Kingdom News No. 37

Sangalubongan a Mensahe

Asidegen nga Agpatingga ti Palso a Relihion!

▪ Ania ti palso a relihion?

▪ Kasano nga agpatingga?

▪ Kasano nga apektarannaka dayta?

 Ania ti Palso a Relihion?

Mariribukanka kadi kadagiti krimen a maar-aramid iti nagan ti relihion? Mariknam kadi nga awan ti hustisia gapu kadagiti gubat, terorismo, ken kinadakes nga ar-aramiden dagiti agkunkuna nga agserserbi iti Dios? Apay a relihion ti kasla ramut ti nakaad-adu a parikut?

Saan nga amin a relihion ti mapabasol no di ket ti palso a relihion. Ni Jesu-Kristo, a mararaem iti tay-ak ti relihion, imbatadna a ti palso a relihion ket mangpataud kadagiti dakes nga aramid, a kas iti “rinuker a kayo mangpataud iti awan pategna a bunga.” (Mateo 7:15-17) Ania a bunga ti patauden ti palso a relihion?

Ti Palso a Relihion . . .

■ MAKIRAMRAMAN ITI GUBAT KEN ITI POLITIKA: Kuna ti pagiwarnak nga Asiaweek: “Iti Asia ken iti dadduma pay a lugar, dagiti agtuturay a mabisin iti pannakabalin konkontrolenda ti narelihiosuan a rikrikna dagiti tattao tapno maaramidda ti kaykayatda.” Gapu iti dayta, mamakdaar ti pagiwarnak: “Dandanin agmauyong ti lubong.” Maysa a mabigbigbig a lider ti relihion idiay Estados Unidos ti nangikuna iti kastoy: “Masapul a papatayenyo dagiti terorista tapno agsardengda a mangpappapatay.” Ti solusionna? “Iti nagan iti Apo, papatayenyo amin a terorista.” Maisupadi iti dayta, kuna ti Biblia: “No ti asinoman kunaenna: ‘Ay-ayatek ti Dios,’ ket kaskasdi a gurguraenna ni kabsatna, isu ket naulbod.” (1 Juan 4:20) Kinuna pay ketdi ni Jesus: “Itultuloyyo nga ayaten dagiti kabusoryo.” (Mateo 5:44) Mano ti ammom a relihion a makipaspaset iti gubat dagiti miembrona?

■ SAAN NGA UMISO TI ISURSURONA: Isursuro ti kaaduan a relihion a ti kararua wenno espiritu ket saan a makita a paset ti tao nga agtultuloy nga agbiag no matay ti bagi. Gapu iti daytoy a sursuro, adu a relihion ti manggunggundaway kadagiti miembroda, a singirenda ida tapno ikararaganda dagiti simmina kano a kararua. Ngem sabali ti isursuro ti Biblia. “Ti kararua nga agbasbasol—dayta a mismo matayto.” (Ezequiel 18:4) “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Insuro ni Jesus a mapagungarto dagiti natay​—banag a saanen a kasapulan no agpayso nga addaan dagiti tattao iti imortal a kararua. (Juan 11:11-25) Isursuro kadi ti relihionmo a saan a matay ti kararua?

■ PAMPANUYNOYANNA TI SEKSUAL NGA IMORALIDAD: Iti dadduma a pagilian, ipalubos dagiti simbaan a maordenan a padi dagiti homoseksual ken idagdagadagda iti gobierno a palubosanna ti panagasawa dagiti agkasekso. Uray dagiti simbaan a mangkonkondenar iti imoralidad pampanuynoyanda dagiti lider ti relihion a mangab-abuso kadagiti ubbing. Ngem ania ti isursuro ti Biblia? Nabatad a kunana: “Dikay payaw-awan. Uray dagiti mannakiabig, wenno dagiti managrukbab iti idolo, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki . . . didanto tawiden ti pagarian ti Dios.” (1 Corinto 6:9, 10) Adda kadi ammom a relihion a mangpampanuynoy iti seksual nga imoralidad?

 Ania ti masakbayan dagiti relihion a mangpatpataud iti rinuker a bunga? Impakdaar ni Jesus: “Tunggal kayo a saan a mangpatpataud iti nasayaat a bunga mapukan ken maibelleng iti apuy.” (Mateo 7:19) Wen, mapukan ken madadaelto ti palso a relihion! Ngem kasano ken kaano a mapasamak daytoy? Masarakan ti sungbat iti naimpadtuan a sirmata a nailanad iti libro ti Biblia nga Apocalipsis, kapitulo 17 ken 18.

Kasano nga Agpatingga ti Palso a Relihion?

Iladawanmo iti panunotmo ti maysa a balangkantis a nakasakay iti nakabutbuteng nga animal. Addaan daytoy nga animal iti pito nga ulo ken sangapulo a sara. (Apocalipsis 17:1-4) Siasino ti iladladawan ti balangkantis? Im-impluensiaanna dagiti “ar-ari ti daga.” Nakakawes iti purpura, agus-usar iti insienso, ken nakabakbaknang. Kanayonanna, ‘inyaw-awanna dagiti amin a nasion’ babaen kadagiti espiritistiko nga aramidna. (Apocalipsis 17:18; 18:12, 13, 23) Tulongannatayo ti Biblia a mangilasin a daytoy a balangkantis ket maysa a sangalubongan a narelihiosuan nga organisasion. Saan laeng a maysa a relihion ti iladladawanna no di ket amin a relihion a mangpatpataud iti rinuker a bunga.

