•  Ọta Nan Ha Rẹ Munhẹn 2

•  Emhin Ne Ghanlẹn Ne Ribhi Baibo 3-5

  •  Ọta 3

  •  Guanọ Emhin Oriọn ne Ghanlẹn 4

  •  Baibo Nan Ha Tie 5

•  Lu Iwẹnna Itẹmhọn Osẹnobulua 6-11

  •  Vidio ọsi A Ha Miẹn Ọria Osọhẹnhẹn, bi ọsi Afikie Yo 7

  •  A Ha Miẹn Ọria Ọsọhẹnhẹn 8

  •  Afikie Yo 9

  •  Iman-emhin IBaibo 10

  •  Ọta 11

•  Unyẹnmhin Nọn Khẹke Ene Rẹkhan IJesu 12-13

  •  Iluẹmhin Baibo ọsi Agbotu 13

•  Ọta Nan Ha Rẹ Kpẹn Ọlẹn 14

•  Manman Guẹ Ebe Nan Tie Bi Iman-emhin 15

•  Adia 16

•  Ẹghe 17

•  Ọfẹotughe Ha Re Ẹnẹ Vae bhi Agbotu 18

•  Uzana Nan Ha Rẹ Do Usikoko La Usikoko Nọn Nẹ 19

•  Uzana Nin Ukpẹdẹ Ayere ọsi Uyumhin Nọnsi Jesu De Fiọ 20

•  Ọwanlẹn Nọn Mhọn Obọ bhi Ikolo Unyẹnmhin bi Iwẹnna Oga Nọnsẹmhan 21

•  Ọnọn Sun Ikolo Unyẹnmhin bi Iwẹnna Oga Nọnsẹmhan 22

•  Ọnọn Re Adia Nin Ene Ewanlẹn bi Ene Zẹ Sikẹ Ewanlẹn 23

•  Klassi Nan Ko bhi Ugha Nekẹle 24

•  Ividio 25

1. Emhanmhan nọn ribhi Ebe ọsi Ikolo Unyẹnmhin bi Iwẹnna Oga Nọnsẹmhan bi ene adia nan gbẹn ọbhi ọne ebe nan, ele agbotu ha rẹkhan sade ele do ikolo Unyẹnmhin bi Iwẹnna Oga Nọnsẹmhan. Ọkhẹke nin ọrebhe bhi agbotu zegbere nin ele rẹ ha re ọta man bhi ọne ikolo nan. Ẹbho ne bha sẹ munhẹn ha deba agbotu yo iwẹnna itẹmhọn Osẹnobulua dẹ yẹ sabọ ha re ọta man bhi ọne ikolo nan, ahamiẹn ghe ele vae bhi ikolo oga ẹghe rebhe, ele rẹọ bhi ebi Baibo tale, yẹ ha nyẹnlẹn rẹkhan ọlẹn.—be p. 282.

  2. Ihuẹnlo ọkpa. A ha so illo yẹ nan erọnmhọn fo, obhio mhan nọn sun ọne ikolo bhi ọne uzana nin ki ta ọta eso nin ọle rẹ re ọrebhe ha mhọn ọyaya da emhin nan da luẹ. Emhin ne ha manman rẹtẹ ọne agbotu, ele ọne obhio mhan ha manman talọ nyan.

  3. Ọta: Ihuẹnlo igbe. Uhọnmhọn-ọta nan ha talọ nyan bi uri-ọta kpataki eva la ea ne diẹn mun ọne uhọnmhọn-ọta ribhi Ebe ọsi Ikolo Unyẹnmhin bi Iwẹnna Oga Nọnsẹmhan. Ene ewanlẹn, la ene zẹ sikẹ ewanlẹn ne ha sabọ lu ọle nọnsẹn, ele re ọne ọta nan man. Bhi uzana nan ha da munhẹn ha tie ebe iBaibo ọsọgbọn, obhio mhan nọn ha re ọne ọta nan man ki ka re ividio nọn tẹmhọn ọne ebe iBaibo man. Ọle sabọ talọ nyan emhin ne ribhi ọne ividio ne diẹn mun uhọnmhọn-ọta nin ọle rẹman. Ọrẹyiriọ, ọkhẹke nin ọle talọ nyan ene uri-ọta rebhe ne ribhi ebe ikolo. Ẹghe ha sẹyẹ ha ribhọ, ọkhẹke  nin ọle talọ nyan ene ifoto bi ẹmhọn ne ribhi eji a da zilo nyan ọne uhọnmhọn-ọta bhi ebe ikolo nọnsẹmhan.

