Sino a Talaga ti Agturay ti Lubong?

Adu a tattao ti sumungbat ti saludsod iti ngato iti maymaysa a sao—ti Dios. Ngem nakaskasdaaw, awan ti masarakan iti Biblia nga agkuna a ni Jesu-Kristo wenno ti Amana dagiti pudno nga agturay daytoy a lubong. Maisupadi ketdi, kinuna ni Jesus: “Ti prinsipe daytoy a lubong maibellengto iti ruar.” Ket kinunana pay: “Ta umay ti prinsipe ti lubong. Ket awan ti kukuana kaniak.”—Juan 12:31; 14:30; 16:11.

Gapuna ti agturay daytoy lubong busorenna ni Jesus. Sino daytoy?

Pangripiripan kadagiti Kasasaad ti Lubong

Nupay adda panangikagumaan dagiti naimbag-panggepna a tattao, kasta unayen ti panagsagaba ti lubong iti isuamin a historia. Daytoy pagsiddaawenna dagiti managpanunot a tattao, kas ti pimmusayen a mannurat ti editorial a ni David Lawrence: “‘Talna ditoy daga’—dandani tunggal maysa tarigagayanna dayta. ‘Naimbag a nakem kadagiti tattao’—dandani amin a tattao toy lubong iyebkasda dayta iti maysa ken maysa. Ngem aniat’ mapaspasamak? Apay a mamagpeggad ti gubat idinto a naisigud a tartarigagayan dagiti tattao ti talna?”

Kasla agsupadi, saan kadi? No ti tarigagay dagiti tattao isut’ panagbiag a sitatalna, gagangay a guraenda ken papatayenda ti maysa ken maysa—ken nakarangranggasda. Usigenyo ti aglablabes a kinadangkok. Inusaren dagiti tao dagiti gas chamber, kampo konsentrasion, flamethrowers, bomba a napalm, ken dadduma pay a nakarangranggas a pamay-an ti panangtutuok ken panangpapatay iti maysa ken maysa nga awanan asi.

Patienyo kadi a dagiti tao, nga agtarigagay iti kappia ken kinaragsak kabaelanda a mismo, nga aramiden dagita a nakaro a kinadakes a maibusor kadagiti dadduma? Ania dagiti puersa a mangiduron kadagiti tao a mangaramid kadagita makarimon nga ar-aramid wenno mamagbalin iti kasasaad a pakapilitanda a  mangaramid iti kinadangkok? Napanunotyo kadin nga adda dakes, di makita a pannakabalin a mangim-impluensia kadagiti tao nga agaramid kadagita a kinaranggas?

Nailasin dagiti Mangituray iti Lubong

Saan a masapul a pugtuan dayta, ta nalawag nga ipakita ti Biblia a maysa nga intelihente, di makita a persona ti mangtengtengngel agpadpada kadagiti tao ken dagiti nasion. Kunaenna: “Ti isuamin a lubong adda iti pannakabalin ti managdakdakes.” Ken isut’ ilasin ti Biblia a kunkunana: “Daydiay managan Diablo ken Satanas . . . mangiyaw-awan iti intero a napagnaedan a daga.”—1 Juan 5:19; Apocalipsis 12:9.

Iti maysa nga okasion idi “sinulisog ti Diablo” ni Jesus, saan a pinagduaduaan ni Jesus ti akem ni Satanas kas agturay daytoy a lubong. Ilawlawag ti Biblia ti napasamak: “Ti Diablo impanna manen iti maysa a bantay a natayag unay, ket impakitana kenkuana dagiti isuamin a pagarian ti lubong ken ti dayagda, ket kinunana kenkuana: ‘Amin dagitoy itdekto kenka no agrukbabka nga agdaydayaw kaniak.’ Idin ni Jesus kinunana kenkuana: ‘Pumanawka Satanas!’”—Mateo 4:1, 8-10.

Panunotenyo daytoy. Sinulisog ni Satanas ni Jesus babaen ti panangitukonna kenkuana kadagiti “amin a pagarian ti lubong.” Ngem, agbalin kadi a pudpudno a sulisog ti tukon ni Satanas no saan a ni Satanas ti pudno nga agturay kadagitoy a pagarian? Saan a mabalin. Ken paliiwenyo, di inlibak ni Jesus nga amin dagitoy a nailubongan a gobierno kukua ni Satanas, nga inlibak koma ni Jesus no di koma iturayan ni Satanas ida. Gapuna, ni Satanas a Diablo ti pudno a di makita nga agturay iti lubong! Kinapudnona, ti Biblia ti mangawag kenkuana a “ti Dios daytoy a sistema dagiti bambanag.” (2 Corinto 4:4) Ngem, kasano a naisaad dayta dakes a persona itoy natan-ok a saad?

Daydiay nagbalin a Satanas ket maysa idi nga anghel a pinarsua ti Dios, ngem inapalanna ti saad ti Dios. Kinaritna ti nainkalintegan a panangituray ti Dios. Gapu itoy inusarna ti maysa nga uleg kas pannakangiwat a mangallilaw ti umuna a babai, ni Eva, ket iti kasta naallukoyna ti babai ken ti asawana, ni Adan, a nangaramid iti kalikagumna imbes a tungpalenda ti Dios. (Genesis 3:1-6; 2 Corinto 11:3) Kinunana met a mapagbaw-ingna  amin a di pay naipasngay nga annak da Adan ken Eva iti Dios. Gapuna impalubos ti Dios ti tiempo ken Satanas a paneknekanna ti saona, ngem saan a nagballigi ni Satanas.—Job 1:6-12; 2:1-10.

