Agsursuroka iti Sao ti Dios

Siasino ti Dios?

Idatag daytoy nga artikulo dagiti saludsod a mabalin a mangburburibor kenka ken ipakitana no ania a paset ti Bibliam ti pakasarakam kadagiti sungbat. Pakaragsakan dagiti Saksi ni Jehova nga ilawlawag kenka dagiti sungbat.

1. Siasino ti Dios?

Ti pudno a Dios isu ti Namarsua iti amin a bambanag. Isu ket aw-awagan ti Biblia kas “Ari ti kinaagnanayon,” a kayatna a sawen nga awan nangrugianna ken pulos nga awan pagpatinggaanna. (Apocalipsis 15:3) Yantangay ti Dios isu ti Gubuayan ti biag, rumbeng nga isu laeng ti dayawentayo.​—Basaen ti Apocalipsis 4:11.

2. Ania aya ti Dios?

Awan ti siasinoman a nakakita iti Dios agsipud ta isu ket Espiritu, a kayatna a sawen a nangatngato ti porma ti biagna ngem kadagiti pisikal a parsua ditoy daga. (Juan 1:18; 4:24) Ti personalidad ti Dios ket naipalgak kadagiti bambanag a pinarsuana. Kas pagarigan, no ut-utobentayo ti disenio ken kinanadumaduma dagiti prutas ken sabsabong, mabigbigtayo a ti Dios ket naayat ken masirib. Ti kalawa ti uniberso ipalgakna a ti Dios ket mannakabalin.​—Basaen ti Roma 1:20.

Ad-adu pay ti maadaltayo maipapan iti personalidad ti Dios no usigentayo ti linaon ti Biblia. Kas pagarigan, ibagana kadatayo no ania ti kayat ken saan a kayat ti Dios, no kasano ti panangtratona kadagiti tattao, ken no ania ti reaksionna iti nadumaduma a kasasaad.​—Basaen ti Salmo 103:7-10.

3. Adda kadi nagan ti Dios?

Kinuna ni Jesus: “Amami nga adda iti langlangit, masantipikar koma ti naganmo.” (Mateo 6:9) Nupay adu ti titulo ti Dios, maymaysa laeng ti naganna. Nagduduma ti pannakaibalikas dayta iti kada lenguahe. Iti Iloko, masansan nga usarentayo ti “Jehova” wenno “Yahweh” no dadduma.​—Basaen ti Salmo 83:18.

Ti nagan ti Dios ket naikkat iti adu a Biblia ket nasuktan iti titulo nga Apo wenno Dios. Ngem idi naisurat ti Biblia, agarup 7,000 a daras a nadakamat ti nagan ti Dios. Impakaammo ni Jesus ti nagan ti Dios babaen ti panangusarna iti dayta no ilawlawagna kadagiti tattao ti Sao ti Dios. Tinulonganna dagiti tattao tapno maam-ammoda ti Dios.​—Basaen ti Juan 17:26.

  4. Maseknan kadi ni Jehova kadatayo?

Ipakpakita ni Jehova ti pannakaseknanna kadatayo babaen ti panangimdengna a mismo kadagiti kararagtayo. (Salmo 65:2) Ti kadi kinaadu ti panagsagaba kaipapananna a saan a maseknan ti Dios kadatayo? Adda dagiti agkuna nga ipalpalubos ti Dios ti panagsagabatayo tapno subokennatayo, ngem saan nga agpayso dayta. Kuna ti Biblia: “Adayo koma iti pudno a Dios nga agtignay a sidadangkes.”​—Job 34:10; basaen ti Santiago 1:13.

Ti Dios inikkanna ti tao iti dignidad babaen ti panangipaayna kadakuada iti kalintegan nga agpili. Saan kadi a rumbeng laeng nga agyamantayo ta mabalintay a pilien ti agserbi iti Dios? (Josue 24:15) Adu ti panagsagaba gapu ta pinili ti adu nga aramiden ti dakes iti padada a tattao. Masaksaktan ni Jehova gapu kadagita a kinaawan hustisia.​—Basaen ti Genesis 6:5, 6.

Iti din agbayag, ni Jehova usarennanto ni Jesus a mangikkat iti panagsagaba ken kadagidiay makinggapuanan iti panagsagaba. Kabayatanna, adda nasayaat a rason ni Jehova no apay a palpalubosanna ti temporario a panagsagaba. Iti maudi a paset daytoy a serye, mailawlawagto no apay nga ipalpalubos ti Dios ti panagsagaba.​—Basaen ti Isaias 11:4.

5. Ania ti kayat ti Dios nga aramidentayo?

Pinarsuanatayo ni Jehova nga addaan iti abilidad a mangammo ken mangayat kenkuana. Kayatna a maammuantayo ti kinapudno maipapan kenkuana. (1 Timoteo 2:4) No adalentayo ti Biblia, maam-ammotayo ti Dios kas maysa a Gayyem.​—Basaen ti Proverbio 2:4, 5.

Yantangay impaayannatayo ni Jehova iti biag, rumbeng a dakdakkel ti panagayattayo kenkuana ngem iti siasinoman. Maipakitatayo ti panagayattayo iti Dios babaen ti panagkararagtayo kenkuana ken panangaramid kadagiti kalikagumanna. (Proverbio 15:8) Kalikaguman ni Jehova a siaayat a tratuentayo ti sabsabali.​—Basaen ti Marcos 12:29, 30; 1 Juan 5:3.

Para iti kanayonan nga impormasion, kitaem ti kapitulo 1 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 17]

Adda kadi nasayaat a rason a temporario a maipalpalubos ti panagsagaba?