1. Kas mabasa iti Eclesiastes 7:20, ania a kinapudno ti imbaga ni Ari Solomon?

 NAPALIIW ni Ari Solomon: “Awan ti nalinteg a tao ditoy daga a kanayon nga agaramid iti naimbag ken saan nga agbasol.” (Ecl. 7:20) Agpayso dayta! Managbasoltayo amin. (1 Juan 1:8) Isu a kasapulantayo ti pammakawan ti Dios ken ti padatayo a tao.

2. Ania ti mariknam no pinakawannaka ti maysa a nasinged a gayyemmo?

² Malagipmo pay idi nasaktam ti maysa a nasinged a gayyemmo? Sigurado a kayatmo nga ilinteg dagiti bambanag ken isubli ti dati a panaggayyemyo, isu a naimpusuan a dimmawatka iti pammakawan. Ania ti nariknam idi pinakawannaka ti gayyemmo? Sigurado a nabang-aran ken naragsakanka!

3. Ania dagiti pagpokusantayo iti daytoy nga artikulo?

³ Kayattayo a ni Jehova ti kasisingedan a Gayyemtayo, ngem makaibaga wenno makaaramidtay latta no dadduma kadagiti pakasaktanna. No kasta, kasanotayo a masigurado a kayatnatayo a pakawanen ni Jehova? Kasano a nagpaiduma ti panangpakawan ni Jehova iti panangpakawantayo? Ken maudi, siasino dagiti pakawanen ti Dios?

4. Kasano a masiguradotayo a sisasagana ni Jehova a mangpakawan?

⁴ Ipasigurado kadatayo ti Sao ti Dios a sisasagana ni Jehova a mangpakawan. Idi impakaammo ni Jehova ti kinasiasinona ken Moises idiay Bantay Sinai, imbagana babaen ti maysa nga anghel: “Ni Jehova, ni Jehova, maysa a Dios a naasi ken mannakipagrikna, nabannayat nga agpungtot ken dakkel ti  napudno nga ayatna ken kanayon a tungpalenna ti saona, mangipakpakita iti napudno nga ayat kadagiti rinibu, mangpakpakawan kadagiti kamali, biddut, ken basol.” (Ex. 34:6, 7) Naimbag ken naasi a Dios ni Jehova ken kanayon a sisasagana a mangpakawan kadagiti agbabbabawi a nakabasol.​—Neh. 9:17; Sal. 86:15.

5. Sigun iti Salmo 103:13, 14, ania ti ar-aramiden ni Jehova ta am-ammona unay dagiti tattao?

⁵ Kas ti Namarsua kadatayo, ammo ni Jehova ti amin maipapan kadatayo. Agasem! Ammona ti amin a detalye maipapan iti tunggal tao ditoy daga. (Sal. 139:15-17) Isu a makitana ti amin a kinaimperpekto a natawidtayo kadagiti nagannaktayo. Ammona pay ti amin a napasamak iti biagtayo a nangmolde ken nangsukog iti personalidadtayo. Gapu ta am-ammonatayo unay ni Jehova, ania ti ar-aramidenna? Kakaasiannatayo.​—Sal. 78:39; basaen ti Salmo 103:13, 14.

6. Kasano a pinaneknekan ni Jehova a kayatna ti mangpakawan?

⁶ Pinaneknekan ni Jehova a kayatna ti mangpakawan. Ammona a gapu iti inaramid ti umuna a tao a ni Adan, managbasol ken mataytayo amin. (Roma 5:12) Awan ti aniaman a maaramidantayo a mangwayawaya iti bagitayo ken iti sabali a tao manipud iti basol ken ipapatay. (Sal. 49:7-9) Ngem kinaasiannatayo ti nadungngo a Diostayo ken nangaramid iti pamay-an tapno mawayawayaantayo. Ania ti inaramidna? Kuna ti Juan 3:16 nga imbaon ni Jehova ti bugbugtong nga Anakna tapno matay para kadatayo. (Mat. 20:28; Roma 5:19) Nagsagaba ken natay ni Jesus para kadatayo tapno mawayawayaan dagidiay mangipakita iti pammati kenkuana. (Heb. 2:9) Talaga a nasaktan unay ti rikna ni Jehova bayat a makitkitana ti dungdungnguenna nga Anak nga agsagsagaba iti nakaut-ut-ot ken nakababain nga ipapatay! Sigurado a saan koma nga impalubos ni Jehova a matay ti Anakna no dinatayo kayat a pakawanen.

