UHỌNMHỌN-ỌTA NỌNZI 25

Be imẹn ha lu nin mẹn hẹi yẹ ha re obọ so egbe mẹn bhi uwedẹ nọn bha gba?

“Ẹghe nin mẹn rẹ ha ribhi ikpe elẹnlẹn mẹn rẹ ha re obọ so egbe mẹn bhi uwedẹ nọn bha gba. Akizẹbue, mẹn da dọ kere ghe ọne emhin nin mẹn lu nan imhẹn hiehie. Ẹghe nọn hi ki rẹ khin nin mẹn rẹ lu ọle, egbe iẹnlẹn ki wo lọ mẹn, mẹn ki ha yọle, ‘Mẹn bha riale Osẹnobulua dẹ hoẹmhọn ọria nọn diabe mẹn.’”—Luiz.

BEJI uwẹ ha rẹ fẹkẹ ha wanre, iriọ ọ ha rẹ manman ha ghọn uwẹ rẹ ne okpea la okhuo nowẹ. Ọnan sabọ rẹ re uwẹ munhẹn ha re obọ so egbe uwẹ bhi uwedẹ nọn bha gba. a Ẹbho eso sabọ rẹ ha yọle ghe emhin nọn dia iriọ iyi emhin ebe. Ele sabọ ha yọle, “Ọria ida miẹn ikuan-egbe bhọ.” Bhi ọsi ẹmhọanta, emhin nọn manman khẹke nọn nin ọria rẹ rẹban ọlẹn. Pọl nin odibo da yọle: “Bha lọ ikpakpa-egbe nọnsẹbha . . . bhi ẹmhọn . . . iria-ẹmhọn oghẹ.” (Colossians 3:5) Ọria da ha re obọ so egbe ọle bhi uwedẹ nọn bha gba, ọnan dẹ re ọle manman ha ghọn ọlẹn rẹ ne ọria nowẹ gbera ọnikhẹ. Sẹyẹ fẹ emhin eso nan ghe:

● Ọria nọn re obọ so egbe bhi uwedẹ nọn bha gba, ọsi egbe ọle ọkpa ọle wo ria ẹmhọn ọlẹn, ọle iria ọsi ẹbho ebhebhe. Bhi ọsi ijiẹmhin, ọria da ha re obọ so egbe ọle bhi uwedẹ nọn bha gba, ebi emhin nin ọle lu ha rẹ re egbe ha lẹnlẹn ọle yẹ, ọle ọkpa ọle wo ria ẹmhọn ọlẹn.

● Okpea nọn re obọ so egbe ọle bhi uwedẹ nọn bha gba ighe okhuo bi emhin soso, ọle ki ha ghe okhuo bii ọria nin ọle ha ne nowẹ bhi ẹghe nọn rẹ ghọn ọlẹn. Iriọ okhuo nọn re obọ so egbe ọle bhi uwedẹ nọn bha gba yẹ dia, ọle ighe okpea bii emhin soso.

● Ọria da ha re obọ so egbe bhi uwedẹ nọn bha gba rẹ sẹbhọ ghe egbe ki ha lẹnlẹn ọlẹn, egbe ida ha lẹnlẹn ọlẹn sade ọle ne ọdọ ọle la okhuo ọle nowẹ.

