Evaọ ẹdẹjọ nọ ekpahe e jọ gaga yọ ofou o bi fou, Bob nọ ọ be rria Alberta evaọ Canada ọ jẹ dhẹ omoto riẹ siawọ gaga, ẹsiẹvo na etaya riẹ e tẹ sa. Bob ọ kake riẹ oware nọ o via na ha, fikiere ọ tẹ gbẹ be dhẹ omoto na vrẹ ghele, yọ ọ dhẹ thabọ te emaele esa.

 Evaọ ileta nọ Bob o kere se ukoko Isẹri Jihova jọ nọ o rrọ ẹwho na, ọ ta oware nọ o via. Ọ ta nọ: “Izoge emezae jọ nọ e jẹ dhẹ edhere na vrẹ a tẹ dhẹ mu omẹ, jẹ rọ obọ dhesẹ kẹ omẹ nọ etaya mẹ e sa bẹre no. Ae omarai gbe omẹ ma tẹ dhẹ wẹriẹ akotọ edhere. A tẹ ta nọ a re lele omẹ nwene etaya na. Mẹ tubẹ riẹ sọ me wo etaya ọfa hayo oware nọ a rẹ rọ kpare omoto kpehru hu. Fikinọ mẹ yọ ọmo, mẹ tẹ keria akaba-ọmo mẹ kẹle edhere na. Ae ọvo a te rri otọ omoto mẹ jẹ ruẹ etaya ọfa nọ me wo gbe oware nọ a rẹ rọ kpare omoto kpehru. A te nwene etaya na. Ekpahe egaga e jọ, ekpalekpa-ame i je kie, yọ ofou o je fou. Dede nọ a nabe sẹ ziezi, a lele omẹ nwene etaya na, kẹsena mẹ tẹ ruọ edhere. Mẹ ọvo mẹ hae te sai nwene etaya na ha.

 “Me yere izoge Isẹri Jihova isoi nọ i fiobọhọ kẹ omẹ na gaga. A jọ edhere na keme a jẹ ta usi uwoma evaọ okegbe yena. Avro ọ riẹ hẹ, izoge nana a bi gine ru lele eware nọ a bi wuhrẹ ahwo. A gbe fiobọhọ kẹ omẹ hẹ, mẹ riẹ oware nọ mẹ hai ti ru hu, fikiere oware nọ a ru o da omẹ ẹro fia. Kọ ono ọ riẹ nọ izoge nọ i wo emamọ uruemu utiona a gbẹ rrọ oria jọ nọ a te jọ edhere evaọ ẹdẹ yena?”