakapsut kadagiti tribuna.
38 Naragsakan ti Egipto idi pimmanawda,Ta mabutbutengda kadagiti Israelita.*+
39 Nangikabil iti ulep a manglinged kadakuada+
Ken apuy a manglawag kadakuada iti rabii.+
40 Nagdawatda ket inikkanna ida iti pugo;+Kanayon a pinennekna ida iti tinapay manipud langit.+
41 Linuktanna ti dakkel a bato ket pimsuak ti danum;+Kasla karayan a nagayus iti desierto.+
42 Ta malaglagipna ti nasantuan a karina ken Abraham nga adipenna.+
43 Isu a siraragsak nga inruarna dagiti tattaona,+Nagkakanta a sirarag-o dagiti pinilina.
44 Intedna kadakuada dagiti daga dagiti nasion;+Tinawidda dagiti nagbannogan ti dadduma a nasion,+
45 Tapno makapagtulnogda kadagiti bilinna+Ken tungpalenda dagiti lintegna.
Idaydayawyo ni Jah!*
Footnotes
^ Wenno mabalin nga, “Isarsaritayo.”
^ Wenno “agputarkayo iti musika.”
^ Wenno “kaaddana.”
^ Lit., “bin-i.”
^ Lit., “Ti sao nga imbilinna.”
^ Wenno “pinulotak.”
^ Lit., “Tinukkolna ti tunggal kayo ti tinapay.” Mabalin a tumukoy iti kayo a pakaibitinan dagiti maidulin a tinapay.
^ Lit., “Pinarigatda.”
^ Lit., “maisinggalut.”
^ Kita ti ngilaw nga agkagat.
^ Wenno “gumilgil-ayab nga apuy.”
^ Lit., “kadakuada.”
^ Wenno “Hallelujah!” Ti “Jah” ket napaababa a porma ti nagan a Jehova.