“BILIBAK iti kinaimbag dagiti kakabsat,” imbaga ni Lisa. * Dayta ti damo a nakaallukoyanna iti kinapudno. Kasta met laeng ti narikna ni Anne. Imbagana, “Ti kinaimbagda ti ad-adda a nagustuak, saan a ti isursuroda.” Ita, magusgustuanen dagita a sister ti agbasa ken agutob iti Biblia. Ngem ti talaga a nakatignayanda ket ti kinaimbag dagiti kakabsat.

Kasanotayo a maipakita ti kinaimbag a mangdanon iti puso dagiti tattao iti aglawlawtayo? Usigentayo ti dua a pamay-an: iti sao ken aramidtayo. Ken kitaentayo no siasino dagiti pangipakitaantayo iti kinaimbag.

Adda “ti linteg ti kinaimbag” iti dila ti nagsayaat nga asawa a babai a nadeskribir iti Proverbio kapitulo 31. (Prov. 31:26) Dayta a “linteg” ti mangiturturay iti ibagana ken iti tono ti bosesna. Masapul nga adda met dayta a “linteg” iti dila dagiti amma. Pagaammo dagiti adu a nagannak a ti nasakit a panagsasao ket saan a nasayaat ti epektona iti anakda isu a posible a dinanto ikaskaso ti ibagbagada. No ngarud naimbag ti panagsasao dagiti nagannak, nalaklaka kadagiti annakda ti agtulnog kadakuada.

Maysaka man a nagannak wenno saan, kasano nga agbalin a naimbag ti panagsasaom? Makitatayo ti sungbat iti umuna a paset ti Proverbio 31:26: “Agsao ti ngiwatna iti kinasirib.” Kayatna a sawen, pilientayo a nainsiriban dagiti ibagatayo ken ti tono ti bosestayo. Makatulong no isaludsodtayo iti bagitayo, ‘Ti kadi ibagak ket mamagpungtot, wenno mangpakalma iti tensionado a situasion?’ (Prov. 15:1) Wen, masiribtayo no agpanunottayo sakbay nga agsaotayo.

Kuna ti sabali pay a proverbio: “Ti di pinampanunot a sasao ket kas kadagiti duyok ti espada.” (Prov. 12:18) Mabalin nga ad-adda a makontroltayo ti ibagatayo no sipapanunottayo no kasano a dagiti sasao ken ti tono ti bosestayo ket apektaranna ti sabsabali. Wen, no surotentayo “ti linteg ti kinaimbag,” saan a nasakit ti panagsasaotayo ken ti tono ti bosestayo. (Efe. 4:31, 32) Imbes nga agpanunot ken agsaotayo iti negatibo, naimbag koma ti panagsasaotayo. Positibo ken makaay-ayo met koma ti tono ti bosestayo. Kasta ti inyulidan ni Jehova idi liniwliwana ti mabutbuteng nga adipenna a ni Elias. Ti anghel a nangirepresentar ken Jehova ket nagsao iti “naalumamay ken nakapsut a timek.” (1 Ar. 19:12) Ngem saan la a naimbag a panagsasao ti kasapulantayo tapno makuna a naimbagtayo. Masapul met nga agaramidtayo iti naimbag. Kasano?

Tultuladentayo ni Jehova no agbalintayo a naimbag iti sao ken aramid. (Efe. 4:32; 5:1, 2) Inyestoria ni Lisa, a nadakamaten, ti kinaimbag nga impakita dagiti Saksi. “Idi bigla a napapanaw ti pamiliami iti paggigiananmi, dua nga agassawa iti kongregasion ti nag-day off iti trabahoda tapno tulongandakami nga agempake. Saanak pay idi a mayad-adalan iti Biblia!” Gapu kadagita a naimbag nga ar-aramid, natignay ni Lisa a mangammo iti ad-adu pay maipapan iti kinapudno.

 Naapresiar met ni Anne, a nadakamaten, ti kinaimbag kenkuana dagiti Saksi. Imbagana: “Gapu iti panangtrato kaniak ti kaaduan, nagbalinak a managsuspetsa unay. Marigatanak nga agtalek kadagiti tattao.” Intuloyna: “Idi naam-ammok dagiti Saksi, pagduaduaak ti motiboda. Pinampanunotko, ‘Apay ngata a nagsayaat ti panangtratoda kaniak?’ Ngem talaga a nakaim-imbag ti mangyad-adal kaniak iti Biblia isu a nagtalekak kenkuana.” Ti nasayaat a resultana? “Idi agangay, impapusokon dagiti maad-adalko.”

