“Eghọnghọn ọsi ene ẹbho ne họn ọta nọnsi Osẹnobulua yẹ lu rẹkhan ọlẹn!”​—Luke 11:​28, New World Translation.

Bha ki ha mhọn oyẹẹ ọsaje da egbe.​—Ephesians 5:​28, 29.

Bha ki ha mun ekpẹn nin egbe.​—Ephesians 5:33.

Bha ki yẹ gba ẹkẹ egbe.​—Mark 10:​6-9.

Ehe, ranmhude ene emhin eva nan:

• Osẹnobulua hi ọnọn mun iẹnlẹn azagba-uwa gbọ. Baibo yọle ghe, Jehovah zẹle nin azagba-uwa rebhe da ha ribhọ. (Ephesians 3:​14, 15) Ebi a re ọnin ta hi, ranmhude Jehova mun emhanmhan ọsi azagba-uwa gbọ, ọle zẹle nan da miẹn azagba-uwa ẹlẹnan. Bezẹle nin ọnan da yi emhin kpataki?

  Fẹ ọne ijiẹmhin nan ghe, ahamiẹn uwẹ le ebale nọn manman mhẹn bhi unun, uwẹ da ha guanọ nin uwẹ lẹn emhin kẹkẹ nan rẹ nyẹn ọne ebale, họla uwẹ ha nọọn? Edandan iribhọ ghe, ọne ọria nọn nyẹn ọne ebale uwẹ ha nọọn.

  Iriọ yẹ nọn, nin mhan rẹ ha mhọn azagba-uwa nin eghọnghọn ye, ọkhẹke nin mhan taman iJehova nin ọle rẹkpa mhan, ranmhude, ọle hi ọnọn mun azagba-uwa gbọ.​—Genesis 2:​18-24.

• Ẹmhọn ibha rẹtẹ Osẹnobulua. Ọkhẹke nin azagba-uwa re obọ rẹkhan ibhude nesi Jehova ne ribhi Baibo. Bezẹle? “Ranmhude ẹmhọn ibha rẹtẹ ọle.” (1 Peter 5:​6, 7) Emhin ne ha mhẹn bha bhi egbe iJehova guanọ, ọnan zẹle nin ọle da re ibhude nin bha. Sẹyẹ, ibhude nesọle gene wo wẹnna.​—Proverbs 3:​5, 6; Isaiah 48:​17, 18.