Salmo 114:1-8
114 Idi rimmuar ti Israel idiay Egipto,+Idi pinanawan ti sangakabbalayan ni Jacob dagiti agsasao iti sabali a lengguahe,
2 Nagbalin ti Juda a santuario* ti Dios,Ken ti Israel a pagturayanna.+
3 Nakita dayta ti baybay ket pimmanaw;+Immatras ti Jordan.+
4 Naglagtolagto dagiti bantay a kas kadagiti kalakian a karnero,+Naglagtolagto dagiti turod a kas kadagiti kordero.
5 O baybay, apay a pimmanawka?+
O Jordan, apay nga immatraska?+
6 O bambantay, apay a naglagtolagtokayo a kas kadagiti kalakian a karnero?
O turturod, apay a naglagtolagtokayo a kas kadagiti kordero?
7 Agbutengka, O daga, gapu iti Apo,Gapu iti Dios ni Jacob,+
8 A namagbalin iti dakkel a bato a danaw ti danum,Iti dakkel ken natangken a bato nga ubbog ti danum.+
Footnotes
^ Wenno “nasantuan a disso.”