 4. Guanọ Emhin Oriọn ne Ghanlẹn: Ihuẹnlo igbe. Inọnta bi ewanniẹn khọnan. Ọne obọ nan imhọn ọta nan rẹ munhẹn bi ọta nan rẹ kpẹn ọlẹn. Ọkpa bhi ene ewanlẹn, la ene zẹ sikẹ ewanlẹn nọn ha sabọ lu ọle nọnsẹn, ọle ha lu ọle. Obhio mhan nọn ha lu ọle ha tobọle gha ọne ihuẹnlo igbe ọbhi ene inọnta ea, beji ene inọnta rẹ rẹtẹ ọne agbotu. Ọrẹyiriọ, ọle dẹ nọọn ene inọnta rebhe. Sẹyẹ, ọle sabọ zẹ si a dẹ tie ene iBaibo rebhe nan gbẹn rẹkhan ene inọnta. Ene da re ewanniẹn ọbhi inọnta hẹi ji ọle gbera ukhiọnmhẹn ihuẹnlo.

 5. Baibo Nan Ha Tie: Ọ ida gbera ihuẹnlo enẹn. Ibhio mhan nin ikpea, ele lu ọle. Ọne ọria ki wo tie eji a yọle nin ọle tie. Ọle ida ta emhin soso nin ọle rẹ munhẹn. Ọle ida yẹ ta ọta soso nin ọle rẹ kpẹn ọlẹn. Obhio mhan nọn sun ọne ikolo ki gbẹlokotọ bhi ebi ọne ọria rẹ tie ọne iBaibo yẹ. Ọne obhio mhan ki guanọ uwedẹ nin ọle ha rẹ rẹkpa ọle rẹ guẹ ebi a rẹ tie ebe nọnsẹn yẹ, ebi a rẹ tie ebe bhi uwedẹ nọn khiakhia bhi ehọ yẹ, ebi a rẹ tie ọle rẹrẹrẹ yẹ, ebi a rẹ kaka unun ọbhi ikpọta ne khẹke yẹ, bi ebi a rẹ re urulu nọn khẹke tie ọle yẹ. Ọle ki yẹ rẹkpa ọle lẹn eji ọ da khẹke nin ọle ha huẹan khere sade ọle tie ebe, yẹ rẹkpa ọlẹn lẹn ebi a rẹ tie ebe yẹ beji a rẹ talọ ẹdẹdẹ. Ranmhude eso bhi eji a yọle nan tie bhi Baibo tan gbera eso, ọkhẹke nin ọwanlẹn nọn mhọn obọ bhi ikolo Unyẹnmhin bi Iwẹnna Oga Nọnsẹmhan ria ẹmhọn ebi ọria guẹ ebe nan tie sẹyẹ, ọle kuẹ rẹ Baibo Nan Ha Tie nanlẹn.

 6. Ọ ida gbera ihuẹnlo igbehẹn. Ọne obọ nan bhi ọne ikolo re isẹhoa nin mhan rebhe rẹ ha luẹ ebi a rẹ lu iwẹnna itẹmhọn Osẹnobulua yẹ. Ọ yẹ rẹkpa mhan rẹ guẹ ebi a rẹ man ẹbho iBaibo yẹ. Uhọnmhọn-ọta nọn ribhi okotọ obọ natiọle “Ebi Uwẹ Ha Sabọ Ta” bhi Ebe Ọsi Ikolo Unyẹnmhin bi Iwẹnna Oga Nọnsẹmhan ibho mhan da ha zilo nyan. Ọkpakinọn, sade imhan gbẹn ọne adia ọbhọ, ele sabọ tobọ ele zẹ inọnta, Baibo, linki, la uwedẹ nin ele ha rẹ luọle nọn ha sabọ rẹ so ebi emhin dia bhi eje ibha da nyẹnlẹn. Ọria dẹ sabọ tobọle zẹ si ọle dẹ re ọkpa bhi ebe la ividio nin mhan rẹ lu iwẹnna itẹmhọn Osẹnobulua man ọria nin ọle tẹmhọn Osẹnobulua man sade imhan bha gbẹn ọne a da noo. Bhi obọ nantiọle Ebi Uwẹ Ha Sabọ Ta, uwẹ dẹ yẹ miẹn Eji A Da Zilo Nyan Eji Uwẹ Ha Tie bhi Baibo bhi Emhin Kpataki Nin Mhan Rẹ Lu Iwẹnna Itẹmhọn Osẹnobulua. Ọnan dẹ wo rẹkpa mhan bhi iwẹnna itẹmhọn Osẹnobulua. Ọria dẹ yẹ sabọ tobọle zẹ si ọle dẹ noo ọle bhi arẹman nọnsọle. Eka ẹghe nan rẹ lu ene arẹman kẹkẹ ribhi ẹkẹ ebe ikolo oga, ẹgheso, adia ebhebhe sabọ yẹ ha ribhọ. Ọ bha khẹke nin ọria ha tẹmhọn nọn bha deba arẹman nọnsọle, ranmhude ọle guanọ nin ọle noo ẹghe nan re nanlẹn fo. Ẹbho eso sabọ lu arẹman nọnsele fo ọkuẹsẹ ẹghe nan re nin ele rẹ lu ọle gba. Ahamiẹn ọkhẹke, ewanlẹn bhi agbotu sabọ yẹ lu ene arẹman nan.

