Kayatyo Kadi a Maammuan ti Ad-adu Pay Maipapan iti Biblia?

 Apay a Basaenyo ti Biblia?

TI Biblia ket naiduma iti aniaman a sabali a libro​—addaan dayta kadagiti naayat nga instruksion a naggapu iti Dios. (1 Tesalonica 2:13) No iyaplikaryo dagiti pannursuro ti Biblia, magunggonaankayto unay. Dumakkel ti panagayatyo iti Dios ket umadanikayo kenkuana, ti Manangipaay iti “tunggal naimbag a sagut ken tunggal naan-anay a rangkap.” (Santiago 1:17) Maammuanyo no kasano ti umadani kenkuana babaen ti kararag. No mariribukankayo, matulongannakayo ti Dios. No itunosyo ti panagbiagyo kadagiti pagannurotan a nailanad iti Biblia, itden ti Dios ti biag nga agnanayon kadakayo.​—Roma 6:23.

Addaan ti Biblia kadagiti kinapudno a manglawlawag. Dagidiay manggun-od iti pannakaammo iti Biblia mawayawayaanda kadagiti di umiso a pannakaammo a mangiturturay iti biag ti minilion a tattao. Kas pagarigan, no ammotayo ti kinapudno maipapan iti mapasamak no mataytayo, ditayton pagbutngan a madangrannatayo dagiti natay wenno ditayton mamati nga agsagsagaba dagiti natay a kabagian ken gagayyemtayo. (Ezequiel 18:4) Ti pannursuro ti Biblia a panagungar ti mangliwliwa kadagidiay pimmusay iti ay-ayatenda. (Juan 11:25) Ti pannakaammo iti kinapudno  maipapan kadagiti nadangkes nga anghel pagannadennatayo kadagiti peggad ti espiritismo ken tulongannatayo a mangtarus no apay a nakarirriribuk ditoy daga.

Dagiti nadiosan a prinsipio nga adda iti Biblia isuronatayo no kasanotay nga agbiag iti pamay-an a makagunggona iti bagitayo. Kas pagarigan, makapasalun-at ti ‘natimbeng a panagug-ugali.’ (1 Timoteo 3:2) Maliklikantayo ti pannakadadael ti salun-attayo no ‘dalusantayo ti bagbagitayo iti tunggal pakatulawan iti lasag ken iti espiritu.’ (2 Corinto 7:1) Parang-ayen met ti panangyaplikar iti balakad ti Dios a masarakan iti Biblia ti kinaragsak iti panagasawa ken panagraem iti bagi.​—1 Corinto 6:18.

Agbalinkayo a naragragsak a tao no iyaplikaryo ti Sao ti Dios. Tulongannatayo ti pannakaammo iti Biblia a maaddaan iti natalna a panunot agraman pannakapnek ken mangipaay iti namnama kadatayo. Tulongannatayo a mangpatanor kadagiti makaay-ayo a kalidad a kas iti panangngaasi, ayat, rag-o, talna, kinaimbag, ken pammati. (Galacia 5:22, 23; Efeso 4:24, 32) Tulongandatayo dagita a kalidad nga agbalin a nasaysayaat  nga asawa a lalaki wenno babai, ama wenno ina, anak a lalaki wenno babai.

Pampanunotenyo kadi ti masakbayan? Ipakita dagiti padto ti Biblia kadatayo nga agbibiagtayon iti nakapatpateg a tiempo iti pakasaritaan ti tao. Saan laeng a deskribiren dagitoy a padto ti kasasaad ti lubong iti kaaldawantayo no di ket ipakitada met nga asidegen a pagbalinen ti Dios ti daga a paraiso.​—Apocalipsis 21:3, 4.

Katulongan a Mangtarus iti Biblia

Nalabit napadasyon a binasa ti Biblia ngem dikay natarusan. Mabalin a saanyo nga ammo no sadino ti pakasarakanyo iti Biblia kadagiti sungbat ti salsaludsodyo. Saan la a dakdakayo ti kasta. Kasapulantay amin ti tulong a mangtarus iti Sao ti Dios. Dagiti Saksi ni Jehova, iti 235 a pagilian, mangipapaayda iti libre a panangisuro kadagiti minilion a tattao. Maragsakanda met a tumulong kadakayo.

Gagangay a ti agtultuloy a panagadal ti Biblia ti kasayaatan. Marugian dayta babaen kadagiti pamunganayan a pannursuro. (Hebreo 6:1) Bayat ti panagtultuloyyo, nasaysayaatton ti panangipaunegyo iti “nakired a taraon”​—kayatna a sawen, dagiti naun-uneg a kinapudno. (Hebreo 5:14) Ti Biblia ti gubuayan ti umiso nga impormasion. Tulongannakayo dagiti publikasion a naibasar iti Biblia, kas iti broshur nga Ania ti Kalikaguman  ti Dios Kadatayo?, a mangtarus kadagiti naisitar a Kasuratan maipapan iti nadumaduma a suheto.

Kayatyo Kadi ti Mangbusbos iti Panawen iti Kada Lawas Tapno Matarusanyo ti Biblia?

Gagangay a mayurnos ti panagadal iti Biblia iti oras ken lugar a kombiniente kadakayo. Adu ti agadal iti pagtaenganda a mismo. Dadduma ti agadal pay babaen ti telepono. Ti panagadal ket saan a maysa a klase nga aduan iti tattao, no di ket maysa a pribado nga urnos a maibagay iti kasasaadyo, agraman ti nagun-odanyo a pannakaammo ken adal. Awan ti eksamen, isu a dikay rumbeng nga agbain. Masungbatan ti salsaludsodyo maipapan iti Biblia, ket masursuroyo ti umadani iti Dios.

Awan ti bayadanyo iti kasta a panagadal iti Biblia. (Mateo 10:8) Libre dayta a maitukon kadagiti tattao iti amin a relihion ken kadagidiay awanan iti relihion ngem interesadoda unay a mangparang-ay iti pannakaammoda iti Sao ti Dios.

Siasino dagiti mabalin a makipaset iti diskusion? Ti intero a pamiliayo. Mabalin met a makipaset ti siasinoman a gagayyemyo a kayatyo nga awisen. Wenno no kayatyo, mabalin a dakdakayo laeng.

Adu ti mangituding ti maysa nga oras tapno agadalda iti Biblia iti kada lawas. No ad-adu wenno basbassit ti tiempoyo iti kada lawas, sidadaan dagiti Saksi a tumulong kadakayo.

 Awis nga Agadal

Awisendakayo a makiuman kadagiti Saksi ni Jehova. Ti maysa a pamay-an a maaramidyo daytoy ket babaen ti panagsuratyo iti address a nailanad iti baba. Kalpasanna, mayurnos nga adda mangikondukta kadakayo iti libre a panagadal iti Biblia.

□ Kayatko ti maaddaan iti libro nga Ania a Talaga ti Isursuro ti Biblia?

□ Interesadoak iti libre a panagadal ti Biblia iti pagtaengan.

Malaksid no adda sabali a naipakita, ti Baro a Lubong a Patarus ti Nasantuan a Kasuratan ti nakaadawan ti amin a teksto iti Biblia.