LEKSION 11
Nagsuratda Maipapan ken Jesus
Makitam kadi dagiti lallaki iti ladawan?— Isu da Mateo, Marcos, Lucas, Juan, Pedro, Santiago, Judas, ken Pablo. Nagbiagda idi panawen ni Jesus ken nagsuratda maipapan kenkuana. Ammuenta ti ad-adu pay maipapan kadakuada.
Ania ti ammom maipapan kadagitoy a lallaki?
Tallo kadakuada ti apostol a kadua ni Jesus a nangaskasaba. Ammom kadi no siasinoda?— Da Mateo, Juan, ken Pedro. Am-ammo unay da apostol Mateo ken Juan ni Jesus, ken insuratda ti maipapan kenkuana. Insurat met ni apostol Juan ti libro a naawagan Apocalipsis. Adda pay tallo nga insuratna a naawagan iti Umuna a Juan, Maikadua a Juan, ken Maikatlo a Juan. Dua a libro iti Biblia ti insurat ni apostol Pedro. Ti Umuna a Pedro ken Maikadua a Pedro. Iti maikadua a suratna, imbaga ni Pedro a nagsao ni Jehova manipud langit maipapan ken Jesus: ‘Daytoy ti anakko nga ay-ayatek unay ken ipagpannakkelko.’
Adu pay ti masursurotayo maipapan ken Jesus iti libro nga insurat ti dadduma a lallaki iti ladawan. Maysa kadakuada ni Marcos. Mabalin nga adda ni Marcos idi tiniliwda ni Jesus ken nakitana amin a napasamak. Ti sabali pay ket ni Lucas. Isu ket maysa a doktor ken nagbalin a Kristiano idi natayen ni Jesus.
Ti dua pay a nagsurat iti Biblia a makitam iti ladawan ket dagiti ading ni Jesus. Ammom kadi ti naganda?— Da Santiago ken Judas. Idi damo, saanda a mamati ken Jesus. Imbagada pay nga agmauyong. Ngem idi kuan, namatida met laeng ken Jesus ket nagbalinda a Kristiano.
Ti maudi a nagsurat iti Biblia a makitam iti ladawan ket ni Pablo. Idi saan pay a Kristiano, Saul ti naganna. Kagurgurana idi dagiti Kristiano ken pinarparigatna ida. Ammom kadi no apay a nagbalin a Kristiano ni Pablo?— Naminsan, bayat nga agdaldaliasat ni Pablo, bigla nga adda nangngegna a nagsao manipud langit. Ni Jesus dayta! Dinamagna ken Pablo: ‘Apay a parparigatem dagiti adalak?’ Idi kuan, nagbalbaliw ni Pablo ket nagbalin a Kristiano. Insurat ni Pablo ti 14 a libro ti Biblia, manipud Roma agingga iti Hebreo.
Saan kadi nga inaldaw a basbasaentayo ti Biblia?— No basaentayo ti Biblia, adu ti masursurotayo maipapan ken Jesus. Kayatmo kadi a maammuan ti ad-adu pay maipapan ken Jesus?—