 7. Vidio ọsi A Ha Miẹn Ọria Osọhẹnhẹn, bi ọsi Afikie Yo: A dẹ ha re ene ividio nan man uki-uki, yẹ ha zilo nyan ele. Ene ividio nan dẹ ha rẹman ebi mhan ha rẹ tẹmhọn Osẹnobulua yẹ sade mhan miẹn ọria ọsi ọhẹnhẹn, bi sade mhan fikie bu ọne ọria. Obhio mhan nọn sun ọne ikolo ha lu ọne obọ nan.

 8. A Ha Miẹn Ọria Ọsọhẹnhẹn: Obhio mhan nin okpea la obhio mhan nin okhuo sabọ rẹ lu ọne arẹman nan. Ahamiẹn ghe okhuo ha lu ọle, ọria nọn ha deba ọle lu ọle ki ha yi okhuo. Ahakimiẹn ghe okpea ha lu ọle, ọria nọn ha deba ọle lu ọle ki ha yi okpea. Itue eva ne na bhi azagba-uwa ọkpa vae sabọ ko lu ọle. Ele sabọ mundia lu ọne arẹman, la ele dotua. Obhio mhan nọn lu ọne arẹman ki tuẹ bhi uwedẹ nan rẹ tuẹ bhi ẹbho nin ọle da nyẹnlẹn. Ọle ki yẹ lu ọle rẹkhan uwedẹ nọn rẹ ribhi obọ natiọle “Ebi Uwẹ Ha Sabọ Ta” bhi ebe ikolo nọnsẹmhan.

 9. Afikie Yo: Obhio mhan nin okpea la obhio mhan nin okhuo sabọ rẹ lu ọne arẹman nan. Ahamiẹn ghe okhuo ha lu ọle, ọria nọn ha deba ọle lu ọle ki ha yi okhuo. Ahakimiẹn ghe okpea ha lu ọle, ọria nọn ha deba ọle lu ọle ki ha yi okpea. (km 5/97 p. 2) Ele sabọ mundia lu ọne arẹman, la ele dotua. Ọria nọn lu ọle ki rẹman ebi mhan ha ta sade mhan fikie bu ọria nọn ka mhan ehọ ẹghe nin mhan rẹ miẹn ọlẹn ọsi ọhẹnhẹn. Ọle ki yẹ lu ọle rẹkhan uwedẹ nọn rẹ ribhi obọ natiọle “Ebi Uwẹ Ha Sabọ Ta” bhi ebe ikolo nọnsẹmhan.

 10. Iman-emhin IBaibo: Obhio mhan nin okpea la obhio mhan nin okhuo sabọ rẹ lu ọne arẹman nan. Ahamiẹn ghe okhuo ha lu ọle, ọria nọn ha deba ọle lu ọle ki yẹ ha yi okhuo. Ahakimiẹn ghe okpea  ha lu ọle, ọria nọn ha deba ọle lu ọle ki ha yi okpea. (km 5/97 p. 2) Ele sabọ mundia lu ọne arẹman, la ele dotua. Ọne ọria dẹ lu ọne arẹman bhi uwedẹ nọn ha rẹman ghe ọne iman-emhin Baibo munhẹn fo. Ahamiẹn ghe ọ iyi ebi a rẹ munhẹn nọnsẹn yẹ, la ebi a rẹ kpẹn ọta nọnsẹn yẹ a yọle nin ọle wẹnna ọi, ọ bha khẹke nin ọle ta ọta nan rẹ mun iman-emhin iBaibo hẹn la ọta nan rẹ kpẹn ọlẹn. Ọ iyi oko ghe ọria dẹ tie uduọle rebhe nan da re ọne iman-emhin iBaibo dagbare. Ji ẹbho daghe ebi a rẹ man ọria iBaibo nọnsẹn yẹ.