Ti animal a nagsakayan ti balangkantis iladladawanna dagiti napolitikaan a pannakabalin ti lubong. * (Apocalipsis 17:10-13) Nakasakay ti palso a relihion iti daytoy napolitikaan nga animal, nga ikagkagumaanna nga impluensiaan dagiti desisionna ken iturturongna dayta.

Ngem iti din agbayag, adda nakaskasdaaw a mapasamak. “Ti sangapulo a sara a nakitam, ken ti atap nga animal, dagitoy guraendanto ti balangkantis ket pagbalinendanto a walangwalang ken lamolamo, ket lamutendanto dagiti nalasag a pasetna ket isu puorandanto a naan-anay iti apuy.” (Apocalipsis 17:16) Iti kellaat ken nakakigkigtot a pamay-an, dagiti napolitikaan a pannakabalin ti lubong bueltaendanto ti palso a relihion ket naan-anay a dadaelenda dayta! Ania ti mangtignay kadakuada a mangaramid iti dayta? Sumungbat ti libro nga Apocalipsis: “Ti Dios inkabilna dayta kadagiti pusoda ti panangitungpalda ti panunotna.” (Apocalipsis 17:17) Wen, ti Dios singirennanto ti palso a relihion gapu kadagiti makarimon a banag nga inaramidna iti nagan ti Dios. Buyogen ti naan-anay a kinahustisia, ti mismo a napolitikaan a kaayan-ayat ti palso a relihion ti usaren ti Dios a mangdadael iti dayta.

Ania ti masapul nga aramidem tapno dika mairaman iti pagbanagan ti palso a relihion? “Rummuarkayo kenkuana, tattaok.” Dayta ti idagdagadag ti mensahero ti Dios. (Apocalipsis 18:4) Ngarud, itan ti tiempo a panangpanaw iti palso a relihion! Ngem kayatna kadi a sawen a tallikudamon ti pammatim iti Dios? Saan, ta nalidem ti masakbayan dagiti di mangbigbig iti Dios. (2 Tesalonica 1:6-9) Ti laeng pudno a relihion ti kakaisuna a pagkamangan. Kasano a mailasinmo ti pudno a relihion?

 No kasano a Mailasin ti Pudno a Relihion

Ania a nasayaat a bunga ti rumbeng a patauden ti pudno a relihion?​—Mateo 7:17.

Ti Pudno a Relihion . . .

■ IPARPARANGARANGNA TI AYAT: Dagiti pudno a managdaydayaw ket ‘saan a paset ti lubong,’ saanda a nasinasina gapu iti puli wenno kultura, ken iparparangarangda ti ‘ayat iti maysa ken maysa.’ (Juan 13:35; 17:16; Aramid 10:34, 35) Imbes nga agpipinnatayda, situtulokda a matay para iti tunggal maysa.​—1 Juan 3:16.

■ AGPANNURAY ITI SAO TI DIOS: Imbes a “tradision” ken “bilbilin dagiti tattao kas doktrina” ti isursuro ti pudno a relihion, naibasar ti doktrinana iti Sao ti Dios, ti Biblia. (Mateo 15:6-9) Apay? Gapu ta “amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag.”​—2 Timoteo 3:16.

■ PABILGENNA DAGITI PAMILIA KEN ITANDUDONA DAGITI NANGATO A MORAL A PAGALAGADAN:

Isursuro ti pudno a relihion kadagiti assawa a lallaki nga “ayatenda dagiti assawada a kas kadagiti bukodda a bagi,” tulonganna dagiti assawa a babbai a mangpatanor iti ‘nauneg a panagraem iti assawada,’ ken isurona dagiti annak nga ‘agtulnog kadagiti nagannak kadakuada.’ (Efeso 5:28, 33; 6:1) Kanayonanna, masapul a mapagulidanan iti moral dagidiay naikkan iti annongen.​—1 Timoteo 3:1-10.

Adda kadi relihion a makatungpal kadagitoy a pagalagadan? Kastoy ti kuna ti libro a Holocaust Politics, a naipablaak idi 2001: “No la koma ad-adu a tattao ti nangalagad iti ikaskasaba ken al-alagaden dagiti Saksi ni Jehova, saan koma a napasamak ti Holocaust ken awan koman ti mapaspasamak ditoy lubong a panagpipinnatay gapu iti puli.”

Kinapudnona, iti 235 a pagilian, saan laeng nga ikaskasaba dagiti Saksi ni Jehova dagiti moral a pagalagadan ti Biblia no di pay ket agbibiagda a mayannurot kadagita. Idagadagmi a kiddawem kadagiti Saksi ni Jehova a tulongandaka a mangammo kadagiti iparebbeng ti Dios tapno makapagdayawka iti pamay-an a makaay-ayo kenkuana. Nasken nga agtignayka itan. Dika agtaktak. Asidegen nga agpatingga ti palso a relihion!​—Sofonias 2:2, 3.

No kayatmo ti ad-adu pay nga impormasion maipapan iti naibatay iti Biblia a mensahe nga ikaskasaba dagiti Saksi ni Jehova, agsuratka kadakuada iti adres nga adda iti baba.

□ Kayatko ti maaddaan iti broshur nga Agtultuloyka nga Agbantay!

□ Interesadoak iti libre a panagadal iti Biblia iti pagtaengan.

[Footnote]

[Blurb iti panid 3]

Ti palso a relihion im-impluensiaanna dagiti “ar-ari ti daga”

[Blurb iti panid 3]

“Rummuarkayo kenkuana, tattaok”