Iti dayta nga artikulo, naadaltayo nga adda laeng maysa a nakapatpateg nga isyu a pakaipaspasanguan ti amin a masirib a parsua: ti pannakasantipikar ti naindaklan a nagan ni Jehova. Ti isyu maipapan iti kinasoberano—kayatna a sawen, ti pamay-an ti panangituray ni Jehova ti kasayaatan—ket karaman iti nakapatpateg nga isyu. Ti isyu maipapan iti kinamatalek dagiti tattao ket karaman met iti dayta a nakapatpateg nga isyu.

Apay nga ipagpaganetgettayo itan a ti kapatgan nga isyu ket maipapan iti nagan ni Jehova ken iti pannakasantipikar dayta? Kitaentayo ti tallo a rason.

Umuna, ti nagan wenno reputasion ni Jehova ket dinadael ni Satanas idiay hardin ti Eden. Iti makaallilaw a saludsod ni Satanas ken ni Eva, pinagparangna a naimut a Dios ni Jehova ken di nainkalintegan dagiti instruksionna kadakuada. Kalpasanna, direkta a kinontra ni Satanas ti imbaga ni Jehova a kas man la imbagana nga agul-ulbod ti Dios. Pinadakesna ngarud ti nagan ni Jehova. Isu ket nagbalin a “ti Diablo,” kayatna a sawen, “manangpadakes.” (Juan 8:44) Gapu ta pinati ni Eva dagiti kinaulbod ni Satanas, sinukirna ti Dios ken nagrebelde iti kinasoberanona. (Gen. 3:1-6) Agingga ita, padpadaksen ni Satanas ti nagan ti Dios, ken agiwarwaras kadagiti kinaulbod maipapan iti kinasiasino ni Jehova. Dakdakkel ti posibilidad a sumukir ken Jehova dagiti mamati kadagita a kinaulbod. Isu a para kadagiti agdaydayaw iti Dios, ti pannakapadakes ti nasantuan a nagan ni Jehova ti kakaruan a di kinahustisia. Dayta ti ramut ti amin a panagrigrigat ken kinadakes iti lubong.

Maikadua, para iti pagsayaatan ti amin a parsua, determinado ni Jehova a mangalangon ken mangikkat iti amin a pakaumsian ti naganna. Dayta ti kapatgan ken Jehova isu nga imbagana: “Ipakitakto a nasantuan ti naindaklan a naganko.” (Ezek. 36:23) Insuro met ni Jesus ti masapul a mayun-una kadagiti kararag ti amin a matalek nga adipen ni Jehova idi imbagana: “Masantipikar koma ti naganmo.” (Mat. 6:9) Maulit-ulit nga impaganetget ti Biblia ti kinapateg ti panangidaydayaw iti nagan ni Jehova. Kitaentayo ti sumagmamano la a pagarigan: “Itedyo ken Jehova ti dayag a maikari iti naganna.” (1 Cron. 16:29; Sal. 96:8) “Agkantakayo iti panangidaydayaw iti naganna.” (Sal. 66:2) “Agnanayon nga itan-okko ti naganmo.” (Sal. 86:12) Ti maysa kadagiti gundaway a nagsao ni Jehova manipud langit ket napasamak iti templo idiay Jerusalem idi imbaga ni Jesus: “Ama, padayagem ti naganmo.” Insungbat ni Jehova: “Pinadayagko dayta ket padayagekto manen.”—Juan 12:28. a

Maikatlo, ti di agbalbaliw a panggep ni Jehova ket kanayon a konektado iti nagan wenno reputasionna. Panunotentayo daytoy: Kalpasan ti maudi a pannubok iti ngudo ti Sangaribu a Tawen a Panagturay ni Kristo, ania ti sumaruno a mapasamak? Agtultuloyto kadi nga awan ti panagkaykaysa ti amin a masirib a parsua no maipapan iti nakapatpateg nga isyu, ti pannakasantipikar ti nagan ni Jehova? Tapno masungbatan dayta a saludsod, lagipentayo  ti dua a karaman iti dayta nga isyu—ti kinamatalek dagiti tattao ken ti kalintegan ni Jehova nga agturay iti intero nga uniberso. Kasapulanto pay la kadi a paneknekan dagiti tattao a matalekda? Saanen. Perpektodanton ken naan-anayton a nasubokda. Maaddaandanton iti biag nga agnanayon. Saanto metten a kasapulan a mapaneknekan a ti pamay-an ti panangituray ni Jehova ti kasayaatan. Iti dayta a tiempo, agkaykaysanton ti amin idiay langit ken ditoy daga ken akseptarenda ti panangituray ni Jehova. Ngem ti ngay nagan ni Jehova?

Iti dayta a tiempo, naan-anayton a nasantipikar ti nagan ni Jehova ken interamente a nadalusanen iti amin a pammadakes. Ngem ti nagan ni Jehova ket agtultuloyto a kapatgan iti amin a matalek idiay langit ken ditoy daga. Apay? Gapu ta makitadanto nga agtultuloy ti panangaramid ni Jehova kadagiti nakaskasdaaw a bambanag. Panunotentayo daytoy: Gapu ta sipapakumbabanto nga isubli ni Jesus ken Jehova ti amin a panangituray, ti Dios “ti mangituray[ton] iti amin a banag.” (1 Cor. 15:28) Kalpasan dayta, matagiragsakton dagiti tattao ditoy daga ti “nadayag a wayawaya dagiti annak ti Dios.” (Roma 8:21) Naan-anayto metten a tungpalen ni Jehova ti di agbalbaliw a panggepna a maaddaan iti maysa nga agkaykaysa a pamilia a buklen dagiti annakna idiay langit ken ditoy daga.—Efe. 1:10.

Inton mapasamak aminen dagita, anianto ti marikna ti pamilia ni Jehova idiay langit ken ditoy daga? Sigurado a mariknatayto nga adda ti masapul nga aramidentayo. Kayattayo la unay nga itultuloy nga idaydayaw ti nagpintas a nagan ni Jehova. Inwanwan ti Dios ni salmista David a mangisurat: “Madaydayaw koma ni Jehova a Dios . . . Agnanayon koma a maidaydayaw ti nadayag a naganna.” (Sal. 72:18, 19) Iti agnanayon, addanto nga adda dagiti baro ken makapagagar a rason nga aramidentayo dayta.

Ti nagan ni Jehova irepresentarna ti amin maipapan kenkuana. Kangrunaanna, no panunotentayo ti nagan ni Jehova, mapanunottayo ti ayatna. (1 Juan 4:8) Kanayon a malaglagiptayo a pinarsuanatayo ni Jehova gapu ta ay-ayatennatayo, impaayna ti daton a subbot gapu ta ay-ayatennatayo, ken impakitana a nalinteg ti panagturayna gapu ta ay-ayatennatayo. Ngem agtultuloyto a mariknatayo ti kasta unay a panagayat ni Jehova kadatayo. Agnanayon a kayattayto ti suminged a suminged kenkuana kas Amatayo ken agkanta iti panangidaydayaw iti nadayag a naganna.—Sal. 73:28.