Manipud iti Galilea, bimmallasiw ni Jesus ken dagiti adalanna iti Karayan Jordan. Nagpaabagatanda a limmabas iti Perea. Iti naudi a kaaddana idiay Perea, imbagana kadagiti Fariseo ti pagalagadan ti Dios maipapan iti diborsio. (Lucas 16:18) Nagsaludsodda ita tapno subokenda ni Jesus.

Insurat ni Moises a mabalin nga idiborsio ti maysa a babai no adda “naalas a kababalinna.” (Deuteronomio 24:1) Nagduduma ti kapanunotan no ania ti mairaman a pangibatayan iti diborsio. Mamati ti dadduma a mairaman uray dagiti babassit a bambanag. Gapuna, dinamag dagiti Fariseo: “Umiso kadi nga idiborsio ti maysa a lalaki ti asawana uray ania ti makagapu?”​—Mateo 19:3.

Imbes nga ibasarna iti opinion ti tao, nagsayaat ti panangtukoy ni Jesus iti panggep ti Dios iti panagasawa. “Saanyo kadi a nabasa a ti nangparsua kadakuada idi un-unana inaramidna ida a lalaki ken babai? Kinunana pay: ‘Dayta ti makagapu a panawanto ti lalaki ti ama ken inana sa makitiponto iti asawana, ket agbalindanto a maymaysa a lasag.’ Iti kasta, saandan a dua, no di ket maymaysadan a lasag. Isu a ti pinagtipon ti Dios, saan koma a pagsinaen ti tao.” (Mateo 19:​4-6) Idi pinagtipon ti Dios da Adan ken Eva, saan a nangted iti urnos ti panagsina ti agassawa.

Kinontra dagiti Fariseo ni Jesus. Imbagada: “Apay ngarud nga impalubos ni Moises a mangaramid ti lalaki iti kasuratan ti diborsio sa papanawenna ti asawana?” (Mateo 19:7) Imbaga ni Jesus kadakuada: “Gapu iti kinasukiryo, impalubos ni Moises nga idiborsioyo dagiti assawayo, ngem saan a kasta ti kasasaad idi un-unana.” (Mateo 19:8) Ti tuktukoyenna nga “idi un-unana” ket saan nga idi kaaldawan ni Moises, no di ket idi inrugi ti Dios ti urnos ti panagasawa idiay Eden.

Kalpasanna, imbaga ni Jesus ti nagpateg a kinapudno: “Ibagak kadakayo nga asinoman a mangidiborsio ken baketna, a saan a nakaaramid iti seksual nga immoralidad, [Griego, por·neiʹa], sa mangasawa iti sabali, makabasol iti pannakikamalala.” (Mateo 19:9) Ngarud, seksual nga immoralidad laeng ti pakaibatayan ti diborsio.

Natignay dagiti adalan a mangibaga: “No kasta ti kasasaad ti panagasawa, nasaysayaat laengen ti saan nga agasawa.” (Mateo 19:10) Nalawag ngarud a masapul nga ibilang ti maysa nga agplamplano nga agasawa a permanente dayta!

No maipapan iti panagtalinaed nga awanan asawa, inlawlawag ni Jesus nga adda dagiti saan a mabalin nga agasawa gapu ta nayanakda nga adda depektona. Adda met dagiti saan a mabalin a makidenna gapu ta nakaponda ket saanda nga agasawa. Ngem dadduma ti saan a makiasawa tapno maipamaysada dagiti bambanag mainaig iti Pagarian. “Daydiay makapagtalinaed nga awanan iti asawa, saan koma nga agasawa.”​—Mateo 19:12.

Kalpasanna, inyeg dagiti tattao ken Jesus dagiti annakda. Ngem inungtan ida dagiti adalan ta saanda a kayat a masinga ni Jesus. Idi nakita ni Jesus daytoy, nakarurod ket imbagana: “Bay-anyo nga umasideg kaniak dagiti ubbing, diyo laplapdan ida, ta ti Pagarian ti Dios ket para kadagiti kas kadakuada. Kinapudnona, no ti asinoman saanna nga awaten ti Pagarian ti Dios a kas iti panangawat ti maysa nga ubing, dinto pulos makastrek iti dayta.”​—Marcos 10:​14, 15; Lucas 18:15.

Nagsayaat dayta a leksion! Tapno maawattayo iti Pagarian ti Dios, masapul a napakumbaba ken nalakatayo a maisuro a kas kadagiti ubbing. Impakita ni Jesus ti panagayatna kadagiti ubbing babaen ti panangubbana ken panangbendisionna kadakuada. Ipakitana ti kasta a panagayat iti amin nga ‘umawat iti Pagarian ti Dios a kas iti panangawat ti maysa nga ubing.’​—Lucas 18:17.