Siasino a Talaga ni Jesu-Kristo?

“URAY dagiti adu a tattao a saan a Kristiano patienda nga Isu ket naindaklan ken masirib a mannursuro. Pudno nga isu ti maysa kadagiti kabibilgan pay laeng a tao a nagbiag.” (The World Book Encyclopedia) Siasino daytoy a tao? Ni Jesu-Kristo, ti pundador ti Kristianidad. Ammoyo kadi no siasino ni Jesus? Maapektaranna aya ti biagyo?

Nailanad iti Biblia dagiti pasamak iti ministerio ni Jesus babaen iti uppat a historikal nga aramid a maawagan iti Ebanghelio. Kasano ti kinaagpaypayso dagitoy a salaysay? Kalpasan ti panangusigna kadagita, insurat ti nalatak a historiador a ni Will Durant: “No kunaen a ti sumagmamano a kadawyan a tattao iti maysa a kaputotan ket nakaparboda iti nakabilbileg ken makaallukoy a personalidad, nakatantan-ok a prinsipio ti moral ken makaparegta unay a sirmata ti natauan a panagkakabsat, daytat’ maysa a milagro nga ad-adda nga imposible nga amang ngem iti aniaman a nailanad kadagiti Ebanghelio.”

Nupay kasta, kadagiti minilion a tattao iti Dumaya ken dadduma pay a lugar, dida am-ammo ni Jesu-Kristo. Mabalin a mamatida a nagbiag ni Jesus, ngem dida ipagarup nga adda aniaman a pakainaiganna iti biagda. Dagiti dadduma dida ikabkabilangan ni Jesus gapu iti inaramid dagiti agkunkuna a pasurotna. Kuna dagiti dadduma idiay Japan: ‘Isuda ti nangitennag iti bomba atomika idiay Nagasaki, maysa a siudad a yan ti ad-adu a Kristiano ngem iti kaaduan a siudad ti Japan.’

Ngem, ipabasolyo aya iti mangngagas ti an-annayen ti pasiente no di sinurot ti pasiente ti inreseta ti doktor? Nalawag a saan. Nabayagen a di inkankano dagiti tattao ti Kakristianuan dagiti instruksion ni Jesus iti panangdaer kadagiti inaldaw a parikutda. Gapuna, imbes a laksidenyo ni Jesus gapu  kadagiti makunkuna a Kristiano a di mangsursurot kadagiti instruksionna, apay a diyo am-ammuen a mismo ni Jesus? Sukimatenyo ti Biblia, ket kitaenyo no siasino a talaga ni Jesus ken no kasano a mabalbaliwanna uray pay ti biagyo.

Ayat—Ti Inresetana

Ni Jesu-Kristo ket naindaklan a mannursuro a nagnaed idiay Palestina gistay 2,000 a tawenen ti napalabas. Saan unay a nadakdakamat ti maipapan iti panagubingna. (Mateo, kapitulo 1 ken 2; Lucas, kapitulo 1 ken 2) Idi agtawenen iti 30, inrugi ni Jesus ti ministeriona tapno ‘saksianna ti kinapudno.’ (Juan 18:37; Lucas 3:21-23) Dagiti uppat a historikal a nangipadamag iti biag ni Jesus impamaysada iti ministeriona iti publiko, ti naudi a tallo ket kagudua a tawen a panagbiagna ditoy daga.

Kabayatan ti ministeriona, inted ni Jesus kadagiti adalanna ti tulbek iti panangtaming kadagiti nadumaduma a parikut iti biagda. Ania dayta a tulbek? Isu ti ayat. Iti maysa kadagiti kalatakan a sermon iti historia, a naawagan Sermon idiay Bantay, insuro ni Jesus kadagiti adalanna no kasano nga ipakita ti ayat kadagiti pada a tao. Kinunana: “Isuamin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Naawagan daytoy a prinsipio iti Nabalitokan a Bilin. Dagiti “tattao” a tinukoy ni Jesus ditoy ramanenna uray dagiti kabusor ti maysa a tao. Iti isu met laeng a sermon, kinunana: “Itultuloyyo nga ayaten dagiti kabusoryo ket ikararaganyo dagidiay mangidaddadanes kadakayo.” (Mateo 5:44) Saan aya a marisut ti kasta nga ayat ti adu kadagiti parikut a sangsanguentayo itatta? Kasta ti napanunot  ti lider a Hindu a ni Mohandas Gandhi. Nakotar a kunkunana: “No agkaykaysa[tayo] kadagiti sursuro nga indatag ni Kristo iti daytoy a Sermon iti Bantay, marisuttayo dagiti parikut . . . ti intero a lubong.” No mayaplikar dagiti pannursuro ni Jesus maipapan iti ayat, maagasanna dagiti sakit ti sangatauan.