 11. Ọta: Obhio mhan nin okpea, ọle ha lu ọnan. Ọle ki lu ọle bhi uwedẹ nan rẹ ta ọta ogbakha.

 12. A ha ki so illo fo, a ki rẹ ihuẹnlo 15 ne rẹkhan ọlẹn rẹ re ọta ọkpa la eva man, ne ha sabọ rẹkpa mhan rẹ daghe uwedẹ nin mhan ha rẹ ha noo adia ne ribhi iBaibo bhi iẹnlẹn nọnsẹmhan. Ene ewanlẹn, la ene zẹ sikẹ ewanlẹn ne ha sabọ lu ọle nọnsẹn, ele re ene ọta nan man. Sokpan, ahamiẹn ghe ọria kpataki ribhọ nan guanọ nọn re ọne ọta man, a dẹ gbẹn ọlẹn ọbhi enin. Ene ewanlẹn ọkpa lu ọbo natiọle “Emhin Ne Rẹtẹ Agbotu Mhan.” Ahamiẹn ọne Ebe Ọsi Ikolo Unyẹnmhin bi Iwẹnna Oga Nọnsẹmhan  mhọn obọ nin agbotu ha zilo nyan, obhio mhan nọn ha re ọne ọta man sabọ tobọle ne inọta eso dagbare nin ọle ha rẹ nin agbotu zilo.

  13. Iluẹmhin Baibo ọsi Agbotu: Ọ ida gbera ihuẹnlo ọgban. Ewanlẹn ne ha sabọ lu ọle nọnsẹn, ele sun ọne iluẹmhin nan. (Ahamiẹn ghe ewanlẹn ne ribhi ọne agbotu ibun, a sabọ yẹ ne ene zẹ sikẹ ewanlẹn ne ha sabọ lu ọle nọnsẹn ba ẹbho ne sun ọne iluẹmhin nan.) Otu ene ewanlẹn ha kugbe zilo ẹbho ne sẹle ne rẹ ha sun ọne iluẹmhin nan. Ẹbho nan zẹle dẹ ha yi ẹbho ne ha sabọ sun ọlẹn nọnsẹn, yẹ lu ọle bhi ẹghe nan re nin ele. Ele ki ha yi ẹbho ne ha sabọ zẹ iman-emhin kpataki nọn ribhi ẹkẹ iBaibo dagbare, yẹ rẹkpa ọrebhe rẹ daghe uwedẹ nin ele ha rẹ sabọ noo emhin nan luẹle bhi iẹnlẹn nọnsele. Ele dẹ sabọ miẹn adia nọn ha rẹkpa ele rẹ sun ọne iluẹmhin nan nọnsẹn sade ele fẹ adia nan re re rẹji ebi a rẹ sun iluẹmhin ọsi ebe Ọkhẹughe. Ahamiẹn ghe a zilo nyan eji a yọle nan luẹ bhi ọne uzana nin fo, ọ bha khẹke nin ọria nọn sun ọne iluẹmhin gheghe ha guanọ emhin ebhebhe nin ọle ha ta ranmhude ọle guanọ nin ọle noo ẹghe nọnsọle gba. Ahamiẹn ghe ẹbho bun, ẹbho ikikẹ da ha sun ọne iluẹmhin yẹ tie ebe uzana-uzana. Ahamiẹn ghe ọnọn sun ikolo taman ọria nọn sun ọne iluẹmhin nan nọn hian ọlẹn re ranmhude ẹghe, ọnọn sun ọne iluẹmhin ha tobọle zẹ ebi ọle ha lu nin ọle rẹ hian ọlẹn re. Ọle sabọ yọle nin ọria nọn tie ebe nan rẹ luẹ emhin hẹi tie ene uduọle rebhe.