7. Siasino ti dadduma a karakter ti Biblia a situtulok a pinakawan ni Jehova?

⁷ Iti Biblia, adu dagiti tattao a situtulok a pinakawan ni Jehova. (Efe. 4:32) Asino ti mapanunotmo? Malagipmo siguro ni Ari Manases. Grabe dagiti basol dayta a dakes a tao ken Jehova. Indauluanna ti ulbod a panagdaydayaw. Pinatayna dagiti mismo nga annakna,  ket indatonna ida iti didiosen dagiti pagano. Nakarkaro pay, nangikabil iti kinitikitan nga imahen ti ulbod a didiosen iti sagrado a templo ni Jehova. Kuna ti Biblia maipapan kenkuana: “Nakaro unay ti inaramidna a kinadakes iti imatang ni Jehova, a namagpungtot kenkuana.” (2 Cron. 33:2-7) Ngem idi naimpusuan a nagbabawi ni Manases, situtulok a pinakawan ni Jehova. Insubli pay ketdi isuna ti Dios iti kinaarina. (2 Cron. 33:12, 13) Malagipmo met siguro ni Ari David, a nakaaramid kadagiti nadagsen a basol ken Jehova, a pakairamanan ti pannakikamalala ken panangpapatay. Ngem idi naimpusuan a nagbabawi ni David ken binigbigna dagiti basolna, pinakawan met ni Jehova. (2 Sam. 12:9, 10, 13, 14) Wen, masiguradotayo a kayat ni Jehova ti mangpakawan. Ken kas makitatayto, nagpaiduma ti panangpakawanna no ikompara kadagiti tattao.

8. Kasano a ti nagpaiduma nga akem ni Jehova kas Ukom apektaranna ti panangpakawanna?

⁸ Ni Jehova “ti Ukom ti intero a daga.” (Gen. 18:25) Ti nalaing nga ukom masapul a kabesadona unay dagiti linteg. Agpayso dayta ken Jehova ta malaksid nga isu ti Ukomtayo, isu pay ti nangted kadagiti lintegtayo. (Isa. 33:22) Ni Jehova laeng ti talaga a makaammo iti umiso ken di umiso. Ania pay ti kasapulan tapno makuna a nalaing ti maysa nga ukom? Masapul nga ammona ti amin nga impormasion iti maysa a kaso sakbay a mangipaulog iti desision. No kasta, ni Jehova ti kasayaatan nga ukom ta kanayon nga ammona ti amin.

9. Ania dagiti impormasion nga ammo ni Jehova sakbay nga agdesision no pakawanenna ti maysa?

⁹ Naiduma ni Jehova kadagiti tattao nga ukom ta kanayon nga ammona ti amin nga impormasion iti aniaman a kaso. (Gen. 18:20, 21; Sal. 90:8) Saan isuna a kas kadagiti tattao a limitado dagiti makita wenno mangngegda. Naan-anay a maawatanna nga adda epekto iti ar-aramiden ti maysa a tao dagiti kualidad ken kababalin a natawidna kadagiti nagannakna, pannakapadakkelna, ken aglawlawna, agraman ti emosional ken mental a salun-atna. Mabasa met ni Jehova ti puso. Makitana dagiti motibo, intension, ken tarigagay ti maysa a tao. Awan ti mailemmeng ken Jehova. (Heb. 4:13) Ti ngarud panangpakawan ni Jehova ket kanayon a naibatay iti kompleto a pannakaammona iti maysa a situasion.

10. Apay a maikunatayo a kanayon a nalinteg ken patas ti panangukom ni Jehova? (Deuteronomio 32:4)

¹⁰ Kanayon a nalinteg ken patas ti panangukom ni Jehova. Saan a pulos a mangidumduma. Ti pammakawanna ket saan a pulos a nakadepende iti itsura, kinabaknang, kinaprominente, wenno abilidad ti maysa a tao. (1 Sam. 16:7; Sant. 2:1-4) Awan ti siasinoman a mabalin a mangdiktar wenno mangpasuksok ken Jehova. (2 Cron. 19:7) Dagiti desisionna ket saan a maapektaran gapu iti pungtot wenno emosion. (Ex. 34:7) Awan duadua a ni Jehova ti kasayaatan nga Ukom ta maawatanna ti amin maipapan kadatayo ken iti situasiontayo.​—Basaen ti Deuteronomio 32:4.

