Aye jọ nọ a re se Desicar nọ ọye ọvo ọ be yọrọ emọ riẹ, ọ gwọlọ nọ ọ rẹ jọ ọkobaro oke-kpobi. Ọ be rria Venezuela, yọ eware e rrọ gaga evaọ orẹwho na. Ghele na, ọ gwọlọ nọ ọ rẹ jọ ọkobaro oke-kpobi yọ eva e were riẹ nọ ọ sai muhọ, rekọ okpẹyao COVID-19 o te du lahwe.

 Nọ okpẹyao COVID-19 na o muhọ obọ, o jọ bẹbẹ kẹ Desicar re ọ rehọ edhere ọkpokpọ ta usi uwoma. Ọ jẹ sai kere ileta rọ ta usi uwoma kẹ ahwo ho. Ofariẹ, fikinọ ugho nọ a rẹ hwa fihọ itanẹte evaọ oborai o rrọ buobu, ọ jẹ sae rehọ ividio se ahwo re ọ ta usi uwoma kẹ ae evaọ itanẹte he. Ọ ta nọ, “Eva e gbẹ jẹ were omẹ hẹ. Asohẹrioke ọvo, mẹ gbẹ jẹ sae ta usi uwoma wọhọ epanọ mẹ jẹ hae ta vẹre he. Me te je roro nọ mẹ be sae ta usi uwoma ziezi wọhọ epanọ u fo nọ ọkobaro o re ru hu.”

 Kẹsena evaọ Ọvo 2021, inievo nọ e rrọ uwou ogha Isẹri Jihova evaọ Venezuela a tẹ ma omaa usi uwoma ota obọdẹ jọ. A ma omaa re a jọ eria irediyo nọ i bu te udhosa, gbe eria etẹlẹvisiọno ihrẹ kẹ ovuẹ Ebaibol evaọ urere oka kpobi evaọ amara na soso, yọ amara na o wo eka isoi. A tuduhọ Isẹri Jihova kpobi awọ re a vuẹ ahwo kpahe eria irediyo gbe etẹlẹvisiọno yena. Inievo nọ e rrọ uwou ogha na a te je dhesẹ enọ gbe eria ikere jọ evaọ ẹme ọvuọvo kẹ inievo na. A gwọlọ nọ a rẹ rehọ ae kugbe ta usi uwoma nọ a te bi kere ileta je lele ahwo ta ẹme evaọ ifonu. Ofariẹ, a ta kpahe epanọ u wuzou te re a hae rehọ ifonu vi uwou se ahwo rọ ta usi uwoma. Rọkẹ Isẹri Jihova buobu evaọ Venezuela, o jọ oware okpokpọ kẹ ae.

 Eva e were Desicar gaga re o wobọ evaọ usi uwoma obọdẹ na. Dede nọ ọ re rehọ ifonu vi uwou se ahwo evaọ usi uwoma ota ẹdẹvo ho, ọ ta nọ ọ rẹ dawo iẹe. Rekọ ọ gwọlọ ohwo nọ o re fiobọhọ kẹe. Desicar ọ ta nọ, “Mẹ riẹ epanọ a rẹ nẹ ifonu tere he.” Fikiere ọ tẹ ta kẹ ọmọtẹ riẹ re o wuhrẹ iẹe. O raha oke he, Desicar ọ tẹ riẹ epanọ a rẹ rọ ifonu vi uwou se ohwo evaọ usi uwoma ota.

 Desicar ọ tẹ rọ ifonu vi uwou se ahwo buobu nọ ọ riẹ, re a gaviezọ kẹ evuẹ Ebaibol nọ a te kẹ evaọ irediyo gbe etẹlẹvisiọno na. Eva e were riẹ gaga nọ emamọ iyẹrẹ i no rie ze. Ahwo buobu nọ o zizie a gaviezọ kẹ evuẹ Ebaibol na yọ a nọ enọ buobu. Amọfa nọ a sai wo uvẹ gaviezọ họ, a nọ Desicar kpahe oware nọ a ta evaọ evuẹ na. Desicar ọ ta nọ, “Mẹ rẹ salọ eware jọ evaọ usu eware nọ me kere fihotọ, kọ eware yena me re ro lele ae ta ẹme. Me ri wo izihebro nọ e vrẹ isoi evaọ amara ẹdẹvo ho, rekọ nọ usi uwoma obọdẹ na o kuhọ no, me wo izihebro nọ i bu te udhusoi gbe ikpegbivẹ (112)!” a

 Desicar o zizie oniọvo ọmọtẹ riẹ nọ ọ rrọ Osẹri Jihova ha re ọ gaviezọ kẹ evuẹ Ebaibol na re. Avọ iẹe a be rria kẹle ohwohwo. Desicar ọ ta nọ, “U gbe omẹ unu gaga nọ oniọvo mẹ ọ rọwo. Kohiohiẹ kohiohiẹ Ẹdoka evaọ ighọjọ eree, mẹ rẹ nya kpohọ oria riẹ, mẹ avọ iẹe ma vẹ gbẹ gaviezọ. Ọ jẹ hae nọ enọ gaga, ẹsejọ evaọ etoke nọ a be kẹ ovuẹ hayo nọ ovuẹ na o te kuhọ no.” Oniọvo Desicar ọ tẹ jẹ rehọ ividio thuru kugbe inievo na okenọ a je ru ekareghẹhọ uwhu Jesu, yọ ọ rọwo nọ Desicar ọ rehọ itanẹte riẹ ta usi uwoma.

 Desicar ọ ta nọ, “Me yere Jihova gaga. Me te je yere ekpako ukoko mẹ nọ a be hae rọ tuduhọ omẹ awọ. A fiobọhọ kẹ omẹ nọ mẹ be rọ wariẹ ta usi uwoma avọ evawere.” (Jerimaya 15:16) Desicar ọ gbẹ rrọ ọkobaro, yọ ọ gbẹ be daoma re o fiobọhọ kẹ ahwo nọ o vi uwou se evaọ usi uwoma ota.