Nin uwẹ rẹ ha re obọ so egbe uwẹ bhi uwedẹ nọn bha gba, ọkhẹke nin uwẹ dọnmhegbe ha mun egbe uwẹ ọbhi ibẹẹ sade ọ ghọn uwẹ rẹ lu iriọ. (1 Thessalonians 4:4, 5) Nin uwẹ rẹ sabọ lu ọnan, Baibo yọle nin uwẹ rẹban idia nọn hi ki rẹ khin nọn ha sabọ re inegbenowẹ ha ghọn uwẹ. (Proverbs 5:8, 9) Ọkpakinọn, ahakimiẹn ghe ranmhude ghe ọ reele nin uwẹ munhẹn ha lu ọle, uwẹ bha yẹ sabọ re obọ sibhọre kii? Asabọmiẹn uwẹ rẹ wo dọnmhegbe rẹ rẹban ọlẹn, sokpan ọ bha fu uwẹ, ọnan sabọ rẹ re uwẹ ha riale ghe uwẹ ida sabo fidenọ, sẹyẹ, ghe uwẹ ida sabọ re obọ rẹkhan uhi nọnsi Osẹnobulua. Iriọ obhokhan okpea ọkpa natiọle Pedro ha ria bhi ọkhọle. Ọle da yọle, “Beji mẹn kie munhẹn ha re obọ so egbe mẹn bhi uwedẹ nọn bha gba, ọkhọle da wo manman ha gbe mẹn asan, mẹn da ha riale ghe, Osẹnobulua ida sabọ rẹhunmhan imẹn bhi ọne emhin ebe nan. Ọ da wo manman ha nọghọ imẹn rẹ nan erọnmhọn ji Osẹnobulua.”

Ahamiẹn iriọ emhin yẹ dia uwẹ bhi egbe beji ọ dia Pedro bhi egbe, lẹn sẹbhọ ghe ọsi uwẹ bha wo fo. Elasẹre bi ene wanre eso ribhọ ne sẹ sabọ re obọ sibhọre, uwẹ dẹ yẹ sabọ re obọ sibhọre!

Ebi Uwẹ Ha Lu Yẹ Nin Ọkhọle Hẹi Yẹ Ha Gbe Uwẹ Asan

Beji mhan sẹ luẹ, ẹbho ne re obọ so egbe bhi uwedẹ nọn bha gba rẹ sẹbhọ ghe egbe ki ha lẹnlẹn ele, ọkhọle manman wo gbe ele asan. Bhi ọsi ẹmhọanta, ahamiẹn ọkhọle gbe uwẹ asan ‘bhi uwedẹ nọn rẹ yẹẹ Osẹnobulua,’ ọnan ki rẹkpa uwẹ rẹ rẹban ọne emhin nan nọn imhẹn nin uwẹ guẹle. (2 Corinthians 7:11) Mhan ha ji ọkhọle gbe mhan asan gbe, ọ imhẹn hiehie, ọ dẹ sabọ gbe mhan ahu sotọ rẹ sẹbhọ ghe, egbe ki lọ mhan rẹ ha dọnmhegbe rẹ rẹban ọlẹn.—Proverbs 24:10.

Ọria da ha re obọ so egbe ọle bhi uwedẹ nọn bha gba, emhin ebe manman nọn. Be bhọ ọne emhin ebe nan khọ sẹ yẹ? Ọ dẹ sabọ re mhan “ha yi igbọn rẹji emhin kẹkẹ nin egbe guanọ,” ọ dẹ yẹ sabọ re mhan ha ria eria ne bha gba. (Titus 3:3) Ọrẹyiriọ, ọ bha khọ sẹ bii igboghẹ. (Jude 7) Ahamiẹn ọria nọn re obọ so egbe ọle bhi uwedẹ nọn bha gba uwẹ khin, hẹi ha riale ghe Jehova ida sabọ rẹhunmhan uwẹ bhi ọne emhin ebe nan. Emhin nọn khẹke nin uwẹ ha lu hi, dọnmhegbe ha khọn ọne ọkhọle nan rẹ re obọ so egbe bhi uwedẹ nọn bha gba, sẹyẹ, hẹi ji egbe lọ uwẹ rẹ ha dọnmhegbe rẹ lu iriọ!

Ọria ha fikie dọ ha lu ọne emhin ebe nan nọn ọle dọnmhegbe rẹ re obọ sibhọre, egbe ki wo lọ ọle rẹ ha dọnmhegbe. Ahamiẹn ọnan sunu, ọ bha rẹman ghe ọria ọbe uwẹ khin. Bhiriọ, hẹi ji egbe lọ uwẹ, ebe khẹke nin uwẹ lu hi, dọnmhegbe lẹn ebezẹle nin uwẹ da kie fikie dọ ha lu ọle, uwẹ ha dọnmhegbe re obọ sibhi ọne emhin nin re.