11. Kasano a nagpaiduma ti panangpakawan ni Jehova?

¹¹ Binigbig dagiti mannurat iti Hebreo a Kasuratan a nagpaiduma ti panangpakawan ni Jehova. Iti dadduma a kaso, inusarda ti Hebreo a sao a sigun iti maysa a reperensia, dayta “ket nausar a mangiladawan laeng iti pammakawan ti Dios kadagiti managbasol. Saan a pulos a nausar dayta a pangiladawan iti panangpakawan ti maysa a tao iti padana a tao.” Ni Jehova laeng ti addaan iti pannakabalin  wenno autoridad a naan-anay a mangpakawan iti agbabbabawi a nakabasol. Ania ti resultana no pinakawannatayon ni Jehova?

12-13. (a) Ania ti marikna ti maysa a tao no pinakawanen ni Jehova? (b) Kasano kapaut dagiti pagimbagan ti panangpakawan ni Jehova?

¹² No patientayo a pinakawannatayon ni Jehova, ‘mabang-aran’ ti riknatayo ken maaddaantayo iti talna ti panunot ken nadalus a konsiensia. Saan a maipaay dagiti tattao dayta a pammakawan no di ket ‘ipaay laeng ni Jehova.’ (Ara. 3:19) No pinakawannatayon ni Jehova, ibilangnatayo manen a gagayyemna a kas man la ditay pulos nagbasol kenkuana.

¹³ Kalpasan a pinakawannatayon ni Jehova, saannatayon a pulos akusaran wenno dusaen manen iti dayta a basol. (Isa. 43:25; Jer. 31:34) Adayo ti pangikabilan ni Jehova kadagiti basoltayo “no kasano ti kaadayo ti pagsingisingan ti init iti paglennekanna.” * (Sal. 103:12) Talaga nga agyaman ken agsiddaawtayo unay no panunotentayo ti kadakkel ti pammakawan ni Jehova. (Sal. 130:4) Ngem siasino dagiti pakawanen ni Jehova?

14. Ania dagiti nasursurotayon maipapan iti desision ni Jehova a mangpakawan?

¹⁴ Kas nakitatayon, ti desision ni Jehova a mangpakawan ket saan a naibatay no kasano kadakkel wenno kabassit ti basol. Naammuantayo met nga us-usaren ni Jehova ti pannakaammona kas Namarsua, kas nangted kadagiti linteg, ken kas Ukom no agdesision a mangpakawan. Ania dagiti banag nga ikabkabilangan ni Jehova?

15. Sigun iti Lucas 12:47, 48, ania ti maysa a banag nga ikabkabilangan ni Jehova?

¹⁵ Ti maysa a banag nga ikabkabilangan ni Jehova ket no ammo ti nakabasol a dakes ti ar-aramidenna. Nalawag nga imbaga ni Jesus dayta iti Lucas 12:47, 48. (Basaen.) No sipapakinakem nga iplano ti maysa ti agaramid iti dakes ken nalawag nga ammona a kagura dayta ni Jehova, nakaaramiden iti nadagsen a basol. Dayta a tao ket mabalin a saan a pakawanen ni Jehova. (Mar. 3:29; Juan 9:41) Ngem aminentayo a no dadduma, ammotayo a dakes ti ar-aramidentayo. No kasta, manamnamatayo kadi a pakawanennatayo  pay ni Jehova? Wen! Gapu ta adda pay sabali a banag nga ikabkabilanganna.