  14.. Ọ ida gbera ihuẹnlo ea. Ọnọn sun ọne ikolo ki re unun so bhi emhin kpataki eso nan luẹle bhi ikolo ọsi ọne ukpẹdẹ nin. Ọle ki yẹ re unun so bhi emhin eso nan ha luẹ bhi ikolo ọsi uzana nọn vade. Ọle sabọ sounun bhi inọnta ọkpa nan ha re ewanniẹn ọi ẹdẹ nin. Ahamiẹn ẹghe ribhọ, ọle sabọ yẹ sounun ẹbho ne ha re ọta man bhi ikolo ọsi uzana nọn vade. Ọne ẹghe nan ọle ha yẹ rẹ taman agbotu emhin eso nan guanọ nin ele lẹn yẹ tie ilẹta nọn khẹke nan tie man ele. Ọle ida re ọne ẹghe nan ha ta emhin nin agbotu ka lẹn khẹ, bọsi ẹghe nin agbotu mhanmhan nan rẹ ha yo inẹbho, la usun ne ha gbọnọ iKindọn Họọ. A dẹ ne emhin ne sẹnian toman bhi bọdi nan ne emhin nan ho nin ọrebhe lẹn toman ọi. Ahamiẹn ghe ọne ẹghe nan ida sẹ nan rẹ tie ilẹta rebhe nọn khẹke nan tie, ọnọn sun ọne ikolo ki taman ibhio mhan ne mhọn ọta bhi obọ natiọle “Unyẹnmhin Nọn Khẹke Ene Rẹkhan IJesu” nin ele hian ọta nọnsele re. (Fẹ  uduọle 13 bi  17 ghe.) A ki re illo bi erọnmhọn rẹ kpẹn ọne ikolo.

 15. Ọkhẹke nin ene a re Baibo Nan Ha Tie nan, bi ene mhọn areman la ọta bhi obọ natiọle “Lu Iwẹnna Itẹmhọn Osẹnobulua” re ebe Iman-emhin nọnsele vae bhi ikolo oga. Ọ sabọ ha yi ọne ele mhọn bhi foni, la ọne a print. Ẹmhọn nọn ribhi ọne ebe nan, ọle ọnọn sun ikolo ha rẹ re adia nin ele sade ele re ọta nọnsele man fo. Adia nọn ribhi inọmba nan gbẹn rẹkhan ọta nan re nin ọne ọria bhi ebe ikolo nọnsẹmhan, ọle ọkhẹke nin ọle wẹnna rẹkhan. Ọne ọria ha tobọle re iyaman ọbhi adia nin ọle wẹnna rẹkhan bhi obọ natiọle “Be Uwẹ Sẹ Guẹ Sẹyẹ?” bhi ebe Iman-emhin. Ọ iyi ọnọn sun ọne ikolo ha re iyaman ọbhọ.

  16. Ene a re Baibo Nan Ha Tie nan, bi ene mhọn areman la ọta bhi obọ natiọle “Lu Iwẹnna Itẹmhọn  Osẹnobulua” ha re ọta nọnsele man fo, ọne sun ikolo ki re ihuẹnlo ọkpa-ọkpa rẹ khuẹnmhẹn ele yẹ na bhi ebe Iman-emhin re adia nin ele. Ẹghe nin ọnọn sun ikolo ha rẹ ha tie ele vae bhi esẹ, ọle ida taman agbotu adia nan guanọ nin ọne ọria wẹnna rẹkhan. Ọne ọria ha ki re ọta nọnsọle man fo, ọnọn sun ikolo ki ka khuẹnmhẹn ọlẹn, ọle kuẹ tẹmhọn adia nin ọne ọria wẹnna rẹkhan. Ọne ẹghe nan ọle ha ki rẹ tale ebi ọne ọria rẹ wẹnna rẹkhan ọne adia yẹ, la ọle re ekpẹn-ekpẹn ta eji ọ da khẹke nin ọne ọria da situa ẹdẹ ọbhebhe. Ọnọn sun ikolo sabọ yẹ tẹmhọn emhin ebhebhe nin ọle daghe bhi ọne arẹman nọn ha rẹkpa ọne ọria nọn lu ọle, la ẹbho nekẹle ne ribhi agbotu. Ahamiẹn ghe ọ sẹyẹ khẹke nan sẹyẹ re adia ọbhebhe nin ọne ọria bhi adia nan yọle nin ọle wẹnna rẹkhan, la adia ọbhebhe, a ki re ọne adia nanlẹn sade a ki zobọ bhi ikolo, la bhi ẹghe ọbhebhe. Ebe Iman-emhin la ebe natiọle Benefit From Theocratic Ministry School Education, ọle ọkhẹke nin ọne adia na vae.—Nin uwẹ rẹ lẹn emhin ebhebhe nọn khẹke nin ọnọn sun ikolo bi ọnọn re adia nin ene ewanlẹn bi ene zẹ sikẹ ewanlẹn ha lu, fẹ  uduọle 17,  22, bi  23 ghe.

