“Osẹnobulua nọn ribhi okhun ki mun ejele nan ida sabọ fuẹn an ghee gbọ.”​—Daniel 2:​44, New World Translation.

“A re ọmọn okpea nin mhan; ọne ugbẹloghe ki ha ribhi ijian-abọ nọnsọle.”​—Isaiah 9:6.

• Uwẹ ki ha ribhi odotọ ugbẹloghe nọn mhẹn, nin uwẹ ha da miẹn elele.​—Isaiah 48:​17, 18.

• Uwẹ ida yẹ ha khọnmhọn bhi ọne agbọn ọsọgbọn nọn vade. Uwẹ ki yẹ ha ghọnghọn​—Revelation 21:​3, 4.

Ehe, ranmhude ene emhin eva nan:

• Jesu rẹman ebi Agbejele nọnsi Osẹnobulua ha lu. Jesu da taman edibo nesọle nin ele ha nan erọnmhọn nin Agbejele nọnsi Osẹnobulua vae, nin iho nọnsi Osẹnobulua ha sunu bhi ọne otọ nan. (Matthew 6:​9, 10) Jesu da rẹman ebi ọne erọnmhọn nan ha rẹ munsẹ yẹ.

  Ẹghe nin Jesu rẹ ha ribhi ọne otọ nan, ọle da re ebale nin ẹbho nin ohanmhẹn gbe, ọle da re egbe daan ẹbho ne khọnmhọn, ọle da yẹ riọ ene yu kpanọ. (Matthew 15:​29-38; John 11:​38-44) Jesu nọn da ha yi Ojie ọsi Agbejele nọnsi Osẹnobulua da re ene emhin nan nin ọle lu rẹman ghe, ọle dẹ lu emhin ne mhẹn kẹkẹ nin ẹbho ne ha nyẹnlẹn bhi odotọ ugbẹloghe ọsi ọne Agbejele​—Revelation 11:15.

• Emhin ne ki sunu nian rẹman ghe, Agbejele nọnsi Osẹnobulua sire. Jesu da tale ghe, ọkuẹsẹ ọne Agbejele mun ọfure vae bhi ọne otọ nan, okhọnlẹn, ukhunmhun, bi otọ umunvẹa ki ha sunu bhi ọne agbọn nan.​—Matthew 24:​3, 7.

  Mhan wo daghe ene emhin nan ẹlẹnan. Ọnan rẹ mhan rẹọbhọ ghe, ọne Agbejele dẹ kẹ vae dọ re ọkpẹnlẹn ọbhi ene ọnọghọ nan rebhe.