Nakapatpateg, saan nga agbukbukod ni Satanas iti panangiturayna iti lubong. Isut’ nagballigi a nangallukoy kadagiti dadduma nga anghel a makikadua kenkuana nga umalsa a maibusor iti Dios. Dagitoy nagbalinda a demonio, dagiti espiritu a kakomplotna. Saritaen ti Biblia ida no paregtaenna dagiti Kristiano: “Agtalinaed a bumusor kadagiti pangallilaw ti Diablo; agsipud ta adda pannakibakaltayo, saan a maibusor iti lasag ken dara, ngem . . . maibusor kadagiti agturay iti lubong daytoy a sipnget, maibusor kadagiti  dakes nga espiritu kadagiti nailangitan a lugar.”—Efeso 6:11, 12.

Sarangten dagiti Dakes nga Espiritu

Dagitoy di makita, dakes nga agturay iti lubong determinadoda a mangallilaw iti amin a sangatauan, nga iyadayoda ida manipud iti panagdayaw iti Dios. Maysa a pamay-an ti panangibanag dagiti dakes nga espiritu iti daytoy isut’ panangitandudo iti kapanunotan a panagbiag kalpasan ti ipapatay, nupay nalawag nga ipakita ti Sao ti Dios nga awan puot dagiti natay. (Genesis 2:17; 3:19; Ezequiel 18:4; Salmo 146:3, 4; Eclesiastes 9:5, 10) Gapuna, maysa a dakes nga espiritu, a mangtultulad ti timek daydiay natay, ti mabalin a makisarita kadagiti sibibiag a kabagian wenno gayyem dayta, babaen iti espiritu a medium wenno babaen iti maysa a “timek” manipud iti di makita a lugar. Agpammarang ti “timek” a maysa kano a natay a kabagian, ngem iti kinapudnona maysa a demonio!

Ngarud no makangegkayo iti kasta a “timek,” dikay paallilaw. Laksidenyo ti aniaman a kunaenna, ket sawenyo dagiti sasao ni Jesus: “Pumanawka, Satanas!” (Mateo 4:10; Santiago 4:7) Dikay palubosan a ti panagusiusoyo maipapan iti ayan dagiti espiritu ti mangituggod kadakayo a makinamin kadagiti dakes nga espiritu. Ti kasta a pannakinamin maawagan espiritismo, ket pakdaaran ti Dios dagiti managdaydayawna maibusor iti amin a porma dayta. Kondenaren ti Biblia ti “asinoman a mangaramat iti panagpadpadles . . . wenno mannakiuman kadagiti mangkukulam wenno maysa nga asuang, wenno maysa nga agimtuod kadagiti natay.”—Deuteronomio 18:10-12; Galacia 5:19-21; Apocalipsis 21:8.

Yantangay ti espiritismo iyegna ti maysa a tao iti sidong ti impluensia dagiti demonio, laksiden dagiti amin nga ar-aramidna nupay makaay-ayo, wenno makaparagsak dagitoy. Dagitoy nga ar-aramid iramanna ti pannakiuman iti bola a kristal, panangusar kadagiti Ouija boards, ESP, panagipalad, ken astrolohia. Mangpataud met dagiti demonio kadagiti nalaaw nga uni ken dadduma pay a datdatlag kadagiti balay nga apunanda.

Mainayon pay, gundawayan dagiti dakes nga espiritu ti kinamanagbasol dagiti tao babaen ti panangitandudoda kadagiti literatura, sine, ken programa ti telebision a mangiparparang  kadagiti imoral ken di gagangay a seksual a kababalin. Ammo dagiti demonio a no di maiwaksi dagiti dakes a panunot pataudendanto dagiti manayon nga epekto a mangiturong kadagiti tao nga agaramid iti dakes—kas kadagiti demonio.—Genesis 6:1, 2; 1 Tesalonica 4:3-8; Judas 6.

Pudno, adut’ manglais iti kapanunotan nga iturturayan dagiti dakes nga espiritu daytoy lubong. Ngem ti dida panamati saan a nakaskasdaaw, yantangay kunaen ti Biblia: “Uray ni Satanas pagbalinenna ti bagina a kasla anghel ti lawag.” (2 Corinto 11:14) Ti kasisikapan a pangallilawna isut’ panangbulsek kadagiti adu a di mamati nga isu ken dagiti demoniona ket pudno nga addada. Ngem dikay maallilaw! Ti Diablo ken dagiti demoniona pudno nga addada, ket masapul a sarangtenyo ida a kankanayon.—1 Pedro 5:8, 9.

Nakaragragsak, asidegen ti tiempo a pannakapukawton ni Satanas ken dagiti pasurotna! Ipanamnama ti Biblia a “ti lubong [agraman dagiti agturay a demoniona] aglabas, ngem ti agaramid ti pagayatan ti Dios agtalinaed iti agnanayon.” (1 Juan 2:17) Anian a pannakabang-arto ti pannakaikkat dayta a dakes nga impluensia! Sapay koma ngarud, ta mairamantayto kadagidiay agaramid iti pagayatan ti Dios ket tagiragsakentayto ti biag nga agnanayon iti nalinteg a baro a lubong ti Dios.—Salmo 37:9-11, 29; 2 Pedro 3:13; Apocalipsis 21:3, 4.

Malaksid no nainaganan, amin dagiti naadaw iti Biblia ket manipud iti New World Translation of the Holy Scriptures.

[Ladawan iti panid 4]

Maitukon kadi ni Satanas amin dagitoy a gobierno ti lubong no saanna a kukua ida?