Addaanka Aya iti Imortal nga Espiritu?

ADDA kadi biag kalpasan ti ipapatay? Rinibu a tawenen a maburburtiaan ti sangatauan iti dayta a saludsod. Iti adun a panawen, inut-utob dayta ti tattao iti tunggal kagimongan ket nadumaduma ti nabukelda a pammati.

Iti intero a lubong, patien ti adu tattao nga adda sumina nga “espiritu” no matay ti maysa a tao. Pudno kadi nga adda banag iti uneg ti tao a pumanaw iti bagi no matay ket agtultuloy nga agbiag? Ania ti espiritu nga adda iti sibibiag a tao? Aniat’ mapasamak iti dayta no mataytayo? Mangted ti naipaltiing a Sao ti Dios, ti Biblia, iti pudpudno ken makapnek a sungbat kadagitoy a saludsod.

Ania ti Espiritu?

Iti Biblia, ti sasao a naipatarus nga “espiritu” nangnangruna a kaipapananna ti “anges.” Ngem saan laeng a basta panaganges ti iparparipiripna. Kas pagarigan, kuna ni Santiago a mannurat iti Biblia: “Ti bagi nga awanan espiritu ket natay.” (Santiago 2:26) No kasta, ti espiritu isu ti mangbibiag iti bagi.

Daytoy a mangbibiag a puersa ket saan a basta anges, wenno angin, nga aglasat kadagiti bara. Apay a saan? Agsipud ta no simmardengen ti panaganges, agtalinaed pay ti biag kadagiti selula ti bagi iti apagbiit—“iti sumagmamano a minuto,” sigun iti The World Book Encyclopedia. Dayta ti makagapu a mabalin nga agballigi ti panagregget a mangpaanges manen, ken mabalin nga iyalis dagiti kameng ti bagi ti maysa a tao iti sabali. Ngem no naiddepen ti rissik ti biag kadagiti selula ti bagi, awan mamaayen ti panagregget a mangpasubli iti biag. Amin nga anges ditoy lubong saanda a kabaelan a biagen manen uray ti maysa laeng a selula. No kasta, ti espiritu  ket di makita a puersa ti biag—ti rissik ti biag—a mamagtalinaed kadagiti selula a sibibiag. Mataginayon daytoy a puersa ti biag babaen ti panaganges.—Job 34:14, 15.

Kadagiti tattao laeng aya nga aktibo dayta nga espiritu? Tulongannatay ti Biblia a makagteng iti umiso a konklusion maipapan itoy a banag. Insurat ni masirib nga Ari Solomon: “Siasino ti makaammo iti espiritu ti annak ti sangatauan, no dayta ket umuli nga agpangato; ken ti espiritu ti animal, no dayta ket umulog nga agpababa iti daga?” (Eclesiastes 3:21) Gapuna, naikuna a dagiti animal ken kasta met ti tattao addaanda iti espiritu. Kasano a kasta?

Mayarig ti espiritu, wenno puersa ti biag, iti koriente nga agtartaray iti maysa a makina wenno de koriente nga alikamen. Maaramat ti di makita nga elektrisidad a pangpaandar, depende iti alikamen a paandarenna. Kas pagarigan, magangtan ti stove, mangipaay ti computer iti impormasion ken agkuenta, ken ti telebision mangpataud kadagiti ladawan ken uni. Kaskasdi, di pulos maaramidan ti koriente ti magapuanan ti alikamen a paandarenna. Puersa laeng dayta. Iti umasping a pamay-an, saan a maaramidan ti puersa ti biag ti aniaman a kabaelan dagiti parsua a pagtignayenna. Awanan iti personalidad, di makapagpanunot. Dagiti tattao ken animal agpada nga “addaanda amin ti maymaysa nga espiritu.” (Eclesiastes 3:19) Gapuna, no matay ti maysa a tao, saan nga agbiag ti espiritu iti sabali a lubong kas espiritu a parsua.

Ania ngarud ti kasasaad dagiti natay? Ken aniat’ mapasamak iti espiritu no matay ti tao?

“Iti Tapok Agsublikanto”

Idi sipapakinakem a sinupring ti immuna a tao a ni Adan ti bilin ti Dios, kinuna kenkuana ni Jehova: “Iti ling-et ta rupam  mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.” (Genesis 3:19) Ayan ni Adan sakbay a parsuaen ni Jehova manipud tapok? Ay ket, awan! Awan pay laeng idi. Gapuna, idi imbaga ni Jehova a Dios nga “agsubli iti daga” ni Adan, kayatna a sawen a matay ni Adan. Saan nga umakar ni Adan iti espiritu a disso. Awanan biag manen inton matay, awanen. Ipapatay ti dusana—kaawan ti biag—saan nga iyaakar iti sabali a lubong.—Roma 6:23.