Re ẹghe ọbhi otọ rẹ ha ria eria nyan oyẹẹ bi itohan nin Osẹnobulua mhọn da mhan. Devid nọn yẹ wo lu emhin ebe ẹgheso ranmhude ọ bha gba nanlẹn da yọle: “Beji aba rẹ mhọn itohan da imọn nesọle, iriọ Jehova yẹ rẹ mhọn itohan da ene mun ofẹn ọlẹn. Ranmhude ọle lẹn ebi ọle rẹ man mhan yẹ. Ọle yere ghe ekẹn mhan khin.” (Psalm 103:13, 14) Bhi ọsi ẹmhọanta, Jehova lẹnmhin ghe ọ bha gba nin mhan, bhiriọ, ọle ‘muegbe nin ọle rẹ rẹhunmhan.’ (Psalm 86:5) Bhi obọ nọnkẹle, ọle guanọ nin mhan ha hẹnmhọn nanlẹn. Emhin nela uwẹ ha lu nọn ha rẹkpa uwẹ rẹ rẹban ọne emhin nan nin uwẹ guẹle?

Gbẹlokotọ bhi emhin nin uwẹ lu rẹ re egbe re ahoho. Uwẹ be ghe fimu la tie ebe nọn ha sabọ re ọle ha ghọn uwẹ rẹ ha re obọ so egbe uwẹ bhi uwedẹ nọn bha gba? Ọkpa bhi ẹbho ne gbẹn ebe nọnsi Psalms da re ẹwanlẹn bhii Osẹnobulua yọle: “Denọ ẹlo nọnsẹmhẹn sibhi emhin ne bha kiọnlẹn re.” b—Psalm 119:37.

Manman dọnmhegbe ha re ọkhọle nọnsi uwẹ sibhọre. Obhio mhan nin okpea ọkpa natiọle William yọle: “Ọkuẹsẹ uwẹ nowẹ, tie ebe nọn ha re uwẹ ha ria ẹmhọn Osẹnobulua. Ọkhẹke nan miẹn ghe emhin oriọn hi emhin nọn kike nin uwẹ da ha ria ẹmhọn ọlẹn ọkuẹsẹ uwẹ dọ nowẹ.”—Philippians 4:8.

Ne ọria zilo ọle. Ẹkhọle sabọ rẹ ha lo uwẹ rẹ tẹmhọn emhin nọn dia nian man ọria, ọkpakinọn, uwẹ ha lu ọle, ọ dẹ sabọ rẹkpa uwẹ rẹ rẹban ọlẹn. Ọnan hi ebe sunu ji obhio mhan ọkpa natiọle David. Ọle da yọle: “Mẹn da do tẹmhọn ọlẹn man aba mẹn. Mẹn ida yele a ebi ọle taman mẹn, ọle da fẹkẹ re ojẹ taman mẹn yọle, ‘Uwẹ wo re mẹn ha hio.’ Ọle lẹnmhin ghe izebhudu mẹn rẹ sabọ ta ọne ẹmhọn nin man ọlẹn. Ebi ọle taman mẹn da wo ko mẹn udu re, ọ da wo rẹkpa mẹn rẹ manman ha dọnmhegbe rẹ rẹban ọlẹn.

“Aba mẹn da re ijeso bhi Baibo rẹ rẹkpa mẹn lẹn ghe mẹn iyi ọria ebe. Ọle da yẹ tie ijeso man mẹn rẹ rẹkpa mẹn lẹn ebi ọne emhin ebe nan nin mẹn ha lu kaka sẹ yẹ. Ọle da yọle nin mẹn dọnmhegbe rẹban ọlẹn, sẹyẹ, ghe mhan dẹ kie zilo nyan ọlẹn. Ọle da yọle ahamiẹn mẹn kie dobọ dọ ha lu ọle, nin mẹn hẹi ji ọnin gbe mẹn ahu sotọ. Ọle da yẹ yọle nin mẹn hian ẹghe nọn tanlẹn nin egbe mẹn nin mẹn ida rẹ lu ọle, mẹn ha yẹ dọnmhegbe re obọ rẹkhan ọlẹn.” Be ọnan rẹ rẹkpa David yẹ? Ọle da yọle: “Ranmhude ghe mẹn taman ọria ẹmhọn ọne ọnọghọ nan nin mẹn ye, mẹn da wo manman miẹn elele bhi uwedẹ nin ọle rẹ rẹkpa mẹn.” c

