MINILION a Kristiano ti saan nga agselebrar iti Krismas. Apay ngata a kasta ti desisionda? Mariknada kadi a maikapkapisda? Marikna kadi dagiti annakda a mapapaidamanda? Usigem ti kunaen dagiti Saksi ni Jehova iti intero a lubong.

Pananglaglagip ken Jesu-Kristo: “Idi saanak pay a Saksi ni Jehova, makimisaak laeng no Krismas wenno Easter. Nupay kasta, diak met pampanunoten ni Jesu-Kristo. Ita, saanakon nga agselselebrar iti Krismas, ngem mamindua iti makalawas a makigimongak. Tultulongak met ti sabsabali a mangammo iti isursuro ti Biblia maipapan ken Jesus!”​—EVE, AUSTRALIA.

Ragsak ti panangted: “Maragragsakanak no ikkandak iti regalo a diak ninamnama. Pagay-ayatko ti sorpresa! Agaramidak met iti kard ken agpinta iti ladawan para iti sabsabali gapu ta ammok a dayta ti mangparagsak kadakuada ken mangparagsak met kaniak.”​—REUBEN, NORTHERN IRELAND.

Panangtulong kadagiti agkasapulan: “Pagay-ayatmi ti agluto para kadagiti masakit. No dadduma, ikkanmi ida iti sabong, keyk, wenno aniaman a regalo a mangparagsak kadakuada. Maragragsakankami a mangaramid iti daytoy agsipud ta masarungkaranmi ida iti aniaman a tiempo iti kada tawen.”​—EMILY, AUSTRALIA.

Panagkakadua kas pamilia: “No agtataripnong ti pamiliami, maam-ammo dagiti annakmi dagiti kasinsin, angkel, anti, lolo ken lolada. Yantangay saanmi nga aramiden daytoy iti espesipiko a petsa iti kada tawen, saankami a mapilpilit a mangaramid iti dayta. Ammo met ti pamiliami a sumarungkarkami gapu ta ay-ayatenmi ida.”​—WENDY, CAYMAN ISLANDS.

Kappia: “No panawen ti Krismas, kasla nakaad-adu ti aramiden, isu a manmano dagiti tattao a makapanunot iti kappia. Natalgeden ti riknak ta naammuakon ti kari ti Biblia kadagiti tattao. Ammok a maaddaanto dagiti annakko ti naragsak a biag iti masanguanan.”​—SANDRA, SPAIN.