16. Ania ti panagbabawi, ken apay a napateg dayta no kayattayo a pakawanennatayo ni Jehova?

¹⁶ Ti maysa pay nga ikabkabilangan ni Jehova ket no talaga nga agbabbabawi ti nakabasol. Ania ti kayat a sawen ti panagbabawi? Ti panagbabawi ket ti “panangbalbaliw ti maysa iti panunotna, kababalinna, wenno panggepna.” Ramanenna ti ideya nga agbabbabawi ken maladingitan unay ti maysa kadagiti dakes a naaramidanna wenno ti dina panangaramid kadagiti umiso a banag a rumbeng koma nga inaramidna. Maladingitan ti agbabbabawi a nakabasol gapu kadagiti dakes nga inaramidna ken gapu ta impalubosna a kumapuy ti relasionna ken Jehova, isu a naaramidna dagita. Lagipentayo nga agpada a nakaaramid da Ari Manases ken David kadagiti nadagsen a basol; ngem pinakawan ida ni Jehova ta naimpusuan a nagbabawida. (1 Ar. 14:8) Wen, pakawanennatayo laeng ni Jehova no makitana ti ebidensia a talaga nga agbabbabawitayo. Ngem saan nga umdas a basta laeng maladingitantayo kadagiti basol a naaramidtayo. Masapul nga adda aramidentayo a dagus. * Dayta ti sabali pay a banag nga ikabkabilangan ni Jehova.

17. Ania ti pannakakomberte, ken apay a napateg dayta tapno saantayon a maulit dagiti naaramidtayo a basol? (Isaias 55:7)

¹⁷ Ti pannakakomberte ti sabali pay a napateg a banag nga ikabkabilangan ni Jehova. Ti pannakakomberte kaipapananna ti “isusubli.” Kayatna a sawen, masapul nga agbalbaliw ti maysa babaen ti panangpanawna iti dakes a dalanna ken surotenna manen ti dalan ni Jehova. (Basaen ti Isaias 55:7.) Masapul a pabaruenna ti panunotna tapno ti panagpampanunot ni Jehova ti mangidalan kenkuana. (Roma 12:2; Efe. 4:23) Masapul a desidido a mangisardeng kadagiti dakes a panagpampanunot ken ar-aramidna. (Col. 3:7-10) Siempre, ti pammatitayo iti daton ni Kristo ti pangibatayan ni Jehova a mangpakawan ken mangdalus kadatayo manipud iti basol. Maibatay iti dayta a daton, pakawanennatayo ni Jehova no makitana a talaga nga agporporsegitayo  a mangbalbaliw kadagiti aramidtayo.​—1 Juan 1:7.

18. Ania dagiti naammuantayon maipapan iti pammakawan ni Jehova?

¹⁸ Repasuentayo biit dagiti napapateg a punto a napagsasaritaantayon. Iti intero nga uniberso, talaga a ni Jehova ti awan kapadana a Manangpakawan. Ania dagiti ebidensiatayo? Umuna, kanayon a sisasagana a mangpakawan. Maikadua, ammona ti amin maipapan kadatayo. Ammona ti intero a kinataotayo, ken isuna laeng ti kasayaatan a mangikeddeng no talaga nga agbabbabawitayo. Ken maikatlo, no pakawanen ni Jehova dagiti basoltayo, arigna interamente a buraenna dagita. Gapu iti dayta, maaddaantayo iti nadalus a konsiensia ken matagiragsaktayo ti paborna.

19. Uray no imperpekto ken managbasoltayo, apay a posible nga agbalintayo latta a naragsak?

¹⁹ Siempre, makaaramidtayo latta iti basol agingga nga imperpektotayo. Ngem makaliwliwa kadatayo ti kuna ti Pannakatarus iti Kasuratan, Tomo 2, panid 666: “Gapu ta siaasi nga ikabkabilangan ni Jehova ti nainlasagan a pagkapuyan dagiti adipenna, saan a masapul nga agtalinaedda a silaladingit maigapu kadagiti biddutda nga epekto ti natawid a kinaimperpekto. (Sal 103:8-14; 130:3) No simamatalekda a magna iti daldalan ti Dios, makapagbalinda a narag-o. (Fil 4:4-6; 1 Juan 3:19-22).” Makaparegta unay dayta!

20. Ania ti usigentayo iti sumaruno nga artikulo?

²⁰ Agyamyamantayo unay ken Jehova ta sisasagana a mangpakawan no talaga a pagbabbabawyantayo dagiti naaramidtayo a basol. Ngem kasanotayo a matulad ti panangpakawan ni Jehova? Kadagiti ania a pamay-an nga agpada ti panangpakawantayo iti panangpakawan ni Jehova, ngem kadagiti ania met a pamay-an nga agdumada? Apay a napateg a maawatantayo ti nagdumaanda? Masungbatan dagita iti sumaruno nga artikulo.