Natignay unay da Lisa ken Anne iti kinaimbag nga impakita kadakuada dagiti kakabsat. Nakatulong dayta tapno ammuenda ti ad-adu pay maipapan iti kinapudno. Gapu iti kinaimbag nga impakita kadakuada ti kongregasion, rinugiandan ti nagtalek ken Jehova ken iti ilina.

Gapu iti pannakapadakkel ti dadduma, mabalin a naimbag ken nasingpet ti panagsasaoda ken naisemda. Mayat met ketdi ti kasta a nadayaw a kababalin gapu iti kostumbre wenno nakairuaman. Ngem no dayta laeng ti rason,  mabalin a saantayo a tultuladen ti kinaimbag ti Dios.​—Idilig ti Aramid 28:2.

Ti pudno a kinaimbag ket aspeto ti bunga ti nasantuan nga espiritu ti Dios. (Gal. 5:22, 23) Tapno maipakitatayo ngarud ti pudno a kinaimbag, masapul nga agpaiwanwantayo iti nasantuan nga espiritu. Iti kasta, matuladtayo ni Jehova ken ni Jesus. Kas Kristiano, sipapanunottayo iti pagimbagan ti sabsabali. Ar-aramidentayo dayta gapu ta ay-ayatentayo ni Jehova a Dios ken ti padatayo a tao. Iti kasta, ti kinaimbagtayo ket agbalin a nabileg a kualidad a nagtaud iti puso a mangparagsak iti Dios.

Mabalin a nalaka laeng nga ipakita ti kinaimbag kadagiti naimbag kadatayo wenno kadagiti am-ammotayo. (2 Sam. 2:6) Ti maysa a pamay-an a maipakitatayo dayta ket no agyamantayo kadakuada. (Col. 3:15) Ngem kasanon no panagriknatayo ket saan a maikari ti maysa a tao a maipakitaan iti kinaimbag?

Panunotentayo daytoy: Ni Jehova ti kasayaatan nga ulidan iti panangipakita iti nagpaiduma a kinaimbag. Adda met nagpateg a leksion nga isuro ti Saona maipapan iti panangipakita iti daytoy a kualidad. Namin-adu a nausar ti termino a “nagpaiduma a kinaimbag” iti Kristiano a Griego a Kasuratan. Kasano nga ipakpakita ti Dios ti kinaimbagna kadatayo?

Nakaim-imbag ni Jehova iti amin a tattao. Ipapaayna ti amin a kasapulantayo tapno agbiagtayo. (Mat. 5:45) Kinapudnona, sakbay pay a maam-ammotayo ni Jehova, impakitana kadatayon ti kinaimbagna. (Efe. 2:4, 5, 8) Kas pagarigan, intedna ti kasayaatan kenkuana, ti bugbugtong nga Anakna para iti amin a tattao. Insurat ni apostol Pablo nga inted ni Jehova ti subbot “maitunos iti kinaaglaplapusanan ti nagpaiduma a kinaimbagna.” (Efe. 1:7) Kasta met, uray no agbasol ken mapagladingittayo ni Jehova, iwanwanwan ken isursuronatayo latta. Dagiti instruksion ken sasaona ket kas iti “arbis.” (Deut. 32:2) Ditay pulos mabayadan ti amin a kinaimbagna kadatayo. Kinaagpaysuanna, nakadepende ti masakbayantayo iti kinaimbag ni Jehova.​—Idilig ti 1 Pedro 1:13.

Awan duadua a makaay-ayo ken makaparegta ti kinaimbag ni Jehova. Kas resultana, imbes a pilpilientayo ti pangipakitaantayo iti kinaimbag, ikagumaantayo a tuladen ni Jehova. Kasano? Inaldaw nga ipakitatayo ti kinaimbag. (1 Tes. 5:15) No kanayontayo nga aramiden dayta, kaslatayo la iti apuy a mangpaimeng iti nalamiis nga aldaw. Makapabang-artayo la ketdi kadagiti kapamilia, kapammatian, katrabahuan, kaeskuelaan, ken kaarrubatayo.

Panunotem dagiti kapamiliam wenno kakongregasionmo a magunggonaan gapu kadagiti naimbag a sasaom ken ar-aramidmo. Mabalin nga adda kakongregasionmo nga agkasapulan unay iti tulong tapno maasikaso ti balay wenno arubayanda wenno mangaramid kadagiti gagangay a trabaho kas iti pannakitienda wenno panag-shopping. No adda met kasabaam nga agkasapulan iti tulong, mabalinmo kadi a tulongan iti praktikal a pamay-an?

Kas panangtulad ken Jehova, kanayon koma a “ti linteg ti kinaimbag” ti mangituray iti sao ken aramidtayo.