UHỌNMHỌN-ỌTA NỌN RẸKHAN ỌNAN

Inegbenowẹ iyi emhin nan gheghe lu. Fẹ ebezẹle nọn da yiriọ.

[Ebi a gbẹn ọbhi otọle]

 KEY SCRIPTURE

“Re egbe nẹ bhi emhin ne kẹ yẹẹ ene usẹn, ọkpakinọn, deba ẹbho ne re ọkhọle nọn khiale rẹ sotie Ebeanlẹn mhan ha khu ọbhi ikhiale, urẹọbhọ, ahoẹmhọn-egbe, ọfure.”—2 Timothy 2:22.

EBI UWẸ HA SABỌ LU

Jẹje nan erọnmhọn ọkuẹsẹ ọ manman munhẹn ha ghọn uwẹ rẹ ne ọria nowẹ. Bhii Jehova nin ọle re “ahu nọn gbera eji ahu ọsi ọria sẹle” nin uwẹ rẹ sabọ ziẹngbe ọne edọnmhẹn.—2 Corinthians 4:7.

UWẸ BE RẸ LẸN . . .

Ọria nọn wẹghe isabọ mun egbe ọle ọbhi ibẹẹ bhi ẹmhọn inegbenowẹ. Ọkpakinọn ọria nọn ziẹnlẹn mun egbe ọle ọbhi ibẹẹ, aharẹmiẹn ẹkhokho ọle ye.

bi mẹn ha lu!

Mẹn dẹ sabọ ha ria ẹmhọn emhin ne mhẹn sade mẹn ․․․․․

Nin mẹn rẹ ji ẹmhọn inegbenowẹ ha ghọn mẹn, mẹn dẹ ․․․․․

Inọnta nin mẹn ho nin mẹn nọọn ene biẹ mẹn le rẹji ọne ẹmhọn nan hi ․․․․․

BE UWẸ RIALE YẸ?

● Bezẹle nọn da khẹke nin mhan ha yere ghe Jehova ‘muegbe nin ọle rẹ rẹhunmhan?’—Psalm 86:5.

● Jehova hi ọnọn man mhan bhi uwedẹ nọn ha rẹ ha ghọn mhan rẹ ne ọria nowẹ, ọkpakinọn, ọle da yẹ yọle nin mhan mun egbe mhan ọbhi ibẹẹ. Bhiriọ, emhin nela uwẹ guanọ nin Jehova ha mhọn bhi ọkhọle ghe, uwẹ dẹ lu bhi ọne ẹmhọn nan?

[Adudu]

Beji mẹn ki sabọ rẹban ọnọghọ nin mẹn ha mhọnlẹn, mẹn da dọ sabọ ha mhọn ọkhọle umueria nọn gbale bhi odalo Jehova, mẹn bha guanọ nin mẹn lu emhin soso riia ọne ikolu nin mẹn bi Jehova ko mhọnlẹn an!—Sarah

[Adudu]

Ahamiẹn ọria de bhi ẹghe nin ọle rẹ runẹ, ọnin bha rẹman ghe ọle dẹ kie dọ ne otọ munhẹn ha runẹ. Iriọ yẹ nọn rẹji ọria nọn re obọ so egbe ọle bhi uwedẹ nọn bha gba, rẹ sẹbhọ ghe egbe ki ha lẹnlẹn ọlẹn. Ahamiẹn ọle kie dobọ dọ ha lu ọle, ọ bha rẹman ghe ọle ida kie sabọ re obọ sibhọre