Salmo 64:1-10
-
Pannakasalaknib manipud kadagiti nalimed nga idadarup
-
“Puntaanto ida ti Dios” (7)
-
Iti direktor. Kanta ni David.
64 O Dios, denggem ti bosesko bayat nga agpakpakaasiak.+
Saluadam ti biagko iti nakabutbuteng nga idadarup ti kabusor.
2 Salaknibannak kadagiti nalimed a plano dagiti managdakdakes,+Manipud iti ummong dagiti managbasol.
3 Patademenda ti dilada a kas iti espada;Ibiatda a kas iti pana dagiti naulpit a sasaoda,
4 Tapno puntiriaenda dagiti naimbag manipud kadagiti paglemlemmenganda;Biglaenda a puntaan a dida man la agbuteng.
5 Aramidenda latta ti dakes a panggepda;*Pagtutulaganda no kasano nga ilemmengda dagiti pangsiloda.
Ibagbagada: “Asino ti makakita kadagita?”+
6 Agpanunotda kadagiti baro a pamay-anda nga agaramid iti dakes;Sililimed a planuenda ti nasikap nga estratehiada;+Saan a matukod ti adda iti isip ken puso ti tunggal maysa kadakuada.
7 Ngem puntaanto ida ti Dios;+Ket dagus a masugatda iti pana.
8 Ti mismo a dilada ti mangdadaelto kadakuada;+Agwingiwingto ti amin a makakita kadakuada.
9 Ket agbutengto ti amin a tattao,Ipakaammodanto dagiti inaramid ti Dios,Ket maawatandanto dagiti gapuananna.+
10 Agragsakto ti nalinteg gapu ken Jehova ket agkamangto kenkuana;+Nakaragragsakto* ti amin a nalinteg ti panagpuspusona.
