NO PAKITAANDAKAYO iti kinaimbag, kasanoyo a maipakita ti apresasionyo? Usigenyo no kasano a dagiti panguluen ti militar iti Israel impakitada ti apresasionda kalpasan a nakigubatda kadagiti Midianita. Napasamak ti gubat kalpasan a nagbasol ti Israel mainaig iti Baal ti Peor. Pinangabak ti Dios ti ilina ken pinagbibingayan dagiti 12,000 a soldado ken dadduma pay nga Israelita ti amin a nasamsamda. Maitunos iti bilin ni Jehova, dagiti soldado inranudda kadagiti papadi ti dadduma a bingayda, ket kasta met ti inaramid ti dadduma pay nga Israelita kadagiti Levita.—Num. 31:1-5, 25-30.

Ngem saan laeng a dayta ti inaramid dagiti panguluen a militar. “Innala dagiti adipenmo ti pakagupgopan dagiti lallaki ti gubat nga adda iti aywanmi ket awan maysa a naipadamag a mapukpukaw kadakami,” kinunada ken Moises. Inkeddengda nga idatag dagiti balitok ken ti nagduduma a pangarkos kas daton ken Jehova. Ti dagup a kadagsen dagiti balitok a pangarkos  ket nasurok a 190 a kilo.—Num. 31:49-54.

Adu met a tattao ita ti matignay a mangipakita iti apresasionda iti inaramid kadakuada ni Jehova. Kanayonanna, saan laeng a dagiti dedikado nga adipen ti Dios ti makarikna iti kasta nga apresasion. Usigenyo, kas pagarigan, ti drayber ti bus a paraitulod iti maysa a grupo dagiti delegado a timmabuno iti internasional a kombension idiay Bologna, Italia, idi 2009. Gapu ta nasingpet ken nakaan-annad ti drayber, inikkan dagiti delegado iti kard ken kuarta kas ebkas ti panagyamanda. Inikkanda pay iti libro nga Ania a Talaga ti Isursuro ti Biblia? Kinuna ti drayber: “Maragsakanak a mangawat iti kard ken iti libro, ngem isublik ti kuarta gapu ta kayatko nga idonar daytoy tapno maitultuloyyo ti trabaho nga ar-aramidenyo. Uray saanak a Saksi ni Jehova, kayatko ti agdonar gapu ta nakitak nga ar-aramidenyo dagiti bambanag maigapu iti ayat.”

No pudno nga apresiarenyo ti inaramid ni Jehova agpaay kadakayo, ti maysa a pamay-an tapno maipakitayo ti panagyamanyo ket babaen ti panagdonar para iti sangalubongan a trabaho dagiti Saksi ni Jehova. (Mat. 24:14) Nailista iti kahon dagiti pamay-an ti dadduma a mangted iti kontribusion.