Apay a Saan a Naballigi?

“Immasideg [ken Jesus] dagiti Fariseo, a rantada a sulisogen ken kunaen: ‘Nainkalintegan aya a ti maysa a lalaki idiborsiona ti asawana iti tunggal kita ti pangibatayan?’”​—Mateo 19:3.

IDI kaaldawan ni Jesus, adda dagiti nagsaludsod kenkuana no rumbeng kadi a taginayonen ti relasion ti agassawa ken no posible kadi dayta. Kinuna ni Jesus kadakuada: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.” a (Mateo 19:4-6) Nabatad a pinanggep ti Dios a mataginayon ti relasion dagiti agassawa.

Iti adu a pagilian ita, agarup 40 a porsiento wenno nasursurok pay iti amin a pagassawaan ti ‘agsinsina’ wenno agdibdiborsio. Talaga kadi a saanen nga agaplikar ita ti balakad ti Biblia maipapan iti panagasawa? Saan ngata a ti urnos ti panagasawa ti ayan ti problema isu nga adu ti agsinsina?

Usigenyo daytoy nga ilustrasion: Dua a pagassawaan ti gimmatang iti lugan nga agpada ti modelona. Ti umuna a pagassawaan manmantenerenda a naimbag ti luganda ken naannad ti panagmanehoda, isu a saan a kaskarina nga agdadael ti luganda. Ti maikadua a pagassawaan saanda nga iwaywayaan ken pagregreggetan a manteneren ti luganda ken saanda a naannad nga agmaneho, isu a nadadael dayta ket binaybay-andan. Ayan ti problema iti maikadua a kasasaad​—ti lugan wenno dagiti makinkukua? Siempre, dagiti makinkukua ti nangnangruna a responsable iti dayta.

Umasping iti dayta, saan a gapu ta agsinsina ti adu a pagassawaan ket ibagatayon nga adda pakapilawan ti urnos iti panagasawa. Kinapudnona, naballigi ti relasion ti minilion a pagassawaan, ket mangipapaay dayta iti kinaragsak ken kinatalged kadagiti indibidual, pamilia, ken komunidad. Ngem ti relasion ti agassawa ket kas iti maysa a lugan nga agkasapulan iti nasayaat ken regular a pannakamantener tapno mataginayon.

Nabiitkayo man wenno nabayagkayon nga agassawa, talaga nga epektibo ti balakad ti Biblia iti panangtaginayon ken panangpabileg iti relasionyo kas agassawa. Kitaenyo ti sumagmamano a pagarigan kadagiti sumaganad a panid.

[Footnote]