Pannakaipakita ti Mismo nga Ayatna

Impakat ni Jesus ti insurona. Impangpangrunana dagiti pakaseknan ti sabsabali imbes a dagiti mismo a pakaseknanna ken impakitana ti ayat babaen iti aramid. Iti maysa nga aldaw, sinerbian ni Jesus ken dagiti adalanna ti adu a tattao, nga awan pay ketdin ti tiempoda a mangan. Nakita ni Jesus a kasapulan dagiti adalanna ti ‘aginana iti apagbiit,’ isu a napanda iti maysa a langalang a lugar. Ngem inunaan ida dagiti tattao ken ur-urayendan ti isasangpetda. Aniat’ reaksionyo no dakayo ni Jesus? Bueno, “simnek ti asi [ni Jesus] kadakuada” ket “rinugianna nga isuro ida kadagiti adu a bambanag.” (Marcos 6:30-34) Daytoy napalalo a pannakarikna iti asi ti nangtignay kenkuana a tumulong kadagiti sabsabali.

Saan laeng a naespirituan a panangisuro ti inaramid ni Jesus a pagimbagan dagiti sabsabali. Nangipaay met iti praktikal a tulong. Kas pagarigan, pinakanna ti 5,000 a lallaki (malaksid pay kadagiti babbai ken ub-ubbing) a nagim-imdeng kenkuana agingga iti mumalemen. Sa iti simmaganad a gundaway pinakanna ti sabali pay nga 4,000 a tattao. Iti immun-una a gundaway, inusarna ti lima a tinapay ken dua nga ikan ket, iti naud-udi, pito a tinapay ken sumagmamano a babassit nga ikan. (Mateo 14:14-21; 15:32-38; Marcos 6:35-44; 8:1-9) Milagro? Wen, nagaramid kadagiti milagro.

 Nangpaimbag met ni Jesus iti adu a masaksakit. Inagasanna dagiti bulsek, pilay, agkukutel, ken tuleng. Agasenyo, pinagungarna pay dagiti natay! (Lucas 7:22; Juan 11:30-45) Iti naminsan, nagpakpakaasi kenkuana ti maysa nga agkukutel: “No koma laeng kayatmo, kabaelannak a dalusan.” Aniat’ reaksion ni Jesus? “Inunnatna ti imana ket sinagidna, ket kinunana kenkuana: ‘Kayatko. Madalusanka koma.’” (Marcos 1:40, 41) Natignay ni Jesus gapu iti napigsa a tarigagayna a tumulong kadakuada. Babaen kadagita a milagro, impakitana ti ayatna kadagiti marigrigatan.

Narigat aya a patien? Ngem inaramid ni Jesus ti kaaduan a milagrona iti publiko. Uray dagiti bumusbusor kenkuana, a kanayon a mangikagkagumaan a mangbirok iti pakababalawanna, dida mailibak ti kinapudno a nagaramid kadagiti milagro. (Juan 9:1-34) Kasta met, adda nakairantaan dagiti milagrona. Nakatulong dagita kadagiti tattao tapno mabigbigda ni Jesus kas daydiay imbaon ti Dios.—Juan 6:14.

Ti apagbiit laeng a panangusig kadagiti pannursuro ni Jesus ken iti biagna gutugotennatayo a mangipateg kenkuana ken tignayennatayo a mangtulad iti ayatna. Ngem saan laeng nga iti dayta a pamay-an a maapektaran ni Jesus ti biagyo. Ni Jesus ket saan laeng a maysa a naindaklan a mannursuro a nangisuro iti ayat. Impakaammona a nagbibiag idin sakbay pay a nagbalin a tao kas ti bugbugtong nga Anak ti Dios. (Juan 1:14; 3:16; 8:58; 17:5; 1 Juan 4:9) Nagtultuloy met a nagbiag ni Jesus kalpasan ti panagbalinna a tao, a dayta ti ad-adda pay a mamagbalin kenkuana a napateg kadakayo. Ipakita ti Biblia a napagungar ni Jesus ken naitrono itan kas Ari iti Pagarian ti Dios. (Apocalipsis 11:15) Kinuna ni Jesus: “Daytoy kaipapananna ti agnanayon  a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3; 20:31) Wen, ti pananggun-od iti pannakaammo maipapan ken Jesu-Kristo mabalin a kaipapananna ti biag nga awan inggana idiay Paraiso! Kasano a kasta? Apay a diyo ammuen ti ad-adu pay maipapan ken Jesus ket kitaenyo no kasano a ‘ti ayat nga adda ken Kristo pilitennatayo’ a mangtulad kenkuana? (2 Corinto 5:14) Maragsakanto dagiti Saksi ni Jehova a tumulong kadakayo.—Juan 13:34, 35.

Malaksid no adda sabali a naipakita, naadaw dagiti Kasuratan iti Iloko a Biblia (PBS Edition) para iti Hebreo a Kasuratan ken iti Iloko a New World Translation (NW) para iti Kristiano a Griego a Kasuratan.