Anwọ ikpe jọ ze na, eware e rrọ gaga evaọ Venezuela yọ ahwo a bi ru ozighi gaga. Osẹri Jihova jọ nọ a re se Edgar ọ ta nọ: “Evaọ imikpe jọ ọvo, eware e tẹ ga kẹ ahwo kpobi, yọ eware e ga kẹ omai wọhọ ẹsenọ ma kwa kpohọ orẹwho ofa dede nọ ma rrọ orẹwho mai.”

 Eme u fiobọhọ kẹ Edgar thihakọ? Ọ ta nọ: “Mẹ avọ aye mẹ Carmen ma roro kpahe imishọnare nọ e be hae kwa kpohọ erẹwho efa nọ eware e jọ rrọ gaga nyae ta usi uwoma, yọ a be hae wereva ghelọ umutho eware nọ a wo. Onana u ru nọ ma rọ kpairoro vrẹ eware jọ evaọ uzuazọ. Ma te wuhrẹ epanọ ma sai ro ru eware jọ kẹ omamai, wọhọ epanọ a rẹ kọ eware.”

 Edgar avọ Carmen a ru oware ofa jọ re. A jẹ hae tuduhọ inievo na awọ, makọ enọ e rrọ uweri hayo ọkora. (1 Ahwo Tẹsalonika 5:11) Edgar ọ ta nọ: “U te no udu nọ ma jẹ hae ta họ inievo na awọ no, ma jẹ hae ta kẹ ae re a fiobọhọ kẹ amọfa, re a wo ọkpọ oghọghọ nọ ma bi wo na re.”—Iruẹru Ikọ 20:35.

 Nọ ẹyao COVID-19 na o muhọ obọ, oniọvo jọ nọ a re se Argenis ọ tẹ jẹ daoma ta usi uwoma kẹ imoni riẹ. Ejọ e rọwo nọ ọ rehọ ifonu wuhrẹ ae Ebaibol na.

 Argenis ọ gwọlọ nọ imoni riẹ a re rri ividio okokohọ ologbo 2020 na rekọ a wo itanẹte he. Fikiere oniọvo jọ nọ ọ be rria ẹwho nọ ọ kẹle e rai ọ tẹ kẹ ae ividio okokohọ na nọ a rekọdo no. Omoni Argenis jọ o te mi ohwo jọ TV ologbo gbe eware ikporakporo nọ a sai ro rri ividio okokohọ na. Ẹdẹ yena, Argenis ọ tẹ rrọ ifonu se ae re ọ lẹ taure a te ti muhọ. Fiki epanọ ọ daoma te, imoni ene riẹ gbe ahwo ikpegbisoi efa a rri ividio okokohọ na.

 Ọzae jọ nọ a re se Jairo avọ aye riẹ Johana ọvo họ ahwo nọ a wo omoto evaọ ukoko rai. Fikiere a jẹ hae rehọ iẹe ro fiobọhọ kẹ amọfa. Rekọ ẹbẹbẹ jọ nọ a wo họ, o lọhọ họ re ohwo ọ ruẹ epẹtiro dẹ evaọ Venezuela. Jairo ọ ta nọ, “Ma re dhe uhiẹ họ euwa buobu re ma dẹ epẹtiro, yọ ẹsejọ dede ma rẹ jọ etẹe asohẹrioke.”

 Jairo o rri rie nọ uye rai o rrọ uvrẹvru hu. Ọ ta nọ: “Ẹsikpobi nọ ma tẹ wọ eware se inievo na, eva ọvo e rẹ were omai keme a re yere Jihova, ọnọ ọ be kẹ ahwo riẹ eware nọ a gwọlọ.”—2 Ahwo Kọrint 9:11, 14.

 Oniọvo-ọmọtẹ jọ nọ a re se Norianni nọ ọ rrọ ikpe udhegberee o je roro nọ ahwo a ti rri rie nọ ọ maha vi ohwo nọ ọ rẹ sai fiobọhọ kẹ amọfa. Rekọ nọ o se obe 1 Timoti 4:12, o te nwene iroro. Oria na o ta nọ: “Who ru re ohwo ọvo o rri owhẹ vo ho fikinọ whọ rrọ ọmaha. Ukpoye, jọ oriruo kẹ enọ i wo ẹrọwọ na.”

 Oria Ebaibol yena o duobọte Norianni udu gaga fikiere ọ tẹ jẹ hai fiobọhọ kẹ ekpako soso evaọ ukoko riẹ. Ọ rẹ jọ kugbe ai nọ a te bi kere ileta evaọ usi uwoma ota, jẹ ta kẹ ae re a kuomagbei nọ o te bi wuhrẹ ahwo Ebaibol. Ọ rẹ rọ ifonu se ai je vi uwou se ai rọ sasa ae oma. Norianni ọ ta nọ: “Jihova o ru nọ mẹ rọ riẹ nọ, u wo eware buobu nọ mẹ sai ro fiobọhọ kẹ amọfa.”

 Ebẹbẹ buobu i bi te inievo mai evaọ Venezuela evaọ etoke ogaga nana. Ghele na, a gbẹ be rọ ọwhọ ta usi uwoma na, yọ a rrọ “omosasọ ulogbo” kẹ ohwohwo.—Ahwo Kọlọsi 4:11; 2 Timoti 4:2.