     17. Ọria soso hẹi noo gbera ẹghe nan re nanlẹn. Ọ bha yẹ khẹke nin ọta nin ọnọn sun ikolo ta gbera ẹghe nan rẹ nanlẹn. Ahamiẹn ene mhọn areman la ọta bhi obọ natiọle “Lu Iwẹnna Itẹmhọn Osẹnobulua,” noo ẹghe nọnsele fo, ọnọn sun ikolo ki rẹ ẹwan-ẹwan rẹ kpẹn ọne ọta. Ẹbho ne mhọn ọta bhi obọ nekẹle ọsi ọne ikolo ha noo gbera ẹghe nan re nin ele, ọnọn re adia nin ene ewanlẹn bi ene zẹ sikẹ ewanlẹn ki re adia nin ele bhi ẹkhokho. (Fẹ  uduọle 23 ghe.) Ọne ikolo rebhe rẹ sẹbhi illo bi erọnmhọn ida gbera uriagogo 1 bi ihuẹnlo 45.

 18. Bhi uzana nin ọfẹotughe ha rẹ re ẹnẹ vae bhi agbotu, emhanmhan nọn ribhi Ebe ọsi Ikolo Unyẹnmhin bi Iwẹnna Oga Nọnsẹmhan a da sẹyẹ rẹ do ikolo. Ọkpakinọn, emhin eso dẹ fidenọ. Ọta nin ọfẹotughe ha re ihuẹnlo 30 ta, ọle da ha ribhi ihe ọsi Iluẹmhin Baibo ọsi Agbotu. Ọkuẹsẹ ọnọn sun ikolo tie ọfẹotughe vae bhi esẹ, ọle ki ka re unun so bhi emhin kpataki eso nan luẹle bhi ikolo ọsi ọne ukpẹdẹ nin, yẹ re unun so bhi emhin eso nan ha luẹ bhi ikolo ọsi uzana nọn vade. Ọle ki taman agbotu emhin eso nan guanọ nin ele lẹn yẹ tie ilẹta ne khẹke nan tie. Ọfẹotughe ha ki ta ọta nọnsọle fo, ọne ọfẹotughe ki re illo nin ọle tobọle zẹ rẹ kpẹn ọne ikolo. Ọle sabọ yẹ tie obhio mhan ọbhebhe nọn dọ nan erọnmhọn. Usun ne ko bhi ugha nekẹle bhi Kindọn Họọ ida ko sade urolo ọkpa ọne agbotu rebhe rẹ luẹ emhin. Ahamiẹn ghe ọne agbotu mhọn usun ne re urolo ọbhebhe luẹ emhin bhi ugha nekẹle, ọne usun nan sabọ do ikolo nọnsele. Sokpan, ẹghe ha sẹ nin ọfẹotughe rẹ ta ọta nọnsọle, ele ki fikie vae bhi ẹkẹ Kindọn Họọ dọ kaehọ ọta ọsi ọne ọfẹotughe.

 19. Bhi uzana nan ha rẹ do usikoko la usikoko nọn nẹ, a ida do ikolo soso bhi agbotu. Ọdeọde dẹ tobọle luẹ emhin nan rẹ mhanmhan ọbhi ọne uzana nin. Azagba-uwa sabọ yẹ kugbe luẹ ọle.

 20. Ukpẹdẹ Ayere ọsi Uyumhin nọnsi Jesu ha de fiọ bhi ẹdẹ uzana, a ida do ikolo oga ọsi Unyẹnmhin bi Iwẹnna oga Nọnsẹmhan bhi ọne uzana nin. Ọrẹyiriọ, bhi ukpẹdẹ Ayere, a dẹ sabọ dọ ikolo nan do a kuẹ dagbare bhi inẹbho.

