Salmo 30:1-12
-
Panagragsak kalpasan ti panagsangit
-
Agnanayon ti kinaimbag ti Dios (5)
-
Kanta ti inagurasion ti balay. Salmo ni David.
30 Itan-okka, O Jehova, ta insalakannak;*Saanmo nga impalubos a pagkakatawaandak dagiti kabusorko.+
2 O Jehova a Diosko, nagpatulongak kenka, ket pinaimbagnak.+
3 O Jehova, inaonnak iti Tanem.*+
Pinagtalinaednak a sibibiag; saanmo nga impalubos a matnagak iti abut.*+
4 Agkantakayo iti panangidaydayaw* ken Jehova, dakayo a napudno kenkuana,+Agyamankayo iti nasantuan a naganna;*+
5 Ta apagbiit laeng ti ungetna iti maysa a tao,+Ngem agnanayon ti kinaimbagna iti daydiay bembendisionanna.*+
Mabalin nga adda panagsangit iti rabii, ngem iti bigat, adda panagragsak.+
6 Idi awan ti pakariribukak, kinunak:
“Diakto pulos maan-ano.”*
7 O Jehova, idi bembendisionannak,* pinagbalinnak a napigsa a kas iti bantay.+
Ngem nagbutengak idi tinallikudannak.+
8 O Jehova, kanayon nga immawagak kenka;+Ken kanayon a nagpakpakaasiak kenka a paraburannak, O Jehova.
9 Ania ti pagimbaganna ti ipapatayko,* ti iyuulogko iti abut?*+
Maidaydayawnaka kadi ti tapok?+ Maibagana ngata ti kinamatalekmo?+
10 Denggennak, O Jehova, ken kaasiannak.+
O Jehova, tulongannak.+
11 Imbes a maladingitanak, pinagsalanak gapu iti ragsak;Inuksobmo ti nakersang a badok, ket kinawesannak iti rag-o,
12 Tapno kantaanka iti pakaidaydayawam ken diak agulimek.
O Jehova a Diosko, idaydayawka iti agnanayon.
Footnotes
^ Wenno “inaonnak.”
^ Wenno “tanem.”
^ Wenno “Agputarkayo iti musika.”
^ Lit., “pakalaglagipanna.”
^ Wenno “parparaburanna.”
^ Wenno “agibar-ibar (agdiwengdiweng).”
^ Wenno “parparaburannak.”
^ Lit., “darak.”
^ Wenno “tanem.”