Dagiti met ngay dadduma pay a natay? Naibatad iti Eclesiastes 9:5, 10 ti kasasaad dagiti natay, a pakabasaantayo iti kastoy: “Dagiti natay dida ammo ti aniaman . . . Awan ti aramid, awan gakat, awan pannakaammo wenno sirib, idiay tanem.” (Moffatt) No kasta, ti ipapatay ket kinaawan. Insurat ti salmista a no matay ti tao, “ti espirituna pumanaw, isu agsubli iti dagana; iti dayta nga aldaw mapukaw dagiti panunotna.”—Salmo 146:4.

Nalawag, awan puot dagiti natay, di aktibo. Dida ammo ti aniaman. Saandaka a makita, mangngeg, wenno makasao. Saandaka met a matulongan wenno madangran. Dika ngarud pagbutngan ti natay. Ngem kasano a ti espiritu “pumanaw” iti tao iti kanito a matay?

Ti Espiritu “Agsubli iti Pudno a Dios”

Kuna ti Biblia a no matay ti tao, “ti met laeng espiritu agsubli iti pudno a Dios a nangted iti dayta.” (Eclesiastes 12:7) Kayatna kadi a sawen a ti espiritu a bagi literal nga agdaliasat iti law-ang a mapan iti saklang ti Dios? Saan a pulos! Ti panagusar ti Biblia iti sao nga “agsubli” saanna a kaipapanan ti aktual nga iyaakar manipud maysa a disso a mapan iti sabali. Kas pagarigan, naibaga kadagiti di matalek nga Israelita: “‘Agsublikayo kaniak, ket agsubliakto kadakayo,ʼ kinuna ni Jehova ti buybuyot.” (Malakias 3:7) Ti ‘isusubli’ dagiti Israelita ken Jehova kaipapananna ti panagbaw-ing manipud dakes a dana sa makitunos manen iti nalinteg a dana ti Dios. Ket ti ‘isusubli’ ni Jehova iti Israel kaipapananna ti panangiturongna manen ti atensionna iti ilina.  Kadagitoy dua a kaso, ti ‘isusubli’ ramanenna ti kababalin, saan a literal nga iyaalis manipud maysa a lugar nga agturong iti sabali.

Umasping iti dayta, iti ipapatay awan ti mapasamak nga aktual nga iyaakar manipud daga nga agturong iti nailangitan a disso no “agsubli” ti espiritu iti Dios. Laglagipem, ti espiritu isu ti puersa ti biag. No awanen iti tao dayta a puersa, ti Dios laengen ti makaisubli iti dayta kenkuana. Ngarud, ti espiritu “agsubli iti pudno a Dios” ta interamente nga agpannuray iti Dios ti aniaman a namnama dayta a tao iti masanguanan a biag.

Alaentay a pagarigan ti kunaen ti Kasuratan maipapan iti ipapatay ni Jesus. Kuna ni Lucas a mannurat iti ebanghelio: “Ni Jesus immawag a buyogen ti natbag a timek ket kinunana: ‘Ama, kadagita imam italekko ti espirituk.’ Idi naisaonan daytoy, nauyos ti biagna.” (Lucas 23:46) Idi pimmanaw ken Jesus ti espirituna, saan a literal a nagpalangit. Saan a nagungar ni Jesus manipud kadagiti natay agingga iti maikatlo nga aldaw. Ket 40 pay nga aldaw ti napalabas sa immuli idiay langit. (Aramid 1:3, 9) Nupay kasta, idi matayen, intaklin ni Jesus ti espirituna ken ni Amana, a nagtalek a naan-anay iti kabaelan ni Jehova a mangpagungar kenkuana.

Wen, ti Dios laeng ti makabael a mangpagungar iti maysa a tao. (Salmo 104:30) Anian nga engrande a namnama ti luktan daytoy!

Sierto a Namnama

Kuna ti Biblia: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda.” (Juan 5:28, 29) Wen, inkari ni Jesu-Kristo nga amin dagidiay adda iti lagip ni Jehova agungardanto, wenno agbiagda manen. Imbes a makapaladingit nga anunsio nga adda natay a tattao, maipakaammonto dagiti makaparag-o a damag dagidiay napagungar. Anian a ragsak ti panangabrasanto kadagiti ay-ayaten nga aggapu iti tanem!

 Kayatmo kadi nga ad-adu pay ti maammuam no kasano a magunggonaanka iti daytoy inted-Dios a namnama? Awisendaka nga agsurat iti address nga adda iti baba maipaay iti kopia ti broshur nga Espiritu Dagiti Natay—Matulongandakay Aya Wenno Dangrandakayo? Talaga Kadi nga Addada?

Malaksid no adda sabali a naipakita, amin a naadaw iti Biblia ket naggapu iti Baro a Lubong a Patarus ti Nasantuan a Kasuratan.