 21. Ọwanlẹn ọkpa nin otu ene ewanlẹn zẹ, ọle da ha yi ọwanlẹn nọn mhọn obọ bhi Ikolo Unyẹnmhin bi Iwẹnna Oga Nọnsẹmhan. Ọle mhọn obọ bhọ nan rẹ miẹn ghe emhin rebhe khian nọnsẹn bhi ọne ikolo nan. Ọle yẹ mhọn obọ bhọ nan rẹ miẹn ghe ọrebhe rẹkhan ene adia nan ne ribhi enan. Ọle bi ọwanlẹn nọn re adia nin ene ewanlẹn bi ene zẹ sike ewanlẹn dẹ ha wẹnna kugbe. Ebe ikolo ọsi uki ọsọgbọn ha wo dagbare, ọle ki wo gha ọta nin ọdeọde ha rẹman bhi ọne uki eva nin ele. (Fẹ  uduọle 2-14 ghe.) Ọle ha yẹ gha ọsi ene ewanlẹn bi ene zẹ sikẹ ene ewanlẹn nin ele, bi ewaṇlẹn ne ha sun ọne ikolo bhi ene uzana. Ọkhẹke nin ọdeọde miẹn ọta nan re nanlẹn ebe si uzana ea ọkuẹsẹ ọkpẹdẹ nin ọle ha lu ọle. Ebe Nan Rẹ Gha Obọ Nin Ọria Ha Lu bhi Ikolo Unyẹnmhin bi Iwẹnna Oga Nọnsẹmhan (S-89), ọle ha rẹ gha ene ọta. Ọwanlẹn nọn mhọn obọ bhi Ikolo Unyẹnmhin bi Iwẹnna Oga dẹ re ebe ọsi emhanmhan ọsi ọne ikolo ta bhi eji a da re ebe ta. Ene ewanlẹn sabọ yọle nin ọwanlẹn ọbhebhe la ọze sikẹ ene ewanlẹn nọn ha rẹkpa Ọwanlẹn nọn mhọn obọ bhi ọne ikolo. Ọkpakinọn, ọwanlẹn ọkpa ha gha ọta nin ewanlẹn bi ezẹ sikẹ ele.

  22. Bhi uzana kẹkẹ, ọkpa bhi ene ewanlẹn ki sun ọne ikolo nan. (Ahamiẹn ghe ewanlẹn ne ribhi ọne agbotu ibun, a sabọ yẹ ne ene zẹ sikẹ ewanlẹn ne ha sabọ sun ọlẹn nọnsẹn ba ẹbho ne ha sun ọne ikolo.) Ọne ọria nan ha tobọle mhanmhan emhin nin ọle ha ta nin ọle rẹ mun ọne ikolo hẹn bi emhin nin ọle ha ta nin ọle rẹ kpẹn ọne ikolo. Ọle yẹ nọọn inọnta nan rẹ zilo nyan ividio ọsi A Ha Miẹn Ọria Ọsọhẹnhẹn bi Afikie Yo. Ọle yẹ zilo nyan ividio nan rẹ tẹmhọn adia kẹkẹ ne ribhi ebe Iman-emhin. Ọle hi ọnọn yẹ tie ẹbho vae bhi esẹ nin ele dọ re ọta nọnsele man. Sẹyẹ, ahamiẹn ghe ewanlẹn ne ribhi ọne agbotu ibun, ọle ki yẹ re ọta ebhebhe man bhi ọne ikolo. Ọle ida ta ọta nọn bun gbe sade ọria re ọta nọnsọle man fo. Otu ene ewanlẹn, ele ha zẹ ewanlẹn ne ha sabọ ha sun ọne ikolo nan. Ene ewanlẹn nan ki ha sun ọne ikolo ọsegbe-ọsegbe. Beji emhin dia yẹ, a sabọ ha mhanmhan ọlẹn nin ọwanlẹn nọn mhọn obọ bhi Ikolo Unyẹnmhin bi Iwẹnna Oga Nọnsẹmhan ha sun ọne ikolo gbera ene ewanlẹn nekẹle. Ahamiẹn ghe ọria sẹ nọn ha deba ene sun Iluẹmhin Baibo ọsi Agbotu, asabọmiẹn ọle dẹ sabọ deba ene sun ikolo oga. Yere ghe ọkhẹke nin ọwanlẹn nọn sun ikolo sabọ ha khuẹnmhẹn ene lu Baibo Nan Ha Tie, bi ene mhọn areman la ọta bhi obọ natiọle “Lu Iwẹnna Itẹmhọn Osẹnobulua” yẹ ha re adia nin ele bhi uwedẹ ekpẹn. Ọnọn sun ikolo yẹ mhọn obọ bhọ nan rẹ miẹn ghe a do ọne ikolo fo bhi ẹghe. (Fẹ  uduọle 14 bi  17 ghe.) Ahamiẹn ọle guanọmhin, bi ahamiẹn ọne esẹ bhia sẹ, ọle sabọ yọle nan mhanmhan eji ebhebhe nan da talọ ọbhi esẹ beji a da miẹn ghe ọle kuẹ tie ọria vae bhi esẹ fo, ọne ọria mundia bhi eji ọle ha da re ọta nọnsọle man. Ọle dẹ yẹ sabọ dotua bhi obọ ọkpa bhi ọne esẹ bhi ẹghe nan rẹ tie iBaibo bi ẹghe nan rẹ lu arẹman ne ribhi obọ natiọle “Lu Iwẹnna Itẹmhọn Osẹnobulua.” Ọnan dẹ rẹkpa ọle rẹ te ẹghe.

   23. Ahamiẹn ghe ọwanlẹn nọn manman gue ebi a rẹ re ọta man yẹ ribhọ, ọle a ha re ọbhi ọne ihe nan. Iwẹnna nọnsọle hi nin ọle rẹ re adia nin ene ewanlẹn bi ene zẹ sikẹ ewanlẹn bhi ẹkhokho. Ọle dẹ sabọ re adia nin ele bhi ọta nọn ki rẹ khin nin ele rẹman. Ọle sabọ re adia nin ele bhi ọta nin ele rẹman bhi Ikolo Unyẹnmhin bi Iwẹnna Oga Nọnsẹmhan, ọta ogbakha nin ele ta, bi sade ele sun iluẹmhin ọsi ebe Ọkhẹughe bi Iluẹmhin Baibo ọsi Agbotu, la sade ele tie ebe bhọ. (Fẹ  uduọle 17 ghe.) Ahamiẹn ghe ewanlẹn ne manman guẹ ebi a rẹ re ọta man yẹ bun bhi ọne agbotu, ọwanlẹn kẹkẹ sabọ ha lu ọne iwẹnna nan ukpe-ukpe. Ọ iyi ẹghe rebhe nin ọria rẹ re ọta man ọne ọwanlẹn nan ha rẹ ha re adia nanlẹn.

 24. Beji ẹbho bun sẹ, agbotu eso sabọ ha mhọn klassi nan ko bhi ugha nekẹle bhi Kindọn Họọ. Bhi ene klassi nan, ẹbho ki yẹ lu Baibo Nan Ha Tie, bi ene areman bi ọta ne ribhi obọ natiọle “Lu Iwẹnna Itẹmhọn Osẹnobulua.” Eria dẹ ha ribhọ ne da ha sun ene iklassi nan. Ọ dẹ mhẹn nẹ sade a mun ọne ẹsọn nan nin ọkpa bhi ene ewanlẹn. A sabọ yẹ mun ọne ẹsọn nin ọkpa bhi ene zẹ sikẹ ewanlẹn nọn ha sabọ lu ọle nọnsẹn. Otu ene ewanlẹn, ele ha zẹ ẹbho ne ha sabọ miẹn ọne ẹsọn. Ele ha yẹ mhanmhan ọlẹn si ene ẹbho dẹ ha lu ọle ọsegbe-ọsegbe. Ọria nọn sun ọne iklassi nan dẹ rẹkhan adia nọn ribhi u duọle 16. Ahamiẹn ghe agbotu mhọn iklassi nan ko bhi ugha nekẹle, a ki taman ẹbho ne da ko bhi ọne iklassi ne ha khian sade a ki lu obọ natiọle Guanọ Emhin Oriọn ne Ghanlẹn fo. Ele ki fikie vae bhi ẹkẹ Kindọn Họọ sade obọ natiọle Lu Iwẹnna Itẹmhọn Osẹnobulua ki fo. Ahamiẹn ghe vidio ribhọ nan ha zilo nyan, ẹbho ne ribhi klassi nan ko bhi ugha nekẹle sabọ na bhi eji ele ye ghe ividio nan rẹman bhi ẹkẹ iKindon Họọ, yẹ kaehọ beji a ha rẹ ha zilo nyan ọlẹn. Ahakimiẹn ghe ọnan ida wẹnna nin ele, ọnọn sun ọne klassi ki re ifoni la tablẹt rẹ re ọne ividio man ele, yẹ zilo nyan ọlẹn.

 25. A dẹ wo ha re ividio man bhi Ikolo Unyẹnmhin bi Iwẹnna Oga Nọnsẹmhan. Ene ividio nan dẹ ha ribhi JW Library® app. Foni, tablẹt bi kọmputa ne bunbun dẹ sabọ tuje ọle a. Ẹgheso, a ha re ividio ọsi A Ha Miẹn Ọria Ọsọhẹnhẹn bi Afikie Yo man bhi ikolo oga fo, a sabọ yẹ re ọle man bhi ikolo nan do ọkuẹsẹ a khian inẹbho.